Киргизстан Улсын Бишкек хотод арваннэгдүгээр сарын 30-аас арванхоёрдугаар сарын 1-ний өдрүүдэд болсон модон барилдааны ДАШТ- болсон билээ. Тус ДАШТ-ий насанд хүрэгчдийн эрэгтэйчүүдийн 80 кг-ын жинд өрсөлдөж дэлхийн аварга болсон Уянгын Нарантогтохтой ярилцлаа. Тэрбээр 2008 онд төрсөн, 111-р сургуулийн сурагч, “Аагий про” клубийн тамирчин юм.

-Модон барилдааны дэлхийн аварга болсонд нь баяр хүргэе.

        -За баярлалаа ах аа.

-Миний дүү өөрийгөө танилцуулахгүй юу?

    -Намайг Уянга овогтой Нарантогтох гэдэг.

-Аль нутгийн хүүхэд вэ. Аав, ээж, гэр бүлээ танилцуулаач?

      -Би Улаанбаатар хотод төрж өссөн. Харин миний ээж Өвөрхангай аймгийн Уянга сумын харьяат. Манайх ам бүл дөрвүүлээ амьдардаг.

-Одоо хэддүгээр сургуулийн, хэддүгээр ангийн сурагч вэ?

         -Би нийслэлийн ерөнхий боловсролын 111-р  дунд сургуулийн 11-ийн “В” ангийн сурагч.

 -Модон барилдаанаас өмнө ямар спортоор хичээллэж байв?

          -Модон барилдааны спортоор хичээллэхээс өмнө өөрийн сонирхол, хоббигоороо турникээр хичээллэдэг байсан.  

 -Яагаад  модон барилдааны спортоор сонирхож хичээллэх болсон бэ?

      - Mas wrestling-ийн спортын бүх зүйл нь надад хамгийн сайхан мэдрэмж өгч , цаашид энэхүү спортоор хичээллэх сонирхол, хүслийг төрүүлсэн.  

 -“Mas wrestling” буюу модон барилдааны спортоор хэд жилдээ хичээллэж байгаа вэ?

       -Би модон барилдааны спортоор одоо гурав дахь жилдээ хичээллэж байгаа.

-Дэлхийн аварга шалгаруулах тэмцээнд ямар  өсвөр үе, залуучуудын ямар насны ангилалд, хэдэн кг-ын жинд оролцож алтан медаль хүртэв?

         -Энэ удаагийн ДАШТ-ий насанд хүрэгчдийн ангиллын 80 кг-ын жинд амжилттай оролцож алтан медаль хүртсэн.

 -Ямар улсын тамирчидтай өрсөлдсөн бэ?

     -Узбекистан, Киргизстан, Казахстан Улсын тамирчидтай өрсөлдсөн. Финал буюу аваргын төлөөх барилдаан хамгийн их өрсөлдөөнтэй ширүүн өрнөсөн.  

-ДАШТ-ээс өмнө ямар тэмцээнүүдэд оролцож, ямар амжилтууд гаргаж байсан бэ?

      -ДАШТ-ий өмнө олон улсын хэмжээний тэмцээнээс алтан медаль авч, Ази тивийн аварга болж байсан. Мөн дотоодын тэмцээнүүдээс дурдвал усын аварга шалгаруулах тэмцээний хошой алтан медальтан медальтай.

-Модон барилдааны спорт гарын хүч, нурууны тамир их шаарддаг уу?

        -Тийм ээ, модон барилдааны спортод хамгийн гол нь нурууны тамир их шаарддаг. Том, жижиг, өргөн нарийн, урт бүдүүн гээд биеийн ерөнхий бүхий л булчинг ажиллуулдаг халз тулааны, хүч тамирын спорт байгаа юм.