“Парис 2024” зуны олимпын ХХХIII наадмын чөлөөт бөхийн эмэгтэйчүүдийн 57 кг-ын жинд насанд хүрэгчдийн Ази тивийн аварга шалгаруулах тэмцээний хүрэл медальт, “U23” насны Ази тивийн аварга, “Токио-2020” зуны олимпын наадмын шагналт тавдугаар байрт,  Үндэсний шигшээ багийн тамирчин, ОУХМ Болдсайханы Хонгорзул өрсөлдөнө. Манай тамирчин олимпын наадмын эхний барилдаанд “Ханжоу-2022” Азийн наадмын хүрэл медальт БНХАУ-ын Хун Кө Шиньтэй учраа таарлаа.  Хэрэв түүнийг ялах юм бол  Нигер, Алжирын бөхчүүдийн ялсантай барилдана.

         ОУХМ Болдсайханы Хонгорзул 2001 онд Баянхонгор аймгийн Өлзийт суманд төрсөн. Чөлөөт бөхийн өсвөр үеийн “Афин 2017” ДАШТ-ий хүрэл медальт, өсвөр үеийн Азийн аварга шалгаруулах “Банконг 2017”  мөнгө, “Ташкент 2018” Азийн аваргын хүрэл медальтай.  “U23” насны Ази тивийн аварга, Иван Ярыгин “Алтан гран при”-ээс 2022 онд хүрэл, 2023 онд алтан медаль хүртсэн. “Mongolia open” олон улсын тэмцээний мөнгө, УАШТ-ий алт, хүрэл медалийн эзэн бол ОУХМ Б.Хонгорзул билээ.

       ОУХМ Болдсайханы Хонгорзулд “Парис-2024” зуны XXXIII олимпын наадамд оролцох эрхийг нөхөн олгосон юм. Түүнийг аз, од хийморь түшиж хоёр дахь олимпын наадамдаа хүч сорих боломж нээгдсэн билээ. Одоо Б.Хонгорзулд дутуугаа гүйцээж, дундуураа дүүргэх, алдаагаа засаж, залруулан, хичээж, зүтгэн олимпод амжилт гаргах л үлдсэн. Б.Хонгорзул 20 настай байх даа "Токио-2020" олимпын наадмын эмэгтэйчүүдийн 57 кг-ын жинд Монгол Улсаа төлөөлөн барилдсан. Токиогийн олимпын наадмын эхний тойрогт Францын бөх, Европын аваргын хүрэл медальт Матилде Ривиераг 7:5-аар ялсан. Улмаар Япон Улсын тамирчин, олимпын хошой аварга, дэлхийн гурван удаагийн аварга Рисако Кавайтай барилдаж 7:0-ээр хожигдсон.  Рисако Кавай финалд шалгарсан учраас түүний дагаж барилдах боломжтой болсон юм. Дагах тойргийн барилдаанд Африкийн наадмын хүрэл медальт тамирчин Гвинейн Фатүмата Яари Камартай барилдаж, 10:0-ийн харьцаагаар ялж байлаа. Б.Хонгорзул “Токио 2020” олимпын наадмын хүрэл медалийн төлөө олимпын аварга, Америкийн тамирчин Хелен Мароулисад хожигдож, олимпын медалийн оосроос атгаад алдан, тавдугаар байрт шалгарч байсан юм.