Олон улсын жүдо бөхийн холбоо, “IJF”-ийн календарчилсан  төлөвлөгөөнд багтсан жүдо бөхийн “Абу Даби-2024” их дуулга тэмцээн  энэ сарын 11-13-ны өдрүүдэд Арабын Нэгдсэн Эмират Улсын Абу Даби хот болж өндөрлөв. Энэ удаагийн их дуулга тэмцээнд 32 орны эрэгтэй 162, эмэгтэй 72, нийт 234 тамирчин барилдсан. Эхний өдрийн эрэгтэйчүүдийн 60 кг-ын жинд 25 тамирчин барилдаж IJF-ийн нэр дээр барилдсан ОХУ-ын Iznaur SAAEV түрүүлэв. 73 кг-д  АНЭУ-ын нэр дээр барилдаж эхэлсэн ОХУ-ын бөх Makhmadbek MAKHMADBEKOV, 81 кг-д Азербайжаны Zelim TCKAEV алтан медаль хүртсэн. Харин эмэгтэйчүүдийн 48 кг-ын жинд “IJF”-ийн нэр дээр барилдсан ОХУ-ын Marina VOROBEVA ,  57 кг-д Германы Seija BALLHAUS нар алтан медаль тус тус хүртэв.

ЭРЭГТЭЙЧҮҮДИЙН 66 КГ-ЫН ЖИНД Б.ЭРХЭМБАЯР ТАВДУГААР БАЙРТ ОРЛОО

     Эрэгтэйчүүдийн 66 кг-ын жинд 25 жүдочин барилдсан. ОУХМ Баттогтохын Эрхэмбаяр “А” хэсгийг толгойлон нэгдүгээр тойрогт гоц мөргөн ялалт авсан. Хоёрдугаар тойргийн барилдаанд Киперийн Petros CHRISTODOULIDES-ийг ялсан.  “А” хэсгийн аваргын төлөө Азербайжаны Rashad YELKIYEV-ийг цэвэр ялсан юм.

      Улмаар дөрөвний нэгийн шигшээ барилдаанд Францын BOUBA Daikii-д цэвэр ялагдсан , Хүрэл медалийн төлөөх барилдаанд Тажикстаны Obid DZHEBOV-т ялагдаж шагналт тавдугаар байрт орлоо.

ЭМЭГТЭЙЧҮҮДИЙН 52 КГ-ЫН ЖИНД  Б.ХОРЛООДОЙ АЛТ, Л.СОСОРБАРАМ МӨНГӨН МЕДАЛЬ ХҮРТЭВ

      Эмэгтэйчүүдийн 52 кг-ын жинд есөн бөх барилдсан. Тус жингийн “А” хэсгийг ОУХМ Лхагвасүрэнгийн Сосорбарам тэргүүлэн барилдсан юм. Тэрбээр нэгдүгээр тойрогт гоц мөргөн ялалт авсан. Хоёрдугаар тойрогт “А” хэсгийн аваргын төлөөх барилдаанд  Бразилийн амаргүй өрсөлдөгч Amanda LIMA-г буулган авсан.

    Дөрөвний нэгийн шигшээ барилдаанд Унгарын Roza GYERTYAS-ыг ялж, шигшээ финалын барилдаанд шалгарч үлдсэн юм. Финалын барилдаанд алтан медалийн төлөө АНЭУ-ын нэр дээр барилдаж буй нутаг нэгт Б.Хорлоодойтой таарч барилдан нэмэлт цагт ялагдал хүлээн, “Абу Даби-2024” гранд сламаас мөнгөн медаль хүртлээ.

       Энэ жингийн “С” хэсгийн нэгдүгээр тойрогт АНЭУ-ын нэр дээр барилдаж буй ОУХМ Бишрэлтийн Хорлоодой гоц мөргөн ялалт авсан байгаа. Хоёрдугаар тойрогт Бразилын Gabriela CONCEICAO-той “С” хэсгийн аваргын төлөө барилдаж ялсан. Улмаар дөрөвний нэгийн шигшээ барилдаанд Косовогийн Erza MUMINOVIQ-г ялж финалын барилдаанд шалгарч үлдсэн. Финалын барилдаанд ОУХМ Л.Сосорбарамын ялж, “Абу Даби-2024” их дуулгаас алтан медаль хүртлээ.