Шинэ оны өмнөхөн 2024 оны арванхоёрдугаар сарын 26-ны өдөр Монголын оюутны спорт болон байлдааны самбо бөхийн УАШТ-ийг Спортын төв ордонд болж өндөрлөсөн. Тус УАШТ-ий байлдааны самбо бөхийн эмэгтэйчүүдийн 72 кг-ын жинд хүрэл медаль хүртсэн  Б.Дөлгөөнтуяатай ярилцлаа.

-Оюутны байлдааны самбо бөхийн улсын аваргаас медаль хүртсэнд баяр хүргэе.

     -Баярлалаа.

-Миний дүү өөрийгөө манай уншигчдад танилцуулахгүй юу?

         -Намайг Батхуяг овогтой Дөлгөөнтуяа гэдэг.

-Говь-Алтай аймгийн хүүхэд үү. Улаанбаатар хотод хэдий үеэс амьдарч байгаа вэ?

          -Тийм ээ, би Говь-Алтай аймгийн Тонхил сумд төрж өссөн. Анх оюутан болоод Улаанбаатарт орж ирж байсан. Тэр үеэс хойш Улаанбаатар хотод амьдарч байгаа. Хотын суугуул иргэн болсон.

 -Одоо хэдэн настай вэ, аль сургуульд сурдаг вэ?

         -Одоо би 24 настай. Дотоод хэргийн их сургуулийн Хилийн албаны сургуульд “1+1” хөтөлбөрт суралцаж байгаа. Өмнө нь “Их засаг” олон улсын их сургуулийг эрх зүйч мэргэжилээр төгссөн. Мөн Онцгой байдлын газар ажиллаж байгаа.

–Спортын ямар зэрэг цолтой вэ?

    -Таеквондогийн спортын мастер цолтой. Олон улсын хар бүс нэгдүгээр дантай. Мөн сагсан бөмбөг, чөлөөт бөх гэх зэрэг спортуудын улсын зэрэгтэй тамирчин.

–Таеквондогоор хэдэн настай байх даа хичээллэж эхэлсэн бэ?

      -Таеквондогийн спортоор анх дунд сургуулийн 5-р ангийн сурагч байх үедээ хичээллэж эхлээд 7-р ангид орох жилдээ тэмцээнд орж эхэлсэн.

-Байлдааны самбо бөхөөр хичээллэдэг гэхээр спорт самбо, жүдо бөхөөр барилддаг уу?

         -Тийм ээ, ерөнхий боловсролын дунд сургуулийн сурагч, жаахан хүүхэд байхдаа барилддаг байсан. Харин оюутан болсон тэр цаг үеэс хойш барилдахаа больсон.

-Яагаад охин хүүхэд байж бусад спортоос илүүтэйгээр тулааны спортыг сонирхож хичээлэх болсон юм бэ?

       -Тулааны спорт бол маш том хүндлэл.  Мөн дорно дахины  ард түмний ёс суртахууныг төлөвшүүлж өгдөг. Тамирчин хүнд биеэ авч явах чадвар, бусдыг хүндлэх хүндлэл, тэсвэр тэвчээр, сэтгэл зүйн бэлтгэлжилтийг маш сайн суулгаж өгдөгөөрөө онцлогтой спорт байгаа юм. Таеквондо бол хамгийн цэвэр шүүлттэй спорт энэ нь маш их таалагдсан. Таеквондогийн спорт нь тамирчин хүнд хурд, хүч, тэсрэлтийн мэдрэмжүүдийг суулгадаг.  Орон зайн болон хөдөлгөөний торгон мэдрэмжийг өгдөг. Нэг үгээр хэлвэл таеквондогийн хөлийн цохилтын техникийн гүйцэтгэл нь классик гоёмсог харагддаг байсан нь таеквондогоор хичээллэх сонирхлыг илүүд татсан байх.

 –Тулааны спортын чухам юу нь чамд илүүтэйгээр таалагдсан бэ?

      -Тулааны спорт бол маш том хариуцлага, тэсвэр тэвчээр, хөлс хүч , авхаалж самбаа, зориг шаарддаг спорт юм. Спортоор хичээллэдэг хүмүүсийн ихэнх нь маш том зорилготой, тууштай харилцаа хандлага сайтай байдаг. Тэд хүнийг хүндлэх хайрлах бүх зүйлд сэтгэлээсээ ханддаг нь маш их таалагддаг. Миний хувьд бол спортоор хичээллэж эхэлснээс хойш цаг барьдаг болсон. Хийсэн зүйлээ заавал дуусгадаг, нэг тийм тууштай шинж чанарыг өөрөөсөө мэдэрсэн. Мөн олон, олон хүүхэд, залууст спортоор хичээллэж өөрийгөө олоосой гэж хүсэж байна.

–Тулааны спортоор хичээллэсэн үеэс хойших томоохон амжилтаасаа сонирхуулахгүй юу?

     -Монгол Улсын зургаан удаагийн аварга. Оюутны универсиад их наадмын хошой аварга болж, хос алтан медаль хүртсэн. Таэквондогийн цомын аварга шалгаруулах бүх тэмцээн уралдаанд амжилттай оролцож медальт байрт шалгарч байсан.