Францын нийслэл Парис хотод зуны олимпын 33-р наадам, паралимпын 17-р наадам болж өндөрлөсөн билээ.  Монгол Улсын баг тамирчид олимпын наадмаас нэг мөнгөн медаль хүртсэнээр 204 орноос 74 дүгээр байр эзэлсэн. Харин паралимпын наадмаас нэг алт, гурван мөнгөн медаль хүртсэнээр 170 орноос 57 дугаар байр эзэлсэн билээ. “Парис-2024” зуны паралимпын 17-р наадмын пара хөнгөн атлетикийн бөөрөнцөг түлхэлтийн төрөлд Монголын шигшээ багийн тамирчин Цэгмидийн Баттулга “ F40” ангилалд өрсөлдсөн. Тус бөөрөнцөг түлхэлтийн төрөлд есөн тамирчин оролцсоноос Ц.Баттулга 11.9 метр түлхэж мөнгөн медаль хүртсэн . Ийнхүү тэрбээр  паралимпын хөнгөн атлетикийн бөөрөнцөг түлхэлтийн төрөлд медаль авсан анхны монгол хүн болсон билээ. 

ЦЭГМИДИЙН БАТТУЛГЫН ТОВЧ НАМТАР

Цэгмидийн Баттулга 1991 онд Булган аймгийн Булганд суманд төрсөн. 1999-2009 онд Булган аймгийн Булган сумын Арван жилийн хоёрдугаар дунд сургуулийг, 2009-2012 онд Анагаахын шинжлэх ухааны үндэсний их сургуулийн Сувилахуйн сургуулийг Нүүр амны техникч мэргэжил эзэмшин төгссөн. 2012-2017 онд АУҮИС-ийн Нүүр ам судлалын сургуулийг шүдний эмч, резидент эмчээр төгссөн. Одоо Булган аймгийн Нэгдсэн эмнэлэгт шүдний эмчээр ажилладаг.

 ДОТООДЫН ТЭМЦЭЭНД  ГАРГАСАН АМЖИЛТУУД

Ц.Баттулга 2013 онд пара хөнгөн атлетикийн улсын аварга шалгаруулах тэмцээний бөөрөнцөг түлхэлт, жад шидэлтийн төрөлд түрүүлж, алтан медаль хүртэж амжилтын гараагаа эхлүүлсэн. Улмаар 2014, 2015 оны пара хөнгөн атлетикийн УАШТ-ээс алтан медаль, 2016 онд Монголын бүх ард түмний наадмаас алтан медаль хүртсэн.

Харин 2017 онд УАШТ-ээс мөнгөн медаль авсан. 2018 онд УАШТ-д бөөрөнцөг түлхэлт, зээрэнцэг шидэлтээр түрүүлж алтан медаль хүртсэн юм. 2019, 2020, 2021 онуудад ковидын улмаас пара хөнгөн атлетикийн УАШТ зохион байгуулагдаагүй. 2022 онд Монголын бүх ард түмний их наадмын бөөрөнцөг түлхэлт, зээрэнцэг шидэлтийн төрөлд алтан медаль хүртсэн. 2023 онд УАШТ-ээс алтан медаль хүртсэн амжилтыг гаргасан юм.

ОЛОН УЛС, ТИВ, ДЭЛХИЙН ТЭМЦЭЭНИЙ АМЖИЛТУУД

2014 онд Хятадын Бээжин хотод болсон пара хөнгөн атлетикийн олон улсын гран при тэмцээнээс зээрэнцэг шидэлтийн төрөлд алт медаль, бөөрөнцөг түлхэлийн төрөлд алтан медаль авсан. Мөн ондоо Өмнөд Солонгосын Инчион хотод зохион байгуулагдсан “Инчион-2014” Азийн паралимпын наадмын бөөрөнцөг түлхэл, зээрэнцэг шидэлтийн төрөлд шагналт дөрөвдүгээр байрт шалгарсан. 2015 онд ОХУ-ын Бүх Орос Улсын пара хөнгөн атлетикийн аварга шалгаруулах тэмцээний бөөрөнцөг түлхэлтий төрлөөс мөнгөн медаль авсан.

2014, 2015 онд пара хөнгөн атлетикийн ДАШТ-ий бөөрөнцөг түлхэлтийн төрөлд шагналт 7-8-р  байрт шалгарсан. 2023 онд Итали Улсын Жесоло хотод болсон олон улсын гран дри тэмцээний бөөрөнцөг түлхэлтийн төрөлд гуравдугаар байрт шалгарч хүрэл медаль хүртсэн. 2023 он Хятадын Ханжоу хотод зохион байгуулагдсан  “Ханжоу-2022”  Азийн паралимпын наадмаас хүрэл медаль авсан бөгөөд 2015, 2024 оны пара хөнгөн атлетикийн ДАШТ-д наймдугаар байр эзэлж байв.

 “Ханжоу-2022” Азийн пара спортын наадмын хөнгөн атлетикийн бөөрөнцөг түлхэлтийн “F40” ангилалд найман орны тамирчин хүч үзсэн юм. Ц.Баттулга 9.74 метр түлхэж, Азийн зуны пара наадмын бөөрөнцөг түлхэлтийн төрөлд хүрэл медаль хүртсэн анхны монгол эрэгтэй тамирчин болсон. Ингэхдээ улсын дээд амжилтыг шинэчилсэн юм.