АНУ-д Лас Вегас хотноо жүдо бөхийн  “Гранд мастерс” буюу ахмадын дэлхийн аварга шалгаруулах тэмцээн энэ сарын 4-7-ны өдрүүдэд болов. Энэхүү тэмцээний дөрөв дэх өдөр буюу сүүлийн өдөр эрэгтэйчүүдийнн “М-2”, эмэгтэйчүүдийн “F-1”, “F-9”  хүртлэх, ангиллын тамирчид өрсөлдсөн байна. Эмэгтэйчүүдийн “F-4” буюу 45-49 насны +78 кг жинд өрсөлдсөн зэвсэгт хүчний “Алдар” спорт хорооны тамирчин, Жүдо бөхийн  Үндэсний шигшээ багийн дасгалжуулагч МУГТ Д.Цэрэрханд алтан медаль хүртэж “Мастерс”-ын дэлхийн аварга боллоо.

       Монгол Улсын гавьяат тамирчин,самбо бөхийн дэлхийн хошой аварга, Доржготовын Цэрэнханд 1977 оны дөрөвдүгээр сарын 15-ны өдөр Өвөрхангай аймгийн Богд суманд төрсөн. Гавьяат Д.Цэрэнханд “Бээжин-2008” олимпын наадмын тавдугаар байр, ДАШТ-ий долдугаар байр, жүдо бөхийн багийн дэлхийн аваргын мөнгө, самбо бөхийн дэлхийн хошой аварга тамирчин билээ.  “Доха 2006” Азийн наадмын +78 кг-ын жинд мөнгөн медаль, үнэмлэхүй жинд мөнгөн медаль хүртсэн. “Гуаньжоу-2010” Азийн наадмаас хүрэл медаль хүртэж байв. Мөн “Чежү-2003” Азийн аварга шалгаруулах тэмцээнээс хүрэл, “Абу Даби-2011” Ази тивийн аваргаас хүрэл, “Бусан-1997” Зүүн Азийн наадмаас хүрэл, Зүүн Азийн аварга шалгаруулах тэмцээнээс 2006 онд мөнгөн медаль хүртэж байлаа. Жүдо бөхийн УАШТ-ээс 15 алтан медаль хүртэж байсан манай улсын эмэгтэй хүнд жингийн шилдэг тамирчдын нэг юм.

      Тэрбээр Монгол Улсад жүдо, самбо бөхийг үндэслэгч,  жүдо, самбо бөхийн анхны шигшээ багуудын дасгалжуулагч, Монгол Улсын гавъяат дасгалжуулагч Ч. Машбат багшийн ууган шавь юм. 1996-1997 он буюу нийгмийн шилжилтийн хүнд хэцүү он цагийн хэлхээсэнд эмэгтэй олон жүдоч спортоо орхиж хувийн амьдралаа хөөсөн ч тухайн үед Ч.Машбат багшийн анхны шавь нар л бэлтгэлийн зааландаа үлдэж байсан гэдэг.

      Д.Цэрэнханд гавьяат  "Монгол охид" клуб, "Аварга" дээд сургууль, "Алдар" спорт хороогоор овоглож явсан. Жүдо бөхийн ялангуяа эмэгтэйчүүдийн амжилтын талаар дурдахад түүнгүйгээр төсөөлөхөд бэрх. Монголын эмэгтэй жүдо бөхийн анхны тамирчдын нэг, их спортын дэвжээнээ 26 жил хүч, бяр, ухаанаа зориулсан.” Бээжин-2008” олимпын хүрэл медалийн төлөө олимп, дэлхийн аварга Кубын алдарт жүдочин И.Ортизтой барилдаж, шагналт V байр шалгарч байлаа.

      Тэрбээр 2011 оны Парисын дэлхийн аваргын дараа их спортоосоо хөндийрсөн ч 2015 оны улсын аваргын татамид эргэн ирж, 38 насандаа түрүүлж Монгол Улсын аварга цолыг дахин нэг баталж байсан билээ. Харин зодог тайлсны дараа зэвсэгт хүчний “Алдар” спорт хороо, ҮШБ-ийн дасгалжуулагчаар ажиллаж, өөрийн залгамж халаа болсон эмэгтэй хүнд жингийн тамирчдыг амжилттай бэлтгэн гаргасан юм.