Монголын  боксын  54 кг-ын жингийн шилдэг тамирчдын нэгээр нэрлэгдэж явсан ОУХМ Э.Идэрхүүтэй ярилцлаа. Тэрбээр 2008 онд  ОХУ-ын Казань хотод явагдсан оюутны ДАШТ-ний 54 кг-ын жинд мөнгөн медаль хүртэж байв. Тэрбээр ШШГЕГ-ын “Сүлд” спорт хорооны тамирчин байх үедээ 2005, 2006 оны УАШТ-ний мөнгө, хүрэл медальт, 2007 оны 51 кг-ын жингийн түрүүлж, улсын аварга болж байв.

-Оюутны ДАШТ-ээс  мөнгөн медаль хүртэж байсан үеэ эргээд нэг дурсахгүй юу?

     -ОХУ-ын Казань хотод болсон оюутны ДАШТ-ээс шигшээ багийн тамирчид ямар ч байсан медаль хүртэнэ шүү гэсэн зорилготой оролцсон юм. Чухам хэн, хэн ямар медаль хүртэх,  медалийн өнгө хэрхэн хувирах талаар л мэдэхгүй байсан л даа. Өмнөх 2006 онд Казахстанд болсон оюутны ДАШТ-ээс ах нар маань нэг алт, таван хүрэл медаль хүртэж гайхалтай амжилт үзүүлсэн байв. Тэдний энэ амжилтын үр дүн бидэнд урам зориг, эрч хүч оруулсан гэж болно. Тийм болохоор бид ДАШТ-д дайчин, зоригтой шийдмэг тулаануудыг хийж таван медаль хүртэж зорилгоо биелүүлж чадсан.

-Медалийнхаа өнгийг тэр үед хувиргах боломж байв уу?

       -Мэдээж байлгүй яах вэ. Эхлээд медальд хүрэх зорилго тавьж байлаа. Хүрэл медалийн болзол хангасны дараа мөнгөн медаль болгон хувиргах юмсан гэж бодсон. Мөнгөн медаль хүртэх эрхтэй болоод, за одоо алтан медаль болгож хувиргах юм шүү боддог юм билээ. Алтан медалийн төлөөх тулаанд эзэн орон ОХУ-ын боксчинтой таарсан. Нутгийн дэвжээ гэдэг өөр шүү дээ. Оросын хөгжөөн дэмжигчид тамирчнаа их сайн дэмжиж байсан. Хөгжөөн дэмжигчдийнхээ хүчээр ОХУ-ын боксчин ялалтыг авч чадсан.  Бидний тулаан эн тэнцүүхэн явагдаж өндөрлөсөн л дөө. Эхний үед ОХУ-ын боксчин Ильес Каюмовтой 1:1-ийн харьцаагаар тэнцсэн. Хоёрдугаар үеийн тулаанд  5:2-ын харьцаатай оноогоор би ялсан юм. Харин сүүлийн хоёр үеийн тулаанд 5:9, 7:11-ийн харьцаатай оноогоор ОХУ-ын боксчинд ялагдсан. Миний хувьд өөрийн боломж  нөөц, хамаг байдгаа дайчлан шавхаж тулалдсан л даа. Шүүгчид Оросын тамирчинд арай илүү талтай шүүж байгаа байдал ажиглагдсан. Гэхдээ би ялагдсандаа шалтаг хайж байгаа юм биш шүү.  Нутгийн дэвжээ, хөгжөөн дэмжигчид гэдэг агуу юм байна гэдгийг мэдэрсэн шүү.

-Оюутны ДАШТ-д хамгийн хүнд ширүүн тулааныг ямар улсын боксчидтой хийж байв. Ямар улсын шилдэг боксчдыг ялж медалийн болзол хангасан бэ?

     - Оюутны ДАШТ-ий эхний тойрогт гоц мөргөж хийлсэн.  Тэгээд хоёрдугаар тойрогт Туркийн Ридван Будакыг 17:9-ээр, гуравдугаар тойрогт Украины Дмитрий Руденког 13:11-ийн харьцаагаар ялж мөнгөн медалийн болзол хангасан.  Украин, ОХУ-ын боксчидтой хийсэн сүүлийн хоёр тулаан ширүүн өрсөлдөөнтэй хүнд тулаанууд байсан.

-Өөрийн чинь жинд олимпын аварга Э.Бадар-Ууган түрүүлж оюутны дэлхийн аварга цолыг хүртэж байсан байх аа?

        -Тийм ээ,  Казахстанд 2006 онд болсон  оюутны ДАШТ-д олимпын аварга Э.Бадар-Ууган түрүүлж оюутны дэлхийн аварга цолыг хүртэж байсан юм. Тийм болохоор би ч гэсэн их билэгшээсэн.  Бээжингийн олимпын наадамд 2006 оны оюутны дэлхийн аварга болсон гурван боксчин түрүүлж олимпын аварга болж байв. Тэгэхээр оюутны ДАШТ ямар чанар чансаатай тэмцээн болдог байсан нь харагдаж байгаа биз.

-Олимпын аварга Э.Бадар-Ууган та хоёр нэг жингийн тамирчид байсан. Улсын аварга болон бусад тэмцээнүүд дээр хэр олон удаа таарч тулалддаг байсан бэ?

        -Олимпын аварга Э.Бадар-Ууганд 2005 оны улсын аваргын төлөөх тулаанд ялагдаж байсан. Түүнээс хойш өөр тэмцээнд дээр таарч тулалдаагүй. Харин бэлтгэл сургуулилалт дээр байнга тулалддаг байсан. Олимпын аваргын гол бэлтгэл хангагчийн нэг нь би байгаа юм. Ер нь надаас гадна олон тамирчин бий л дээ. Манай 54 кг-ын боксчид бүгд л олимпын аваргын бэлтгэл хангагч болдог. Тийм ч учраас миний амжилтад олимпын аварга Э.Бадар-Ууган нөлөөлсөн.

-Өөрийн тань анхны багш хэн бэ. Хэдэн оноос эхлэн боксын спортоор хичээллэсэн вэ?

      -Надад боксын “А” үсгийг анхлан зааж өгсөн ачтан бол Дорнод аймгийн боксын багш, МУГД Төмөрбатаа байгаа юм.  Би 12 настай байх даа 2001 оноос боксоор хичээллэж эхэлсэн. Хамгийн анх “Олимпын гараа” тэмцээнд 34 кг-ын жинд тулалдаж боксын спортын гараагаа эхэлж байлаа.