Перу Улсын нийслэл Лима хотод жүдо бөхийн өсвөр үеийн ДАШТ саяхан болж өндөрлөсөн билээ. ДАШТ-ий охидын 57 кг-ын жинд алтан медаль хүртэж, Монгол Улсаас төрсөн анхны өсвөр үеийн дэлхийн аварга болсон “Гүрү Дожо” клубийн тамирчин Тэрбишийн Ариунзаяатай ярилцлаа. Түүний аав Д.Тэрбиш Төв аймгийн Угтаал цайдам сумын уугуул, үндэсний бөхийн сумын заан цолтой хүн бий.

-Жүдо бөхийн өсвөр үеийн дэлхийн аварга Монгол Улсын анхны жүдочин болсонд баяр хүргэе.

     -Баярлалаа

-Миний дүү өөрийгөө танилцуулахгүй юу. Одоо хэдэн настай, хэддүгээр ангийн сурагч вэ?

     -Намайг Тэрбишийн Ариунзаяа гэдэг. Одоо 16 настай. Сүхбаатар дүүргийн ерөнхий боловсролын Хоёрдугаар дунд сургуулийн 12д  ангийн сурагч. Аав, ээж, эгч, дүүгийн хамт амьдардаг.

 -Жүдо бөхөөр их багаасаа хичээллэсэн байдаг. Хэд дэх жилдээ хичээллэж байгаа вэ?

    -Жүдо бөхөөр гуравдугаар ангиасаа хичээллэж эхэлсэн. Одоо ес дэх жилдээ хичээллэж байгаа.

 -Жүдо бөхийг чухам  яагаад сонгож хичээллэх болов. Аав, ээж нь жүдогийн секцэнд оруулж өгсөн юм уу?

     -Би багадаа их хөдөлгөөнтэй, байнга л гүйж харайж явдаг охин байлаа. Тийм болохоор аав, ээж хоёр жүдо бөхийг сонгон хичээллүүлэхээр шийдсэн. Тэгээд Төрбатын Энхцэцэг багшийн “Алтайн хүчтэн” дэвжээнд анх оруулж өгсөн юм. Тэгэж л анх жүдо бөхөөр хичээллэж эхэлсэн.

 -Хамгийн анх ямар тэмцээнээс медаль хүртэж байсан бэ?

     -Хамгийн анх 2016 оны Улаанбаатар хотын аварга шалгаруулах тэмцээний охидын 32 кг-ын жинд дөрвөн барилдаан хийж, хүрэл медаль хүртсэн.

-Сэтгэлд чинь хоногшин үлдсэн, дурсамжтай, хамгийн сайхан барилдааныг хэзээ хийж байв?

  -Сэтгэлд хоногшин үлдсэн хамгийн сайхан барилдаан гэвэл 2022 оны дотоодын чансаа олгох насанд хүрэгчдийн тэмцээнд 48 кг-ын жингийн хагас шигшээ барилдаан дээр ОУХМ Г.Наранцэцэг эгчтэй 25 минут барилдсан. Тэр 25 минутын барилдааны төгсгөлд шүүгчдийн саналаар гурван торгуулиар ялагдаж байсан юм. Ялагдсан ч гэсэн, хэн хэнээсээ үнэлгээ авч чадаагүй ч тэр барилдаан сэтгэлд тод хоногшин үлдсэн.

 -Залуучуудын УАШТ-ээс 14 настайдаа мөнгөн медаль хүртэж, 15 настайдаа алтан медаль хүртэж байсан байх аа?

     -Залуучуудын улсын аварга шалгаруулах тэмцээнд 14,15,16 настайдаа тус тус оролцож хоёр алт, нэг мөнгөн медаль хүртэж байсан.

-Насанд хүрэгчдийн УАШТ-д 15 настайдаа оролцож медаль хүртэж байсан санагдах юм?

 -Тийм ээ,  2023 онд жүдо бөхийн насанд хүрэгчдийн УАШТ-ээс хүрэл медаль хүртэж байсан.

 -Насанд хүрэгчдийн УАШТ-д 52 кг-ын жинд барилдаж байсан. Харин Испани, Итали Улсад болсон “IJF”  Европын  цуврал тэмцээнээс алт, мөнгөн медаль хүртэхдээ 57 кг-ын жинд барилдаж эхэлсэн үү?

       -Залуучуудын УАШТ-д 52 кг-ын жинд оролцож байсан. Харин насанд хүрэгчдийн 2024 оны УАШТ-ээс эхлээд 57 кг-ын жинд барилдах болсон.

- 2024 оны өсвөр үеийн ДАШТ-ий 57 кг-ын жинд 28 тамирчин барилджээ. Хэдэн барилдаан хийв. Японы Сузукиг 7 минут 18 секундэд хоёр базаригаар цэвэр ялсан. Дэлхийн аваргын алтан медалийн төлөөх барилдаанд Францын Агати-Алоуачегаас сууж үүрэх мэхээр базари үнэлгээ авч, дэлхийн аварга болсон байна. Хамгийн хүнд барилдааныг ямар улсын тамирчинтай хийсэн бэ?

   - Жүдо бөхийн өсвөр үеийн ДАШТ-д нийт таван барилдаан хийсэн. Хамгийн хариуцлагатай гол өрсөлдөөнийг Япон Улсын тамирчин Сузукитай өрнүүлсэн. Японыг тамирчинг ялсан нь дараа  дараагийн тойргийн барилдаанд илүү итгэлтэй барилдах сэтгэл зүйн хүч болж өгсөн.

 -Ер нь 57 кг-ын жинд цаашид тогтож барилдах уу?

         -Тийм ээ, 57 кг-ын жинд тогтож барилдана гэсэн бодолтой байгаа.

-Миний дүү өөрийнхөө гаргасан амжилтуудаа товчхон танилцуулахгүй юу?

     -Би жүдо бөхийн өсвөр үе, залуучуудын УАШТ-д 11 удаа финалдаж, нийт гурван мөнгө, найман алтан медаль хүртэж байсан. Мөн Азийн аварга шалгаруулах тэмцээнээс хүрэл медаль, “IJF”-ийн цуврал тэмцээний найман алт, хоёр мөнгөн медальтай.

 -Жүдо бөхийн залуучуудын ДАШТ-д барилдах уу?

   -Жүдо бөхийн залуучуудын ДАШТ-д барилдах бодолтой байгаа.