Жүдо бөхийн залуучуудын ДАШТ аравдугаар сарын 2-6-ны өдрүүдэд Тажикистан Улсын  нийслэл Душанбе хотноо зохиогдоно.  Энэ жилийн ДАШТ-д 67 орны эрэгтэй 292, эмэгтэй 247, нийт 539 тамирчин өрсөлдөхөөр мэдүүлгээ өгөөд байна. Манай улсаас зургаан эрэгтэй, найман эмэгтэй, нийт 14 тамирчны бүрэлдэхүүнтэй оролцох юм. Тэмцээний нийт шагналын сан 99.800 евро бөгөөд хувийн төрөлд алтан медаль хүртэгсэд 500, мөнгөн медалийн эзэд 300, хүрэл медаль хүртвэл 170 еврогийн шагнал авна. Харин багийн тэмцээний аваргууд 8000, мөнгөн медалийн эзэд 5600, хүрэл медальтнууд 3200 еврогийн шагнал авах аж. Залуучуудын ДАШТ 1974 оноос эхлэн зохиогдож эхэлсэн бөгөөд өнгөрсөн хугацаанд манай бөхчүүд хоёр алт, долоон мөнгө, найман хүрэл медаль хүртэж байв.

ЗАЛУУЧУУДЫН ДЭЛХИЙН АВАРГА Ө.ДҮҮРЭНБАЯР

       Жүдо бөхийн насанд хүрэгчдийн ДАШТ-ий хүрэл медальт, Монгол Улсын гавьяат тамирчин Өлзийбаярын Дүүрэнбаяр. Тэрбээр 2014 онд  АНУ-ын Лодердейл хотноо болсон залуучуудын дэлхийн аварга шалгаруулах тэмцээний эрэгтэйчүүдийн  +100 кг-ын жинд алтан медаль хүртэж, залуучуудын дэлхийн аварга  болсон.

ЗАЛУУЧУУДЫН ДЭЛХИЙН АВАРГА Л.СОСОРБАРАМ

       Залуучуудын олимпын мөнгөн медальт ОУХМ  Лхагвасүрэнгийн Сосорбарам. Тэрбээр 2019 онд Морокко Улсын Мараккеш болсон жүдо бөхийн дэлхийн залуучуудын  ДАШТ-ий эмэгтэйчүүдийн  52 кг-ын жинд алтан медаль хүртэж, залуучуудын дэлхийн аварга болсон.

ЗАЛУУЧУУДЫН ДЭЛХИЙН АВАРГЫН ХОШОЙ МӨНГӨН МЕДАЛЬТ Ц.ЦОГТБААТАР

      “Токио-2020” олимпын хүрэл медальт, насанд хүрэгчдийн дэлхийн аварга, Монгол Улсын гавьяат тамирчин Цэнд-Очирын Цогтбаатар. Тэрбээр 2014 онд АНУ-ын Флорида мужийн Лодердейл хотноо жүдо бөхийн залуучуудын ДАШТ-ий эрэгтэйчүүдийн 60 кг-ын жинд бхрилдаж мөнгөн медаль авч байлаа. Түүний дараа жил 2015 онд АНЭУ-ын Абу Даби хотод болсон жүдо бөхийн залуучуудын ДАШТ-ий эрэгтэйчүүдийн 60 кг-ын жинд мөнгөн медаль хүртсэн.

ЗАЛУУЧУУДЫН ДЭЛХИЙН АВАРГЫН МӨНГӨН МЕДАЛЬТ Л.ЭНХРИЙЛЭН

        Жүдо бөхийн насанд хүрэгчдийн ДАШТ-ий хошой хүрэл медальт, Монгол Улсын гавьяат тамирчин Лхагватогоогийн Энхрийлэн. Тэрбээр 2017 онд Хорват Улсын Загреб хотноо болсон залуучуудын ДАШТ тэмцээний эмэгтэйчүүдийн 57 кг-ын жинд мөнгөн медаль хүртэж байлаа.

ЗАЛУУЧУУДЫН ДЭЛХИЙН АВАРГЫН ХОШОЙ МӨНГӨН МЕДАЛЬТ Д.ТӨМӨРХҮЛЭГ

        Монгол Улсын гавьяат тамирчин Даваадоржийн Төмөрхүлэг. Тэрбээр  2008 онд Тайланд Улсын Бангкок хотод болсон залуучуудын ДАШТ-ий эрэгтэйчүүдийн 60 кг-ын жинд мөнгөн медаль авч байлаа. Түүний дараа жил  2009 онд Франц Улсын Парис хотод болсон жүдо бөхийн залуучуудын дэлхийн аварга шалгаруулах тэмцээнээс мөнгөн медаль хүртсэн.

ЗАЛУУЧУУДЫН ДЭЛХИЙН АВАРГЫН МӨНГӨН МЕДАЛЬТ Ц.НАРАНЖАРГАЛ

        Жүдо бөхийн насанд хүрэгчдийн Ази тивийн аварга, ОУХМ  Цэнд-Аюушийн Наранжаргал. Тэрбээр 2011 онд Өмнөд Африкийн Кейптаун хотноо болсон залуучуудын ДАШТ-ий эмэгтэйчүүдийн 70 кг-ын жинд мөнгөн медаль хүртсэн.

ЗАЛУУЧУУДЫН ДЭЛХИЙН АВАРГЫН ХҮРЭЛ МЕДАЛЬТ Б.МӨНГӨНЧИМЭГ

       Жүдо бөхийн насанд хүрэгчдийн ДАШТ-ий хүрэл медальт, Монгол Улсын гавьяат тамирчин Балдоржийн Мөнгөнчимэг. Тэрбээр 2013 онд Словен Улсын Лябляна хотод болсон залуучуудын ДАШТ-ий эмэгтэйчүүдийн 63 кг-ын жинд хүрэл медаль хүртсэн.

ЗАЛУУЧУУДЫН ДЭЛХИЙН АВАРГЫН ХҮРЭЛ МЕДАЛЬТ Б.ТЭМҮҮЛЭН

        Жүдо бөхийн гран при, гранд слам тэмцээний аварга ОУХМ Баттулгын Тэмүүлэн. Тэрбээр 2008 онд Тайланд Улсын Бангкок хотод болсон залуучуудын ДАШТ-ий эрэгтэйчүүдийн -100 кг-ын жинд хүрэл медаль авч байлаа.

ЗАЛУУЧУУДЫН ДЭЛХИЙН АВАРГЫН ХҮРЭЛ МЕДАЛЬТ Г.НАРАНЦЭЦЭГ

        2015 онд АНЭУ-ын Абу Даби хотод болсон жүдо бөхийн залуучуудын ДАШТ-ий эхний эмэгтэйчүүдийн 44 кг-ын жинд ОУХМ Ганбаатарын Наранцэцэг хүрэл медалийг хүртсэн. Тэрбээр хүрэл медалийн төлөөх барилдаанд Туркийн Тугбаг юүко үнэлгээгээр ялснаар залуучуудын дэлхийн аваргаас анхны медалиа хүртэж байв.

ЗАЛУУЧУУДЫН ДЭЛХИЙН АВАРГЫН  ХОШОЙ ХҮРЭЛ МЕДАЛЬТ Б.АМАРТҮВШИН

        Жүдо бөхийн өсвөр үеийн ДАШТ-ий хүрэл медальт ОУХМ Баяраагийн Амартүвшин. Тэрбээр 2014 онд АНУ-ын Флорида мужийн Лодердейл хотноо болсон жүдо бөхийн залуучуудын ДАШТ-ий эрэгтэйчүүдийн 55 кг-ын жинд барилдаж хүрэл медаль авч байлаа. Түүний дараа жил 2015 онд АНЭУ-ын Абу Даби хотод болсон жүдо бөхийн залуучуудын ДАШТ-ий эрэгтэйчүүдийн 55 кг-ын жинд хүрэл медаль хүртсэн.

ЗАЛУУЧУУДЫН ДЭЛХИЙН АВАРГЫН  ХҮРЭЛ МЕДАЛЬТ Л.ӨНӨБОЛД

        Жүдо бөхийн “Екатеринбург 2017” их дуулгын аварга, ОУХМ Лхагважамцын Өнөболд. Тэрбээр 2017 онд Хорват Улсын Загреб хотноо болсон залуучуудын ДАШТ-ий эрэгтэйчүүдийн 55 кг-ын жинд хүрэл медаль хүртсэн. Л.Өнөболд эхний тойрогт Тунесийн Аяари Мохаммедийг хоёр базари үнэлгээгээр ялсан. Дараагийн тойрогт өсвөр үеийн ААШТ-ий хүрэл медальт Киргизстаны Айбек Улу Кубаничбекийг вазари үнэлгээгээр хожсон.

     Хэсгийн аваргын төлөөх барилдаанд Гүржийн Папинашвили Жабаг ялж цэвэр ялагдснаар дагах барилдаан хийсэн. Тус барилдаанд ОХУ-ын Исаев Адамдыг базари үнэлгээгээр ялсан. Хүрэл медалийн төлөөх барилдаанд Гүржийн Ниниашвили Ваног цэвэр ялж залуучуудын ДАШТ-ээс хүрэл медаль авч байлаа. 

ЗАЛУУЧУУДЫН ДЭЛХИЙН АВАРГЫН  ХҮРЭЛ МЕДАЛЬТ Ж.АМАРБОЛД

        2017 онд Хорват Улсын Загреб хотноо болсон залуучуудын ДАШТ-ий эрэгтэйчүүдийн 60 кг-д  Жагваралдоржийн .Амарболд хүрэл медаль хүртсэн. Тэрбээр 60 кг-ын “А” хэсэгт барилдаж Туркийн Аккус, Узбекистаны Амандавлатов, Маракогийн Уммани нарыг ялаад хэсгийн аваргын төлөө Азербайжаны Крамат Хусеновд хожигдсон юм. Дагах тойрогт Белгийн Ез Зеррардыг хожиж хүрэл медалийн төлөө Бразилийн Пеннаг ялсан .

ЗАЛУУЧУУДЫН ДЭЛХИЙН АВАРГЫН  ХҮРЭЛ МЕДАЛЬТ Г.БАТТУЛГА

        2014 онд АНУ-ын Флорида мужийн Лодердейл хотноо болсон жүдо бөхийн залуучуудын ДАШТ болсон. Тус ДАШТ-ий эрэгтэйчүүдийн 55 кг-ын жинд барилдсан Ганбаатарын Баттулга барилдаж хүрэл медаль авч байлаа.