Хятадын Ханжоу хотод  “WORLD TAEKWONDO GRAND SLAM YOUT LEAGUE 2024” тэмцээн болж өндөрлөв. Тус их дуулга тэмцээний насанд хүрэгчдийн эмэгтэйчүүдийн тулааны 59 кг-ын жинд алтан медаль хүртсэн “Эрдэнэт taekwondo холбоо”-ын тамирчин, хар бүс  хоёрдугаар дантай, ОУХМ Сайндоржийн Энхжинтэй ярилцлаа.

 – TAEKWONDO-гийн дэлхийн гранд слам тэмцээнээс алтан медаль хүртсэнд баяр хүргэе.

    -Баярлалаа.

–Миний дүү өөрийгөө танилцуулахгүй юу?

          –Намайг Сайндорж овогтой Энхжин гэдэг.

–TAEKWONDO-гийн анхны багш нь хэн бэ?

        -Надад TAEKWONDO заасан анхны дасгалжуулагч бол Б.Хосхөлөг багш.

- TAEKWONDO-гийн спортын ямар зэрэг цолтой тамирчин бэ?

      - TAEKWONDO-гийн спортын олон улсын хэмжээний мастер цолтой.

 –Одоо аль сургууль, ямар клубийн тамирчин бэ?

        -Орхон аймаг Баян-Өндөр сумын 1-р дунд сургуулийн арванхоёрдугаар ангид сурдаг. Орхон аймгийн Эрдэнэт хотын “Эрдэнэт таеквондо холбоо”-ны тамирчин.

 - TAEKWONDO-гоос өмнө өөр спортын төрлөөр хичээллэж байсан уу?

         -TAEKWONDO-гийн өмнө өөр спортын төрлөөр хичээллэж байгаагүй.

-Чухам яагаад TAEKWONDO-гийн спорт сонирхлыг чинь татсан бэ?

        -Анх Намуун эгчийн тулааны бичлэгийг үзэж байсан. Намуун эгчийн тэр тулааны бичлэг надад тaekwondo-гийн анхны эерэг маш хүчтэй сэтгэгдлийг өгсөн. Намуун эгч энэ спортын сайхныг илүү тодотгосон, чадварлаг мундаг эмэгтэй юм шиг санагддаг. Тэгээд л тэр эгчээр дамжуулж тaekwondo-гийн спортыг судалж , хайж олоод бүртгүүлж байсан.

–Дэлхийн “гранд слам” их дуулга тэмцээнд хэдэн тойрог тулалдав?

        -Тaekwondo-гийн их дуулга тэмцээнд дөрвөн тойрог тулалдсан.

 -Хамгийн хүнд ширүүн тулааныг ямар улсын тамирчинтай хийсэн бэ?

      -Хамгийн ширүүн тулааныг Хятад Улсын тамирчинтай хийсэн.

–Тaekwondo-гоор өөрийнхөө гаргасан амжилтуудыг танилцуулахгүй юу?

      -Хүүхдийн спортын 7-р их наадмаас мөнгөн медаль хүртэж байсан. Таеквондогийн УАШТ-ээс мөнгө , хошой хүрэл медаль авч байлаа. 2023 онд Хятад Улсад зохиогдсон “China open” тэмцээнээс таван алтан медаль, нэг мөнгө, нэг хүрэл медаль авсан. 2024 онд Хятад Улсад зохиогдсон олон улсын нээлттэй тэмцээнээс найман төрөлд  таван алт, хоёр мөнгө, нэг хүрэл хүртсэн. Мөн 2024 онд Хятад Улсад зохион байгуулагдсан Дэлхийн таеквондогийн холбооны “Grand slam” тэмцээнээс алтан медаль аваад байгаа. Үүнээс гадна аймгийн аварга шалгаруулах тэмцээнээс болон дотоодын тэмцээн, уралдаанаас алт, мөнгө, хүрэл медаль тус тус хүртсэн.

 –Дараагийн хүсэл, мөрөөдөл, зорилт, зорилго юу байна вэ?

       -Таеквондогийн тулааны ур чадвараа илүү ихээр хөгжүүлж, сайжруулах нь хамгийн гол зорилго болж байгаа.