Хятадын Ханжоу хотод “HANGZHOU WORLD TAEKWONDO GRAND SLAM YOUT LEAGUE 2024” тэмцээн энэ сарын 22-24-ний өдрүүдэд болж өндөрлөв. Тус их дуулга тэмцээний залуучуудын ангиллын тулааны 48 кг-ын жинд алтан медаль хүртсэн “Эрдэнэт таеквондо холбоо”-ны тамирчин Батсайханы Эрдэнэшагайтай ярилцлаа.

-“Ханжоу-2024” их дуулга тэмцээнээс алтан медаль хүртсэнд баяр хүргэе.

     -Танд их баярлалаа.

-Миний дүү өөрийгөө танилцуулахгүй юу?

     - Намайг Батсайханы Эрдэнэшагай гэдэг. Одоо 16 настай.

-Чухам яагаад таеквондогийн спортыг сонгож хичээллэх болсон бэ?  

      - Анх таеквондогийн тамирчдын уран гоё хөлийн цохилтын техникийг хараад биширч шүтсэн. Мөн тамирчдын бие, биенээ хүндэтгэн, ёсолж байгааг хараад таеквондогоор хичээллэх сэдэл төрсөн.

 -Одоо хэд дэх жилдээ хичээллэж байгаа вэ?

         - Арван настай байх үеэсээ хойш хичээллэж яваа.  Одоо зургаа дахь жилдээ таеквондогоор хичээллэж байна.

-Таеквондогийн спортын ямар зэрэг цолтой тамирчин бэ?

     -Таеквондогийн спортын олон улсын хар бүс, хоёрдугаар дантай. Спортын мастер цолтой.

–Аль сургууль, ямар клубийн тамирчин бэ?

        -Орхон аймгийн Баян-Өндөр сумын ерөнхий боловсролын  4-р дунд сургуулийн сурагч, “Эрдэнэт олимпын таевондогийн холбоо”-ны тамирчин.

-Теэквондогоос өмнө өөр спортын төрлөөр хичээллэж байсан уу?

        -Өөрийн сонирхлыг олох гэж олон төрлийн спортоор хичээллэж  үзсэн. Надад хамгийн их таалагдсан, миний биед тохиромжтой спорт нь таеквондо байсан.

-Энэ удаагийн их дуулга тэмцээнд хэдэн төрөл ангилалд өрсөлдөв?

       - Ганцаарчилсан тулааны төрлөөр 48 кг-ын жинд өрсөлдөж алтан медаль авсан. Мөн багийн тулаанд тулалдаж алтан медаль хүртсэн байгаа.

– “Virtual taekwondo”-гийн тэмцээнд тулалдсан юм уу?

      -Үгүй ээ, “Virtual taekwondo”-гийн төрлөөр нь тэмцээн болоогүй. Энэхүү төрөл шинээр хөгжиж байгаа. Тийм учраас их дуулгын үеэр олон улсын тамирчид хоорондоо тоглож туршлага солилцсон.

-“Virtual taekwondo”-гийн тулааныг хийхэд, хүндрэл, бэрхшээлтэй, хэцүү зүйл нь юу байсан бэ?

       -Ганцхан нүдний хаалт зүүдэг юм билээ.  Шил нь надад таараагүй томдсон болохоор тулалдаж байхад хөдлөөд тогтохгүй байсан.

- “Virtual taekwondo”-д нүдний хаалт шил зүүгээд мэдрэмжээрээ тулалдах нь хэцүү биш  байна уу?

       -Гол нь нүдний шил таарсан байх чухал. Бусдаар бол хэцүү зүйл байгаагүй. Энэ төрөл хувь  хүнээс мэдрэмж, ур чадвар, зөв техник гүйцэтгэл шаардах юм билээ.

–Таэквондогоор өөрийнхөө гаргасан амжилтуудыг танилцуулахгүй юу?

         -2018 онд “Жаргалант-40” аймгийн аварга шалгаруулах тэмцээнээс алтан медаль. 2019 онд хүүхдийн их наадмын сорил тэмцээнээс хүрэл, “Булган цом”-оос хүрэл, Монголын таеквондо холбооны ерөнхийлөгчийн нэрэмжит тэмцээнээс мөнгөн медаль, Бүгд Найрамдах Солонгос Улсын Элчин сайдын нэрэмжит тэмцээнээс алтан медаль авсан. 

2022 онд клубүүдийн аварга шалгаруулах тэмцээнээс алтан медаль, “Бид- Ирээдүйн-Аваргууд” тэмцээнээс алт, "Соёмбо cup"-оос хүрэл, "Шонхор cup"-оос мөнгөн медаль хүртсэн.

2023 онд аймгийн аваргаас мөнгөн медаль, “Эв нэгдэл цом”-ыг тэмцээнээс мөнгө,  БНХАУ зохион байгуулагдсан "SUPER LEAGUE"-ээс хоёр алт, нэг хүрэл, БНХАУ-д зохион багуулагдсан "DATON OPEN" тэмцээнээс гурван алтан медаль, “Ирээдүйн- Одод” тоот дасгалын тэмцээнээс хүрэл медаль, Клубийн хурдан өшиглөлтийн тэмцээнээс хүрэл медаль авч байсан.

2024 онд тоот дасгалын УАШТ-ийн багийн төрлөөс хүрэл медаль, аймгийн аваргаас алт, "TORNODA CUP" тэмцээнээс хүрэл , “Хөвсгөлийн цом”-оос алт, УАШТ-ээс алт, “Эв нэгдэл цом” тэмцээнээс хүрэл, "ULAANBATAR OPEN" тэмцээнээс мөнгө, "DATON OPEN 7th" тэмцээнээс гурван алт, гурван мөнгө, хоёр хүрэл медаль хүртсэн. Монголын хүүхдийн ордны  “Эрдэм” алтан медаль, “Ханжоу-2024” их дуулгын хувийн болон багийн тулааны төрөлд алтан медаль тус тус хүртсэн байгаа.