Жүдо бөхийн насанд хүрэгчдийн 2018 оны УАШТ-ий 60 кг-ын жинд хэний ч санаанд ороогүй нэгэн бөх түрүүлсэн юм. Тэрбээр өрсөлдөгчдөдөө хоромхон хугацаанд цэвэр ялж, түрүүлэн  алтан медаль авч, “Иппон тропи” шагналыг хүртэж байлаа. Тэр бөх бол “Алдар” спорт хорооны тамирчин Ганхуягийн Мөнхбат байсан юм. Самбо бөхийн Монгол Улсын дөрвөн удаагийн аварга, жүдо бөхийн улсын аварга, ОУХМ Г.Мөнхбаттай ярилцлаа.

Тэрбээр самбо бөхийн насанд хүрэгчдийн дэлхийн цомын алт, мөнгөн медальтай. Азийн аварга шалгаруулах тэмцээний мөнгө, хүрэл медальтай манай улсын шилдэг самбочдын нэг билээ.

- 2024 оны самбо бөхийн ДАШТ-д барилдсан гэсэн. Байлдааны самбо, спорт самбо бөхийн аль төрөлд хэдэн кг-ын жинд барилдсан бэ?

    -2024 оны самбо бөхийн ДАШТ- д спорт самбо бөхийн 64 кг-ын жинд барилдсан.

-Миний дүү өөрийгөө манай уншигчдад танилцуулахгүй юу?

      -Намайг Ганхуягийн Мөнхбат гэдэг.

-Аль аймгийн хүүхэд вэ?

      -Би Сүхбаатар аймгийн Түмэнцогт суманд төрсөн.

 -Жүдо, самбо бөхөөр хэд дэх жилдээ хичээллэж байгаа вэ?

      -Жүдо, самбо бөхийн төрлөөр 16 дахь жилдээ хичээллэж, барилдаж явна даа.

–Спортын ямар зэрэг цолтой вэ?

      -Жүдо бөхийн спортын мастер цолтой. Харин самбо бөхийн Олон улсын хэмжээний мастер цолтой.

     -Яагаад бусад спортоос илүүтэйгээр бөхийн спортыг сонирхон хичээллэх болов?

      -Манай аавын ах нь барилддаг байсан. Тийм болохоор бид сумын хүүхдийн барилдаануудад их ордог байлаа. Өөрсдөө  ч барилдах их сонирхолтой байсан л даа. Анх  намайг гавьяат тамирчин О. Ууганбаатарын дүү О. Ариунбаатар Спортын төв ордонд самбо бөхийн зааланд даагуулж очоод Эрдэнэбат багштай уулзуулж байлаа. Тэр үеэс эхлэн самбо бөхөөр хичээллэх эхлэл тавигдсан.

-Жүдо, самбо бөхийн чухам юу нь чамд илүүтэйгээр таалагдсан бэ?

        -Самбо бөх бол барилдах ухаан, харин жүдо бөх бол хурд тэсрэлтийн гайхамшиг юм. Тийм болохоор энэ гайхамшигтай спортын хоёр төрөлд татагдаж орсон.

-Жүдо бөхийн УАШТ-ий 60 кг-ын жинд түрүүлж байсан. Тэр үед шигшээ багийн тамирчин биш болохоор жүдо бөхийн гран при, гранд слам, Азийн аварга, ДАШТ-д ордоггүй байсан уу?

      -2018 онд жүдо бөхийн УАШТ-д түрүүлж байсан. Мөн тэр жилдээ самбо бөхөөр түлхүү бэлтгэл хийж дэлхийн аваргын тэмцээнд бэлдэж байсан болохоор жүдо бөхийн тэмцээнүүдэд оролцоогүй ээ.

-Жүдо, самбо бөхөөр хичээллэсэн үеэс хойших томоохон амжилтууддаа сонирхуулахгүй юу?

      -Жүдо бөхийн олон улсын “А” зэрэглэлийн тэмцээнээс алт, мөнгө, хүрэл медальтай. Монгол Улсын аварга шалгаруулах тэмцээнд нэг түрүүлсэн. Харин самбо бөхийн насанд хүрэгчдийн Азийн аварга шалгаруулах тэмцээнээс мөнгө, хүрэл медаль хүртэж байсан.  Дэлхийн цомын алт, мөнгөн медальтай. Дэлхийн аварга шалгаруулах тэмцээнд шагналт тавдугаар байрт орж байлаа. Самбо бөхийн Монгол Улсын аварга шалгаруулах тэмцээнд дөрвөн удаа түрүүлсэн.

 -Сэтгэлд тань хоногшин үлдсэн хамгийн сайхан барилдааныг хэзээ хийж байв?

       -Жүдо бөхийн 2018 оны насанд хүрэгчдийн УАШТ-ий  аваргын төлөөх барилдаанд хамгийн хурдан хугацаанд есөн секундэнд өрсөлдөгчөө ялж, “Иппон тропи” шагналыг хүртэж,  Монгол Улсын аварга болж байсан барилдаан байна. Харин самбо бөхөөр сэтгэлд хоногшсон олон барилдаан байгаа. Саяхан гэвэл “Чингис цом” тэмцээний финалын барилдаанд өрсөлдөгч өө “хонгодох” мэхээр цэвэр ялж түрүүлсэн барилдаан их дурсамжтай санагддаг.

 -Өөрийн тань жингийн хамгийн хүчтэй өрсөлдөгч ямар тамирчид байна вэ?

       -Монголын самбо, жүдо бөхийн 60 кг-ын жинд сул өрсөлдөгч гэж байхгүй. Олимп, дэлхийн медальтай олон шилдэг бөхчүүдтэй жин шүү дээ. Тийм болохоор манай жингийн бүх тамирчин л хүчтэй өрсөлдөгчид гэж боддог доо.

 -2025 оны жүдо бөхийн УАШТ-д хэдэн кг-ын жинд барилдах вэ?

     - Шинэ он гараад болох 2025 оны УАШТ-д жүдогийн 60 кг-ын жинд, самбо бөхийн 64 кг-ын жинд барилдах бодолтой байгаа. Намайг дэмждэг гэр бүл, ах дүүс, хамт бэлтгэл хийдэг ах, эгч, дүү, багш нартаа шинэ оны мэнд хүргэе.