"Парис-2024" зуны XVII паралимпын наадам энэ сарын 28-ны өдөр эхэлнэ. Тус наадамд Монгол Улсаас спортын зургаан төрөлд 12 тамирчин оролцох юм.

1. Пара хөнгөн атлетикийн “ F-40” ангиллын бөөрөнцөг түлхэлтэд Ц.Баттулга.
2. Пара хөнгөн атлетик. “T-53” ангиллын 100 метрийн тэргэнцэртэй гүйлтэд П.Энхманлай.
3. Пара жүдо бөхийн “J1” ангиллын +90 кг-ын жинд  Д.Ганбат.
4. Пара жүдо бөхийн “J1” ангиллын -90 кг-ын жинд. Б.Баттөгс.
5. Пара жүдо бөхийн  “J1” ангиллын 70 кг-ын жинд. Л.Туруунаа.
6. Пара жүдо бөхийн  “J1” ангиллын  48 кг-ын жинд. Т.Сувд-Эрдэнэ
7. Пара пауэрлифтингийн  “PO” ангилалд. Э.Содномпилжээ.
8. Пара усанд сэлэлтийн “S6” ангиллын. 50 метрийн чөлөөт сэлэлтэд Х.Номуун
9. Пара байт харвааны  “ST” ангилалд. Д.Сэлэнгээ
10. Пара байт харвааны “ST” ангилалд Б.Оюун-Эрдэнэ
11. Пара тээквондогийн  “К44” ангиллын 63 кг-ын жинд Г.Болор-Эрдэнэ.
12. Пара тээквондогийн “К44” ангиллын 52 кг-ын жинд У.Сүрэнжав нар өрсөлдөнө.

       Манай баг, тамирчид тус наадмаас 2-3 медаль хүртэх зорилт тавьж байгаа.  Өнгөрсөн "Токио 2020" зуны паралимпын наадамд Монгол Улсаа төлөөлөн спортын зургаан төрөлд, 11 тамирчин оролцох эрх авч байлаа. Олимп, паралимпыг дэмжих үйл ажиллагаанд 2024 онд 2.2 тэрбум төгрөг зарцуулах бол баг, тамирчдын цалинд 5.6 тэрбум төгрөг төсөвлөсөн байна.

     Монголын шигшээ багийн тамирчид энэ сарын 29-ний өдрөөс есдүгээр сарын 8-ны өдрийг дуустал тэмцээн уралдаандаа өрсөлдөх юм. Монгол Улс хүн төрөлхтний эв санааны нэгдлийн илэрхийлэл болсон олимпын наадамд тогтмол оролцож, зуны олимпын наадмаас 31, паралимпын наадмаас дөрвөн медаль хүртээд байгаа билээ. 

Э.СОПНОМПЭЛЖЭЭ “ПАРИС 2024” ПАРАЛИМПОД ХҮЧ СОРИНО

     Паралимпын  наадмын эрэгтэйчүүдийн 107 кг-ын жинд дэлхийн чансааны оноогоор паралимпын алт, хүрэл медальт, ДАШТ-ий гурван алт, дөрвөн мөнгөн медальт, дэлхийн цомын зургаан удаагийн аварга, Ази тивийн хошой аварга, дэлхийн дээд амжилтыг эзэмшигч, Хөдөлмөрийн баатар, гавьяат тамирчин Энхбаярын Содномпилжээ өрсөлдөнө.  Тэрбээр дэлхийн чансааны дэд байрт эрэмбэлэгдсэн амжилтаар “Парис 2024” зуны паралимпын наадамд оролцох эрх нь баталгаажсан.

Г.БОЛОР-ЭРДЭНЭ, У.СҮРЭНЖАВ НАР ТАЭКВОНДОГООР ТУЛАЛДАНА

      Дэлхийн таэквондогийн холбооноос “Парис-2024” зуны паралимпын наадамд оролцох эрхээ авсан тамирчдыг албан ёсоор зарлахад Монголын тамирчин МУГТ Г.Болор-Эрдэнэ 63 кг-д,  ОУХМ У.Сүрэнжав 52 кг-д эрх нь баталгаажсан билээ. Гавьяат тамирчин Г.Болор-Эрдэнэ нь ДАШТ-ий таван алтан медальтай, Азийн тивийн таван удаагийн аварга, “Ханжоу-2022” Азийн наадамд түрүүлсэн. Тэрбээр паралимпын наадамд хоёр дахь удаагаа оролцох гэж байна.  Харин У.Сүрэнжав нь ДАШТ-ий хүрэл, “Ханжоу-2022” Азийн наадмын мөнгөн медальтай.  Паралимпын наадамд анх удаа оролцох гэж байгаа. Тэд “Парис-2024” зуны паралимпын наадамд оролцох эрхээ авсан Монголын таэквондогийн анхны тамирчид болж байгаа юм.

Д.СЭЛЭНГЭЭ, Б.ОЮУН-ЭРДЭНЭ НАР ЦЭЦ МЭРГЭЭ СОРИНО

    Австрали Улсын Сидней хотод болсон  пара байт харвааны дэлхийн чансаа олгох гран при тэмцээнээс эмэгтэйчүүдийн ганцаарчилсан төрөлд өрсөлдсөн Б.Оюун-Эрдэнэ алтан медаль хүртэж, паралимпын эрх авсан. Монгол Улсаас ДАШТ-ий багийн хүрэл, Азийн аваргын хүрэл медальт Д.Сэлэнгээгийн эрх баталгаажсан. Ийнхүү Азийн аваргын хүрэл медальт Б.Оюун-Эрдэнэ, Д.Сэлэнгээ нарын харваачид Парисын зурхайд цэцээ сорих юм. Пара байт харвааны дэлхийн чансаанд Д.Сэлэнгээ дөрөвт эрэмбэлэгдэж байгаа бол Б.Оюун-Эрдэнэ 14 дүгээр байрт жагсаж байгаа.

Х.НОМУУН УСАНД СЭЛЭЛТЭЭР УРАЛДАНА

     "Парис 2024" паралимпын наадамд усанд сэлэлтээр анх удаа монгол тамирчин Х.Номуун оролцохоор болсон.  “Ханжоу 2022” Азийн зуны пара спортын наадмын усанд сэлэлтийн тэмцээнд Хүрэлийн Номуун оролцож, чөлөөт сэлэлтийн 400 метрийн зайг 7:13 минутад туулснаар зургадугаар байрт орж байсан. Х.Номуун дээрх үзүүлэлтээр улсынхаа дээд амжилтыг шинэчлэн тогтоосон. Мөн тэр Азийн пара наадмын усанд сэлэлтийн төрөлд өрсөлдсөн анхны монгол тамирчин болсон билээ.

 П.ЭНХМАНЛАЙ “ПАРИС-2024” ПАРАЛИМПЫН НААДАМД УРАЛДАНА

    Пара хөнгөн атлетикийн ОУХМ П.Энхманлай нь “T-53” ангиллын тэргэнцэртэй гүйлтийн 100 м-ийн зайд "Парис-2024" зуны паралимпын наадамд эх орноо төлөөлөн оролцоно. П.Энхманлай нь "Токио-2020" зуны паралимпын XVI наадамд эх орноо төлөөлөн оролцож байсан туршлагатай тамирчин билээ.

Ц.БАТТУЛГА “ПАРИС-2024” ПАРАЛИМПЫН НААДАМД БӨӨРӨНЦӨГ ТҮЛХЭНЭ

    Пара Хөнгөн Атлетикийн ОУХМ Ц. Баттулга нь “F-40” ангиллын бөөрөнцөг түлхэлтийн төрлөөр "Парис-2024" зуны паралимпын наадамд эх орноо төлөөлөн оролцоно. Ц.Баттулга нь өнгөрсөн жил “Ханжоу-2022” Азийн зуны спортын наадмаас тухайн төрлөөрөө хүрэл медаль хүртсэн билээ.

Д.ГАНБАТ, Л.ТУРУУНАА, Т.СУВД-ЭРДЭНЭ, Б.БАТТӨГС НАР  ЖҮДО БӨХӨӨР ХҮЧ ҮЗНЭ

      Герман Улсын Хайделберг хотод  пара жүдо бөхийн “Парис-2024” зуны паралимп наадмын эрхийн оноо олгох гран при тэмцээн хоёрдугаар сарын 16-18-ны өдрүүдэд болсон. Тус тэмцээний эмэгтэйчүүдийн 70 кг-ын жинд Лхажавын Туруунаа хүрэл медаль хүртэж паралимпын эрхээ авсан. Л.Туруунаа нь пара жүдо бөхийн дэлхийн аварга шалгаруулах тэмцээнээс медаль хүртсэн Монголын анхны тамирчин бөгөөд өнгөрсөн жил БНХАУ-ын Ханжоу хотод болсон Азийн зуны спортын пара наадмаас хүрэл медалийг хүртэж байв.