АНУ-д Лас Вегас хотноо жүдо бөхийн  “Гранд мастерс” буюу ахмадын дэлхийн аварга шалгаруулах тэмцээн энэ сарын 4-7-ны өдрүүдэд болов. Энэ удаагийн ДАШТ-ий дөрөв дэх өдөр буюу сүүлийн өдөр эрэгтэйчүүдийнн “М-2”, эмэгтэйчүүдийн “F-1”, “F-9”  хүртлэх, ангиллын тамирчид өрсөлдсөн байна. Эрэгтэйчүүдийн “M-2” буюу 35-39 насны 73 кг-ын жинд өрсөлдсөн Орхон аймаг Эрдэнэт хот “Хангарьд” клубийн тамирчин Д.Алтансүх алтан медаль хүртлээ.

         ОУХМ Д.Алтансүх Увс аймгийн Малчин сумын уугуул. Улаангом хотод төрсөн. Түүнийг дунд нэгдүгээр анги төгсдөг жилийн зун тэднийх 1997 онд Эрдэнэт хотод ирсэн байдаг. 2000 онд Бат-Орших багшийн секцэнд орж жүдо бөхөөр хичээллэж эхэлсэн. Жүдо бөхийн Ази тивийн аварга, самбо бөхийн дэлхийн аварга, ОУХМ Довдонгийн Алтансүх 2019 оноос хойш Орхон аймгийн Эрдэнэт хотын “Хангарьд” спорт хороонд жүдо бөхийн дасгалжуулагчаар ажиллаж байгаа.

        Тэрбээр жүдо бөхийн карьертаа 138 барилдаан хийж 90 ялж, 48 удаа хожигдол амссан манай улсын 66 кг-ын жингийн шилдэг жүдочдын нэгэн байлаа. Энэ маш том үзүүлэлт түүнийг хэр шилдэг жүдочин байсан бэ гэдгийг илтгэнэ. Олон улсын жүдо бөхийн холбооны /IJF/ цуврал тэмцээнүүд болох их дуулга, гран при ангиллын тэмцээнүүдээс нэг алт, хоёр мөнгө, найман хүрэл медаль тус тус хүртэж байв.

       ОУЖБХ “IJF”-ийн дэлхийн цомын аварга шалгаруулах тэмцээнээс нэг алт, хоёр мөнгө, хоёр хүрэл медаль хүртсэн. Харин “IJF”-ийн цуврал гран при тэмцээнээс нэг алт, хоёр мөнгө, зургаан хүрэл медальтай. Парис, Токио, Тюмений гранд слам тэмцээнээс хүрэл медаль авч байлаа. 2018 онд Гуанжоугийн “World masters” тэмцээнээс хүрэл медаль хүртсэн. 2016 онд Узбекистан Ташкент хотод болсон жүдо бөхийн ААШТ-д түрүүлж Ази тивийн аварга болсон. Тус Азийн аварга манай монголын баг маш амжилттай оролцож Н.Түвшинбаяр, Д.Сумъяа, Н.Дагвасүрэн, Д.Алтансүх дөрөв Ази тивийн аварга болж байв.

     Өмнөд Солонгост болсон самбо бөхийн 2019 оны насанд хүрэгчдийн ДАШТ-д анх удаа оролцож, эрэгтэйчүүдийн 68 кг-ын жинд алтан медаль хүртэж, дэлхийн аварга болсон. ДАШТ-ий эхний тойрогт Саудын Арабын бөхийг, хоёрдугаар тойрогт Английн бөхийг, гуравдугаар тойрогт Украины бөхийг ялсан.

      Зооны аваргын төлөөх барилдаанд ОХУ-ын хүчтэй өрсөлдөгчийг 4:1-ээр хожиж, алтан медалийн төлөөх барилдаанд Гүржийн бөхөөс унаж шидэх мэхээр дөрвөн оноо авч дэлхийн аваргын алтан медалийг хүртэж байлаа. Тэгвэл харин энэ удаа жүдо бөхийн “Гранд мастерс”-ын ДАШТ-д анх удаа оролцож дэлхийн аварга болоод байна.