Жүдо бөхийн насанд хүрэгчдийн “Кувейт 2015” Ази тивийн аварга шалгаруулах тэмцээний 70 кг-ын жингийн аварга, дэлхийн цомын мөнгө, өсвөр үеийн ДАШТ-ий мөнгөн медальт, 2011, 2015, 2016, 2017, 2019, 2021 оны улсын аварга, ОУХМ Цэнд-Аюушийн Наранжаргалтай ярилцлаа. Тэрбээр  49 дүгээр дунд сургуулийн аравдугаар ангийн сурагч байх үедээ Энэтхэгийн Хитрапад хотод болсон жүдо бөхий өсвөр үеийн Ази тивийн аварга шалгаруулах тэмцээний охидын 57 кг-ын жинд алтан медаль хүртэж, өсвөр үеийн Ази тивийн аварга болж жүдо бөхийн спортын гараагаа эхэлж байсан юм.

Анх “Женко” клубийн тамирчин болсон үеэ эргээд нэг дурсахгүй юу?

       -2003 онд ЕБС-ийн дөрөвдүгээр ангийн сурагч байх даа “Женко” клубийн жүдо бөхийн секцэнд орж байлаа. Тэр үед эмэгтэй багш жүдо бөх зааж байгаа нь надад их таалагдсан. Анх жүдогийн бэлтгэлийг хараад их сүрдсэн. Аймаар санагдсан шүү. Айж байсан ч сонирхолдоо хөтлөгдөөд өөрийн эрхгүй жүдо руу татагдсан.. Секцэнд ороод өөрөө хичээллэх болсноор сэтгэлийн тэр айдас маань аяндаа арилсан л даа.

-Анхны тэмцээндээ хэдий хугацааны дараа орсон бэ?

      -“Женко” клубт ороод долоо хоноод л анхны тэмцээнд орсон. Тэр үед миний жин 26 кг байсан. Жин өгсөж 32 кг-ын жинд барилдаад ялагдсан л даа. Одоо тэр анхны тэмцээн тийм гоё дурсамжтай санагдаггүй. Барилдааны арга барил, мэх мэдэхгүй байж сэтгэл хөөрөөд бусад хүүхдүүдийг дуурайгаад л тэмцээнд орсон байхгүй юу. Долоо хоног секцэнд явсан байж яаж амжилт гаргах вэ дээ.

-Тэгвэл хамгийн дурсамжтай, мартагдашгүй ямар тэмцээн байв?

           -Дархан хотод 2006 онд болсон самбо бөхийн өсвөр үеийн улсын аварга шалгаруулах болсон юм. Улсын аваргын тэмцээнд манай “Женко” клуб багаараа түрүүлсэн. Тэр л тэмцээн маш гоё дурсамжтай санагддаг. Тэр олон шилдэг багуудыг ардаа орхиж түрүүлнэ гэдэг гайхамшигтай юм шиг санагдсан. Тухайн үед өөрийн эрхгүй МУГД Шархүүгийн Цэвэлмаа багшаараа бахархах сэтгэл төрж билээ. Манай клубийнхэн бүгд хөөрч  баярлаж догдлоод ёстой гоё мэдрэмжийг авч байсан шүү.

-Дарханд болсон тэр УАШТ-нд ямар амжилт үзүүлсэн бэ?

        -Би Дарханд болсон самбо бөхийн өсвөр үеийн УАШТ-ний 44 кг-ын жинд барилдаж хүрэл медаль хүртсэн. Багаараа түрүүлж аварга болсон болохоор өөрөө түрүүлсэнтэй ялгаагүй мэт бодогдож баярласан л даа.

-Удам дагаж бөх болдог гэж ярьдаг. Танайх бөхийн удамтай юу?

     -Аавын маань тал бөхийн удамтай.  Төв аймгийн Дэлгэрхааны “Молиго бүргэд” хэмээх Бат-Очир арслан аавын маань ойрын хамаатан юм гэнэ лээ. Аав маань барилдаггүй ч гэсэн бөхийн спортыг их сонирхож дэмждэг хүн бий. Миний оролцож байгаа тэмцээн болгоныг алгасахгүй ирж үздэг байсан.

-Өөрийг чинь ихэр гэж дуулсан юм байна. Ихэрийнхээ талаар яриач?

       -Миний ихэр эрэгтэй хүүхэд л дээ. Одоо том залуу болсон. Намайг дуурайгаад надаас хойш жүдогийн секцэнд явж эхэлсэн. Нэрийг нь Нарантогтох гэдэг юм.

-Ц.Нарантогтох жүдо бөхөөр хэр амжилт гаргаж байсан бэ?

         -Би сайн мэдэхгүй байна. Та өөрөөс нь асуувал дээр байх. Самбо, жүдо бөхөөр нэлээд хэдэн медаль хүртэж байсан шүү. Яг ямар тэмцээнээс хүртсэн гэдгийг нь сайн санахгүй байна.

6

-Өсвөрийн Ази тивийн аваргын төлөөх шийдвэрлэх барилдаан хүнд байсан уу?

           -Санасныг бодоход аваргын төлөө барилдаан тийм ширүүн өрсөлдөөнтэй болоогүй. Тайландын тэр охины барилдааныг багш сайн харж судалсан юм билээ. Тэгээд л багшийн захиж хэлснээр барилдаж, үүрч шидэж даралтаар цэвэр ялсан. Харин Япон, Энэтхэгийн хүүхдүүдийн барилдааны ур чадвар өндөр, ширүүн, хүчтэй өрсөлдөгчид байсан.

-Тухайн үед насанд хүрэгчдийн улсын аваргад оролцоход чинь хамгийн хүчтэй өрсөлдөгчид хэн, хэн байдаг байв?

          -Манай жингийнхэн бүгд л ширүүн өрсөлдөгчид байлаа. Тухайн үед МУГТ  Ц.Мөнхзаяа, ОУХМ Баттөгс эгч нар жин өгсөн манай жинд орж ирэн хамгийн хүчтэй ширүүн өрсөлдөөнийг өрнүүлдэг байсан. Эгч нараа ялахын төлөө бэлтгэл сургуулилалтаа шамдан хийж байсан даа.