Олимпын таеквондогийн насанд хүрэгч, мастер, пара таеквондогийн 2024 оны УАШТ  арванхоёрдугаар сарын 21-22-ны өдрүүдэд Баянгол дүүргийн спорт хороонд амжилттай зохион байгуулагдлаа. Тус УАШТ-ий эмэгтэйчүүдийн 62 кг-ын жинд алтан медаль хүртсэн, Орхон аймаг “Эрдэнэт таеквондо холбоо”-ны тамирчин, ОУХМ Бямбацогтын Сүрэнтэй ярилцлаа.

-Таеквондогийн улсын аварга шалгаруулах тэмцээнээс алтан медаль хүртэж, улсын аварга болсонд баяр хүргэе.

      -Баярлалаа. Танай “ERGELT.MN” сайтын хамт олонд болон нийт уншигчдад энэ өдрийн мэндийг хүргэе.

-Миний дүү өөрийгөө манай уншигчдад танилцуулахгүй юу?

    -Намайг Бямбацогт овогтой Сүрэн гэдэг. Манайх ам бүл тавуулаа. Орхон аймгийн Эрдэнэт хотоп ажиллаж амьдардаг.

-Одоо хэдэн настай вэ,  аль сургуульд сурдаг вэ?

     - Би одоо 23 настай. Их сургуулиа төгсөөд хоёр жил болж байна.Одоогоор хувийн байгууллагад ажиллаж байгаа.

-УАШТ-д хэдэн тулаан хийж алтан медаль хүртэв?

       -Энэ удаагийн улсын аварга шалгаруулах тэмцээнд гурван тулаан хийсэн.

-Хамгийн хүч өрсөлдөгч хэн байсан бэ?

      -Миний тулалдсан өрсөлдөгч нар маань бүгд хүчтэй байсан. Тэд олон жил таеквондогоор хичээллэсэн, туршлагатай өрсөлдөгчид байсан, төдийгүй бүгд багш, дасгалжуулагч нар байлаа.

 -Өмнөх жилүүдийн УАШТ-д ямар амжилт үзүүлж байсан бэ?

        -Би энэ спортоор багаасаа хичээллэж эхэлсэн. Өдийг хүртэл авсан улсын аваргын амжилтыг авч үзвэл УАШТ-ээс долоон алт, дөрвөн мөнгө, дөрвөн хүрэл медаль хүртсэн байна.

-Таеквондогоор хичээллэсэн үеэс хойших томоохон амжилтаасаа сонирхуулахгүй юу?

        -Таеквондогийн  оюутны дэлхийн аваргаас хүрэл медаль, Азийн хүүхдийн их наадмын хүрэл медальтай. Мөн олон улсын тэмцээнээс гурван алт, нэг хүрэл медаль авч байсан. УАШТ-ээс долоон алт, дөрвөн мөнгө, дөрвөн хүрэл медаль хүртсэн байгаа.

 –Ер нь яагаад таеквондогийн спортыг сонгож хичээллэх болсон бэ?

       -Би багадаа их хөдөлгөөнтэй, спортод их дуртай хүүхэд байсан.  Байнга л гүйж харайх зодолдох сонирхолтой байлаа.Тухайн үед манай суманд ганцхан таеквондогийн секц байдаг байсан. Өөр сонголт байхгүй болохоор таеквондогоор хичээллэж эхэлсэн.

-Таеквондогийн спортын чухам юу нь чамд хамгийн ихээр таалагдсан бэ?

          -Таеквондо бол хурд, хүчний гайхамшиг болсон спорт. Тэсвэр, хатуужил хүндлэлээс авахуулаад өөртөө маш их соёл хүмүүжлийг агуулсан спорт гэж боддог.

-Таеквондогийн спортоор хэд дэх жилдээ хичээллэж байгаа вэ?

           -Таеквондогийн спортоор 12 дахь жилдээ хичээллэж байна.

 –Спортын ямар зэрэг цолтой вэ?

        -Таеквондогийн спортын ОУХМ, олон улсын хар бүс, хоёрдугаар дантай, багш, дасгалжуулагч байгаа.

 -Танай жингийн хамгийн хүчтэй өрсөлдөгч ямар тамирчид байна вэ?

       -Жил бүр өрсөлдөгч нар шинэчлэгдэж жингээ сольдог учир, насанд хүрэгчдийн ангиллын  тамирчид хүчтэй өрсөлдөгч нар байдаг.