Олон улсын жүдо бөхийн холбоо, “IJF”-ийн календарчилсан  төлөвлөгөөнд багтсан жүдо бөхийн “Абу Даби-2024” их дуулга тэмцээн  энэ сарын 11-13-ны өдрүүдэд Арабын Нэгдсэн Эмират Улсын Абу Даби хот болно. Энэ удаагийн их дуулга тэмцээнд 32 орны эрэгтэй 162, эмэгтэй 72, нийт 234 тамирчин барилдах мэдүүлгийг одоогоор өгөөд байна. Эрэгтэйчүүдийн 60 кг-ын жинд 25, 66 кг-ын жинд 25, 73 кг-д 33, 81 кг-д 23, 90 кг-д 21, -100 кг-д 15, +100 кг-ын жинд 20 жүдочин барилдах мэдүүлэг өгчээ. Харин эмэгтэйчүүдийн 48 кг-ын жинд ес, 52 кг-д ес, 57 кг-д 15, 63 кг-д 16, 70 кг-д ес, -78 кг-д зургаа, +78 кг-ын жинд найман тамирчин барилдах мэдүүлэг өгөөд байна. Шилдэг жүдочид барилдах зарим нэг жинг онцлон танилцуулъя.

ЭРЭГТЭЙЧҮҮДИЙН 66 КГ-Д Б.ЭРХЭМБАЯР БАРИЛДАНА

      Манай улсаас эрэгтэйчүүдийн 66 кг-ын жинд 25 тамирчин барилдах мэдүүлэг өгөөд байгаа. Энэ жинд ОУХМ Баттогтохын Эрхэмбаяр тэргүүлэн барилдана. Тус жинд Узбекистаны Mukhriddin TILOVOV, Тажикстаны Obid DZHEBOV, Францын Daikii BOUBA, Японы Takeshi TAKEOKA, ОХУ-ын Murad CHOPANOV, АНЭУ-ын Баянмөнхийн Нармандах нарын шилдгүүд барилдана.

ЭМЭГТЭЙЧҮҮДИЙН 52 КГ-Д Л.СОСОРБАРАМ ХҮЧ СОРИНО

     Эмэгтэйчүүдийн 52 кг-ын жинд есөн жүдочин барилдах мэдүүлэг өгөөд байгаа. Энэ жингийн бөхчүүдийг манай улсын тамирчин ОУХМ Лхагвасүрэнгийн Сосорбарам тэргүүлэн барилдах юм. Тус жингийн хоёрдугаарт АНЭУ-ын нэр дээр барилдаж буй ОУХМ Бишрэлтийн Хорлоодой эрэмбэлэгджээ. Энэ жинд Л.Сосорбарам, Б.Хорлоодой, Францын Astride GNETO, Lea METROT, Бразилын  Amanda LIMA нарын шилдгүүд байна.

АЗЕРБАЙЖАНЫ  AGHAYEY BALABAY 60 КГ-ЫГ ТОЛГОЙЛОН БАРИЛДАНА

     Эрэгтэйчүүдийн 60 кг-ын жинд 25 тамирчин барилдах мэдүүлэг өгсөн байна. Манай улсаас энэ жинд бөх барилдахгүй. Тус жинд Азербайжаны AGHAYEV Balabay, Францын Cedric REVOL, Казахстаны  SHAMSHADIN Magzhan, Нидерландын Emiel JARING, Узбекистаны Kamoliddin  BAKHTIYOROV, ОХУ-ын  Gamzat ZAIRBEKOV,  Iznaur SAAEV, Гүржийн Luka MODEBADZE нарын шилдгүүд барилдах юм.

ОРОСЫН TAMERLAN BASHAEV +100 КГ-Д ХҮЧ СОРИНО

      Эрэгтэйчүүдийн +100 кг-ын жинд 20 тамирчин барилдах мэдүүлэг өгсөн байгаа. Манай улсаас тус жинд бөх барилдахгүй. Харин ОХУ-ын Tamerlan BASHAEV , Азербайжаны Ushangi KOKAURI, Узбекистаны Utkirbek TUROBOYEV, Францын Tieman DIABY,  Khamzat  SAPARBAEV, Нидерландын Jelle SNIPPE, Jur SPIJKERS, Германы Jonas SCHREIBER, Marvin BELZ нар шилгүүд хүч сонирно.

КАЗАХСТАНЫ  ABIBA ABUZHAKYNOVA 48 КГ-ЫГ ТЭРГҮҮЛЭН БАРИЛДАНА

     Эмэгтэйчүүдийн 48 кг-ын жинд есөн жүдочин барилдах мэдүүлэг өгсөн байгаа. Энэ жинд Казахстаны Abiba ABUZHAKYNOVA, Францын Melanie LEGOUX CLEMENT,  Laura ESPADINHA,  ОХУ-ын Sabina GILIAZOVA,  Сербийн Andrea STOJADINOV нарын шилдгүүд өрсөлдөнө.