Узбекистан Улсын Ташкент хотод  “ITF” буюу Олон улсын таэквондогийн “Дэлхийн цом”-ын тэмцээн  арваннэгдүгээр сарын 2-8-ны өдрүүдэд болсон билээ.  Энэ удаагийн дэлхийн цомын тэмцээн баг нас, өсвөр үе, залуучууд, насанд хүрэгч болон мастер ангиллаар явагдаж өндөрлөсөн. Дэлхийн цомын тэмцээний өсвөр үеийн охидын тулааны 60 кг-ын жинд алтан медаль хүртсэн Отгонбатын Маралжингоотой ярилцлаа.

-Таэквондогийн дэлхийн цомын аварга болсонд баяр хүргэе.

      -Баялалаа.

 -Энэ удаагийн ДАЦТ-д түлийн төрлөөс гадна өөр ямар төрөлд өрсөлдсөн бэ?

        -Би уг нь түль буюу хөдөлгөөнт тоот дасгалын төрөл, мөн тулааны төрөлд оролцох байсан юм.  Гэтэл техникийн алдаанаас болж түлийн төрөлдөө өрсөлдөж чадаагүй. Тэгээд ганцхан тулааны төрөлд оролцож аварга болсон.

-Миний дүү өөрийгөө танилцуулахгүй юу?

     - Намайг Отгонбатын Маралжингоо гэдэг. Би 13 настай.

 -Танай гэр бүлд спортоор хичээллэдэг өөр хүн бий юу?

    -Манай гэр бүлийнхэн бараг бүгд спортоор хичээллэж байгаа. Манай хоёр дүү болох О.Нямцогт, О.Отгон-Эрдэнэ нар надтай хамт таэквондогоор хичээллэдэг. Бид дэлхийн цомоос нэг алт, хоёр мөнгөн медаль, Ази тивийн аварга шалгаруулах тэмцээнээс хоёр алт, нэг мөнгө, гурван хүрэл медаль хүртсэн. Мөн манай бага дүү Анужингоо “Соробан” сампин буюу түргэн бодолтын тамирчин байгаа юм. Энэ жилийн долдугаар сард Малайз Улсад болсон олон улсын тэмцээнээс мөнгөн цом хүрсэн амжилт гаргасан байгаа.

-Багадаа хэр хөдөлгөөнтэй охин байсан бэ?

     -Би цэцэрлэгт байхаасаа л гүйж, харайх дуртай байсан. 110-р цэцэрлэгийн гүйлтийн аварга болж байлаа. Мөн “Ногоон гэрэл, цагаан шугам” уран хөдөлгөөнт гимнастикийн төрлөөр багаараа дүүрэг, хот, улсдаа амжилт гаргаж байсан.

-Таэквондогийн спортын ямар зэрэг цолтой тамирчин бэ?

   -Би 2024 онд улсын аварга, Ази тивийн аварга, дэлхийн цомын аварга болсон амжилт гаргасан. Эдгээр гурван тэмцээнээс алтан медаль хүртэж Монгол Улсын спортын материйн болзол хангаад байгаа.

-Одоо аль сургууль, ямар клубийн тамирчин бэ?

     -Нийслэлийн СХД-ийн “Өнөр” дунд сургуулийн наймдугаар ангид сурдаг. Олон улсын таэквондогийн Монголын холбооны  “Мөнх хөх сүлд” клубийн тамирчин.

-Таэквондогоос өмнө өөр спортын төрлөөр хичээллэж байсан уу?

      -Таэкдондогоос өмнө өөр спортын  төрлөөр хичээллэж байгаагүй. Харин шатар, даам тоглох, төрөл бүрийн шоо эвлүүлэх сонирхолтой.

-Олон улсын таэквондогийн спортоор хэд дэх жилдээ хичээллэж байгаа вэ?

      -Таэквондогийн спортоор хоёр дүүгийн хамт хичээллээд хоёр жил болох гэж байгаа.  Анх 2023 оны дөрөвдүгээр сард таэквондогоор хичээллэж эхэлсэн.

-Таэквондогийн анхны багш нь хэн бэ?

      - Таэквондогийн анхны багш гэвэл  Аюурзана багш байгаа.  Багш маань одоо Улсын шигшээ багийн ерөнхий дасгалжуулагчаар ажилладаг.

-Манай улсад Өмнөд Солонгосын таэвондо, Хойд Солонгос БНАСАУ-ын таэквондо гэж байдаг. Чухам яагаад Хойд Солонгосын “ITF” олон улсын таэквондо сонирхлыг чинь татсан юм бэ?

     -Яг үнэндээ би анх орохдоо таэквондогийн талаар сайн мэддэггүй байсан. Гэхдээ ер нь Хойд, Өмнөд Солонгосын таэквондогийн аль алинд нь явж болох юм шиг санагдаж байгаа. Дүрэм нь өөр болохоос биш ялгаа байхгүй нэг л улсаас гаралтай, хоёр төрөл шүү дээ.

-Энэ жилийн дэлхийн цомын аваргад хэдэн тойрог өрсөлдөв. Ямар, ямар түль буюу хөдөлгөөнт дасгалыг хийж гүйцэтгэн дэлхийн цомын аварга болсон бэ?

       -Дэлхийн цомын аварга шалгаруулах тэмцээнд би жин өгсөж 60 кг-ын жинд тулааны төрлөөр тулалдсан. Тэгэхээр манай  дээд жингийн өрсөлдөгч нар тийм амар байгаагүй.

  -Олон улсын таэквондогоор өөрийнхөө гаргасан амжилтуудыг танилцуулахгүй юу?

         -Дэлхийн цомын аваргаас нэг алт, Азийн аварга шалгаруулах тэмцээнээс хоёр алт, ОХУ-д болсон олон улсын тэмцээнээс мөнгөн медаль, таэквондогийн улсын аварга шалгаруулах тэмцээнээс алтан медаль хүртэж байсан.

-Дараагийн хүсэл, мөрөөдөл, зорилт, зорилго гэвэл юу байна вэ?

       -Одоо миний ойрын зорилго бол дэлхийн аварга шалгаруулах тэмцээнд амжилттай оролцох, холын зорилго гэвэл олимпын аварга болох.  

-Түль, тэмцээний тулаан, зохиомол тулаан хатуу биет хугалах төрлүүдийн аль төрөлд нь илүү дуртай вэ?

       -Би эдгээр төрлүүдээс түль буюу хөдөлгөөнт тоот дасгалын төрөлд илүү дуртай. Түль нь 19-190 тоот хөпөлгөөнт дасгал байгаа юм. Тамирчнаас ур чадвар, мэдрэмж, үндсэн зогсолт, гар, хөлийн цохилт, хамгаалалт зэрэг техникийн сонгодог гүйцэтгэл, орон зайн мэдрэмж, хөдөлгөөний эвсэл шаарддаг өвөрмөц төрөл.