АНУ-ын  Лас Вегас хотноо жүдо бөхийн  “Гранд мастерс” буюу ахмадын дэлхийн аварга шалгаруулах тэмцээн энэ сарын 4-7-ны өдрүүдэд болсон билээ. Энэхүү тэмцээний дөрөв дэх өдөр буюу сүүлийн өдөр эмэгтэйчүүдийн “F-1” буюу 30-34 насны 63 кг жинд өрсөлдсөн Цагдаагийн ерөнхий газар,  “Хүч” спорт хорооны тамирчин, ОУХМ Цэнд-Аюушийн Цэрэннадмид алтан медаль хүртэж, дэлхийн аварга болсон.

    Энэ удаагийн жүдо бөхийн “Мастерс”-ын дэлхийн аваргад ОУХМ Ц.Цэрэннадмид, өөрийн төрсөн ах “Хүч” спорт хорооны дасгалжуулагч ОУХМ Ц.Очирбатын хамт оролцсон. Ц.Цэрэннадмид дэлхийн аварга болсон бол харин түүний ах ОУХМ Ц.Очирбат “М-5”  буюу 50-54 насны ангиллын  +100 кг-ын жинд мөнгөн медаль хүртсэн.

     Улсын заан Цэнд-Аюушийн охин Цэрэннадмид 1990 оны тавдугаар сарын 8-ны өдөр Улаанбаатар хотод төрсөн. Тэрбээр аав, ах хоёрынхоо адилаар бөхийн самбо, жүдо бөхийн спортыг сонгож хичээллэсэн. Дунд сургуулийн сурагч байх  үедээ самбо бөхийн өсвөр үе, залуучуудын УАШТ-д түрүүлж амжилтын гараагаа амжилттай эхлүүлж байв. Улмаар “Чингис хаан” дэлхийн цомын тэмцээнд түрүүлсэн юм. Түүний дараа 2013 онд “Улаанбаатар” гран пригээс алтан медаль хүртсэн. 2013 онд Азийн аварга шалгаруулах тэмцээнээс хүрэл медаль хүртэж байв. ОУХМ Ц.Цэрэннадмид МУГТ Ц.Мөнхзаяа, МУГТ Б.Мөнхзаяа, ОУХМ Б.Ганхайч нартай нэгэн үед барилдаж явсан. Ц.Цэрэннадмид хоёр жилийн хугацаагаар барилдах эрхээ хасуулж, амжилт гаргах оргил үеэ харамсалтайгаар алдсан юм.

     2016 онд Итали Улсын Ромын нээлттэй тэмцээний аварга болж, Казахстаны Алмата хотод болсон тэмцээнээс мөнгөн медаль авсан. Харин Өмнөд Солонгосын Жежүгийн гран при тэмцээнд амжилттай барилдаж хүрэл медаль авч байлаа. Тус гран пригийн  эхний тойрогт Португалийн Анаг цэвэр ялж, улмаар Өмнөд Солонгосын Сеүлги Кимийг торгуулиар ялсан. Хэсгийн аваргын төлөө, их дуулгын мөнгөн медальт Италийн Эдви Гвендтэй барилдсан юм.

     2014 оны ДАШТ-д Ц.Цэрэннадмид, Эдви Гвендэд торгуулиар хожигдож байв. Харин “Жежү-2014” гран при тэмцээний барилдааны үндсэн цагт тэдний  хэн хэн нь үнэлгээ аваагүй өндөрлөж, нэмэлт цагт Итали жүдоч юүко үнэлгээ авснаар хожсон. Тус гран при тэмцээний дагах барилдаанд Ц.Цэрэннадмид Японы Мегумиг юүко үнэлгээгээр ялж хүрэл медалийн төлөө барилдаанд ОХУ-ын Екатерина Валковаг ялж хүрэл медаль хүртэж  байсан билээ.  2017 онд дэлхийн цагдаа, хүчний байгууллагуудын жүдо бөхийн ДАШТ-ий 63 кг-ын жинд түрүүлж, цагдаагийн дэлхийн аварга болж байв.