Чөлөөт бөхийн олимпын бус жингийн дэлхийн аварга шалгаруулах тэмцээн Албани Улсын Тирана хотод аравдугаар сарын 28-31-ний өдрүүдэд  болох юм. Тус ДАШТ-д Монгол Улсаа төлөөлөн өрсөлдөх тамирчдыг сонгон шалгаруулах сорил тэмцээн өчигдөр Спортын төв ордны “А” зааланд боллоо. ДАШТ-ий сорилын эмэгтэйчүүдийн 55 кг-ын жинд “Дархан Хасу”-гийн Г.Цовоо, “Төгс” дэвжээний Н.Түмэнбэмбэрэл, “Алдар”-ын Ч.Отгонтуяа, Б.Отгонтуяа, Б.Дөлгөөн нарын шилдэг тамирчид хүч сорив. Мөн 65 кг-ын жинд “Хилчин” спорт хорооны тамирчин, ДАШТ-ий мөнгөн медальт, ОУХМ Э.Гантуяа, “Алдар” спорт хорооны Н.Нархажид, Т.Энхжин, “Дархан Хасу”-гийн Б.Ганцэцэг, “Төв-Арж” клубийн Э.Одгэрэл нар барилдлаа.

          Эмэгтэйчүүдийн 72 кг-ын жингийн сорилд Спортын төв сургуулийн О.Цэлмүүн, “Алдар” спорт хорооны Д.Цогзолмаа, П.Номин-Эрдэнэ, Б.Найдансүрэн, “Хилчин” спорт хорооны тамирчин Азийн аварга З.Болортунгалаг нар өрсөлдсөн юм. Эмэгтэйчүүдийн 59 кг-ын жинд М.Номин-Эрдэнэ, Б.Энхтүвшин, Б.Анударь, дэлхийн аварга, МУГТ С.Цэрэнчимэд, Ү.Ундралмаа, Х.Болортуяа, Л.Эрдэнэболор, М.Рэнцэнханд Б.Болор-Эрдэнэ нар хүч сорив.

          Харин эрэгтэйчүүдийн 61 кг-ын жинд Б.Алтангэрэл, ОУХМ Ц.Цогбадрах, ДАШТ-ий хүрэл медальт Т.Түвшинтулга, П.Дашцэрэн, Ш.Хос-Эрдэнэ, П.Элбэгсайхан, Ц.Сундуй, Э.Батбаяр, А.Даваадорж, Л.Мөнх-Од, Д.Мандуул, Э.Энхболд, С.Жигүүр, ДАШТ-ий хүрэл медальт ОУХМ Н.Наранхүү, ДАШТ-ий хүрэл медальт, МУГТ Э.Бэхбаяр нар сорилд хүч үзсэн. Эрэгтэйчүүдийн 70 кг-ын инд Б.Эрдэнэбат, О.Мөнх-Энэрэл,Т.Өсөхжаргал, Э.Тэмүүлэн, Л.Мөнх-Эрдэнэ, Я.Үржинжав, Ш.Дэлэг,Б.Билгүүн, Б.Өсөхбаяр, Г.Амин-Эрдэнэ нар барилдлаа.

         Эрэгтэйчүүдийн 79 кг-ын жингийн сорилд Х.Сэвжидбалсан, Ч.Жамъяндорж, Б.Батбаяр, Ц.Дамдинпүрэв, Э.Бямбадорж, О.Сүлдхүү нар өрсөлдөв. Эрэгтэйчүүдийн 92 кг-ын жингийн сорилд Т.Дэмчигдорж, Л.Батбаяр, Д.Саранцогт, Б.Баттөр, Д.Дэлгэрдалай, Д.Батзул, А.Мягмарсүрэн, Азийн наадмын хүрэл медальт, ОУХМ Г.Ганхуяг нар хүч үзэн өрсөлдсөн юм.

ЭРЭГТЭЙЧҮҮДИЙН 61 КГ-ЫН ЖИНД Ц. ЦОГБАДРАХ ЭРХ АВЛАА

    Эрэгтэйчүүдийн 61 кг-ын жинд ДАШТ-ий хүрэл медальт ОУХМ Н.Наранхүүг түрүүлж, олимпын бус жингийн ДАШТ-д оролцох эрх хүртэх магадлалтай хэмээн олон хүн таамаглаж байв. Гэтэл ОУХМ Н.Наранхүү, ДАШТ-ий хүрэл медальт МУГТ Эрдэнэбатын Бэхбаяртай барилдаж байх үедээ хөлдөө бэртэл авч цаашид барилдах боломжгүй болсон. Тус жинд 65 кг-аас жин бууж ирсэн “Алдар” спорт хорооны тамирчин ОУХМ Цэвээнсүрэнгийн Цогбадрах, МУГТ Эрдэнэбатын Бэхбаяртай шалгарч үлдсэн юм. Энэхүү барилдааны нэгдүгээр үед  МУГТ Э.Бэхбаяр хөл авч цацаж дөрвөн оноо, хоёрдугаар үед шахаж мордон бүхэл дөрвөн оноо авч 9:8 болгон оноог ойртуулсан боловч, ОУХМ Ц.Цагбадрахын хэрээст мэхэнд оноо алдаж 11:8-ын харьцаагаар ялагдал хүлээсэн.  ОУХМ Ц.Цогбадрах 11:8-аар ийнхүү ялалт байгуулан олимпыг бус жингийн  ДАШТ-д барилдах эрхтэй боллоо.

ЭРЭГТЭЙЧҮҮДИЙН 70 КГ-ЫН ЖИНД Э.ТЭМҮҮЛЭН ТҮРҮҮЛЭВ

       Эрэгтэйчүүдийн 70 кг-ын жингийн  шийдвэрлэх барилдаанд “Хилчин” спорт хорооны тамирчин, ОУХМ Энхтуяагийн Тэмүүлэн, Спортын төв сургуулийн Ш.Дэлэгтэй барилдсан. Тус барилдааны нэгдүгээр үед Э.Тэмүүлэн 5:3-аар, хоёрдугаар үеийн барилдаанд 13:3-аар Ш.Дэлэгийг оноогоор цэвэр ялж, ДАШТ-ий эрхийг хүртсэн.

ЭРЭГТЭЙЧҮҮДИЙН 79 КГ-ЫН ЖИНД О.СҮЛДХҮҮ ЭРХ АВАВ

       Эрэгтэйчүүдийн 79 кг-ын жинд “Алдар” спорт хорооны тамирчин, ОУХМ Олонбаярын Сүлдхүү 74 кг-аас жин өгсөн барилдлаа. Тэрбээр 79 кг-ын жингийн аваргын төлөөх барилдаанд “Дархан Хасу”-гийн Б.Батбаяртай таарсан. Тус барилдааны нэгдүгээр үед О.Сүлдхүү 5:0-ээр, хоёрдугаар үед 7:0-ээр илт илүүрхэн олимпын бус жингийн ДАШТ-д барилдах эрхтэй болсон.

ЭРЭГТЭЙЧҮҮДИЙН 92 КГ-ЫН ЖИНД Г.ГАНХУЯГ ТҮРҮҮЛЛЭЭ

       Эрэгтэйчүүдийн 92 кг-ын жингийн шийдвэрлэх барилдаанд “Алдар” спорт хорооны тамирчин, “Ханжоу 2022” Азийн наадмын хүрэл медальт, ОУХМ Ганбаатарын Ганхуяг, Спортын төв сургуулийн Д.Дэлгэрдпалайтай барилдсан. Тус барилдаанд Г.Ганхуяг 6:0-ээр ялалт байгуулан ДАШТ-ий сорилд түрүүллээ.

ЭМЭГТЭЙЧҮҮДИЙН 55 КГ-ЫН ЖИНД Ч.ОТГОНТУЯА ЭРХ ХҮРТЛЭЭ

      Олимпын бус жингийн ДАШТ-ий эмэгтэйчүүдийн 55 кг-ын жинд “U23” насны Ази тивийн аварга, “Алдар” спорт хорооны тамирчин, ОУХМ Чинболдын Отгонтуяа 53 кг-аас жин өгсөн шийдвэрлэх барилдаанд, “U23” насны Ази тивийн аварга, “Алдар” спорт хорооны тамирчин, ОУХМ Баянмөнхийн Отгонтуяатай барилдсан. Тус барилдааны нэгдүгээр үед 0:3-аар Баянмөнхийн Отгонтуяа илүүрхсэн юм. Харин хоёрдугаар үеийн барилдаанд Чинболдын Отгонтуяа 4:4 болгож, оноог тэнцүүлж чадсан. Улмаар барилдааны төгсгөлийн 44 секундэд оноог 7:6 болгон нэг оноогоор хожиж эхэлсэн. Баянмөнхийн Отгонтуяа цаг дуусахад 23 секунд дутуу байх үед оноог 7:7 болгож тэнцүүлсэн ч бүхэл онооны чанараар ОУХМ Чинболдын Отгонтуяа яллатыг авч ДАШТ-ий эрхийг хүртсэн юм.

ЭМЭГТЭЙЧҮҮДИЙН 59 КГ-ЫН ЖИНД С.ЦЭРЭНЧИМЭД ЭРХ АВАВ

       Олимпын бус жингийн ДАШТ-ий эмэгтэйчүүдийн 59 кг-ын жинд “Алдар” спорт хорооны тамирчин,  ДАШТ-ий алт, мөнгөн медальт, МУГТ Сүхээгийн Цэрэнчимэд  барилдсан. Тэрбээр 59 кг-ын жингийн аваргын төлөө, “Аврагч” спорт хорооны тамирчин, ОУХМ Хүрэлхүүгийн Болортуяатай барилдсан. Тус барилдааны нэгдүгээр үед С.Цэрэнчимэд 2:0-ээр илүүрхсэн. Хоёрдугаар үеийн барилдаанд Х.Болортуяаг цэвэр дарж, ДАШТ-ий эрхийг хүртлээ.

ЭМЭГТЭЙЧҮҮДИЙН 65 КГ-ЫН ЖИНД Т.ЭНХЖИН ТҮРҮҮЛЭВ

       Олимпын бус жингийн ДАШТ-ий эмэгтэйчүүдийн 65 кг-ын жинд “U23” насны Ази тивийн аварга, “Алдар” спорт хорооны тамирчин, Түвшинжаргалын Энхжин түрүүлж ДАШТ-д оролцохоор болсон. Тэрбээр тус жингийн аваргын төлөөх шийдвэрлэх барилдаанд “Төв-Арж” клубийн тамирчин Эрдэнэ-Очирын Одгэрэлийг нэгдүгээр үед 6:0-ээр, хоёрдугаар үед 7:0-ээр илт давамгайлан ялалтыг авч ДАШТ-д барилдах эрхтэй болсон.

ЭМЭГТЭЙЧҮҮДИЙН 72 КГ-ЫН ЖИНД З.БОЛОРТУНГАЛАГ ЭРХ ХҮРТСЭН

    Олимпын бус жингийн ДАШТ-ий эмэгтэйчүүдийн 72 кг-ын жинд насанд хүрэгчдийн Ази тивийн аварга, “Хилчин” спорт хорооны тамирчин, ОУХМ Зоригтын Болортунгалаг түрүүлсэн. Тэрбээр шийдвэрлэх тойргийн барилдааны нэгдүгээр үед “Алдар” спорт хорооны тамирчин, 2024 оны улсын аварга, ОУХМ Пүрвээгийн Номин-Эрдэнийг 6:4-өөр, хоёрдугаар үед сугадаж мордох мэхээр цэвэр ялж, ДАШТ-д барилдах эрхийг хүртлээ.