Боксын спортыг хамгийн булхай, луйвар ихтэй спорт гэж ярьдаг. Боксын шүүгчид тэнцүүхэн тулаанд үзэмжээр шүүх гээд байдаг тал байдаг. Олимп, дэлхийн аваргын медалийн төлөөх шийдвэрлэх тулаанд ядуу буурай орны шилдэг боксчдын оноог дарж, илт ялалтыг нь луйвардах нь бий. Эн тэнцүү тулаанд тэмцээн зохион байгуулагч эзэн орны талд эсвэл арай том гүрний тамирчинд ялалт дарах тохиолдол мэр, сэр байсаар байгаа. Тийм ч учраас Олон улсын олимпын хороо 2028 оны олимпын наадмаас боксын төрлийг хасах асуудлыг хөндөж яриад эхэлсэн.

        Боксын өсвөр үе, залуучуудын ДАШТ-ий хүрэл медальт, дэлхийн цомын хошой аварга, ОУХМ  Монхорын Намуун бол дэлхийн зэрэглэлийн өндөр ур чадвартай тамирчин. Түүний ДАШТ-ээс медаль хүртэх боломжийг “AIBA”-ийн шүүгчид үгүй хийсэн гэдэгтэй бокс сонирхогчид санал нийлэх байх.

           Боксын насанд хүрэгчдийн эмэгтэйчүүдийн 2022 оны  ДАШТ Турк Улсын Истанбул хотод болсон билээ. Тус ДАШТ-ий 57 кг-ын жинд, “Хангарьд” спорт хороо, Боксын Үндэсний шигшээ багийн тамирчин, ОУХМ  Монхорын Намуун хүрэл медалийн төлөөх тулааныг Энэтхэгийн Манишатай  тэнцүүхэн, ширүүн өрсөлдөөнийг өрнүүлж, шүүгчдийн саналаар ялагдал хүлээн тавдугаар байрт орсон. Тус тулааны эхний үед 3:2-оор Маниша ялсан. Харин хоёрдугаар үед М.Намуун 4:1-ээр илүүрхсэн. Тэгвэл гуравдугаар үе эн тэнцүү өрнөсөн  байхад 4:1-ээр Энэтхэг боксчинг ялуулсан юм. М.Намуун өсвөр үе, залуучуудын ДАШТ-ий хүрэл медальтай бөгөөд Энэтхэгийн боксчинг ялсан бол өсвөр үе, залуучууд, насанд хүрэгчдийн ангилалд медаль авсан Монголын анхны боксчин болох байсан билээ.

       Саяхан боксын дэлхийн цомын тэмцээн “Улаанбаатар 2024” болж өндөрлөсөн. Тус тэмцээний эмэгтэйчүүдийн 60 кг-ын жинд ОУХМ М.Намуун, Япон Улсын боксчин Ёшизава Сацүкиг ялж, дэлхийн цомын хошой аварга болсон.  Тэрбээр 2023 онд Герман Улсын Кёльон хотод болсон боксын дэлхийн цомын тэмцээний эмэгтэйчүүдийн 60 кг-ын жинд алтан медаль хүртэж байв. Тус дэлхийн цомын тэмцээнд М.Намуун нийт дөрвөн тулаан хийж алтан медаль хүртсэн. Шведийн туршлагатай тамирчин Агнес Софиатай хагас шигшээд өрсөлдөөнтэй тулаан хийж ялалт авч байсан юм.

       Тамирчин хүнд уналт, сэргэлт, ялалт, ялагдал байлгүй яах вэ. М.Намуун алдаа, дутагдал дээрээ дүгнэлт хийгээд засахыг хичээж яваа боксчин. Зарим алдаагаа засаад л явж  байгаа. Тэмцээнээс тэмцээний хооронд алдаа дутагдалаа засахыг хичээж байгаа нь сайшаалтай зүйл юм .

        Тэрбээр анх өсвөр үе, залуучуудын ДАШТ-ээс медаль хүртээд, эрч хүчтэй гарч ирж байсан.    Тэр үеийнхээ талаар ярихдаа М.Намуун “Миний хувьд анх хүсэл тэмүүлэл дүүрэн, өөртөө маш итгэлтэй, ёстой л галзуу барын аманд гараа хийхээс буцахгүй тулалддаг байлаа.  Хэний, хэнтэй ч үзнэ гэж боддог байсан. Омголон ч гэх юм уу. Их дэврүүн Намуун тэр үед гарч ирж байсан юм уу гэж одоо боддог. Тэгээд насны ангилал ч өсөөд, жин ч өгсөөд туршлагатай тамирчдад ялагдаад, ёстой л хандаа хага даруулсан даа. Зөвхөн өөртөө итгэлтэй, техниктэй байлаа гээд өрсөлдөгчөө ялж, амжилт гаргадаггүй юм байна гэж боддог болсон. Зөв тактик, сэтгэл зүй, мэдрэмж, бэлтгэлжилт, сахилга бат зэрэг мэргэжлийн тамирчинд заавал байх ёстой, ур чадваруудад суралцах ёстойг ойлгосон.

        Мэдээж энэ бүгдийг тэмцээнээс тэмцээнд, тулаанаас тулаанд туршлага сууж, олж авах хэрэгтэй юм байна лээ. Миний хувьд одоо ч зарим чадварт суралцаад л явж байна. Анх гарч ирж байсан Намуунтай харьцуулах юм бол одоо илүү туршлагатай, хашир тамирчин бий болсон  гэж боддог. Аварга болох эсвэл олимп, ДАШТ-ээс медаль авах цаг нь болоогүй юм байлгүй. Бүх зүйлийн тохироо бүрдсэн цагт, би дэлхийн медаль авах л болно гэж боддог. Би дэлхий аваргаас медаль авахгүй л байна гэдэг болоогүй л байна гэсэн үг. Миний цаг хугацаа биш л байсан байх. Би тэр хэмжээнд хүрэхэд дутуу байна л гэсэн үг шүү дээ. Харин юу дутуу байгаагаа, олж мэдээд дараагийн тэмцээндээ нэмж сайжруулаад явах юм бол, нэг л өдөр миний цаг ирнэ байх гэж найддаг. Манай багш хэлдэг юм “Нэг л өдөр заавал чиний цаг ирнэ. Тууштай хөдөлмөрлөөд л бай. Бурхан заавал чамайг харж, хэзээ нэгэн цагт шагнах болно гэж хэлдэг. Харин тэр цаг үеийг тууштай хүлээж чадах уу, үгүй юу гэдэг миний сонголт юм уу даа” хэмээн хариулсан нь бий.