“Парис 2024” зуны олимпын наадмын жүдо бөхийн хувийн тэмцээн 2024 оны долдугаар сарын 27-оос наймдугаар сарын 2-ны өдөр буюу өнөөдөр өндөрлөх юм. Маргааш багийн барилдаан эхэлнэ. Олимпын эхний өдрийн эмэгтэйчүүдийн 48 кг-ын жинд дэлхийн аварга, ОУХМ Б.Баасанхүү мөнгөн медаль хүртсэн. Өнөөдөр олимпын зургаа дахь өдрийн барилдааны эмэгтэйчүүдийн +78 кг-ын жинд ОУХМ А.Адъяасүрэн, эрэгтэйчүүдийн +100 кг-ын жинд  ОУХМ О.Цэцэнцэнгэл нар барилдана.

ЭРЭГТЭЙЧҮҮДИЙН  +100  КГ-ЫН ЖИНД  О.ЦЭЦЭНЦЭНГЭЛ  ӨРСӨЛДӨНӨ

       Энэ жинд 23 тамирчин байгаа. Манай улсаас Жүдо бөхийн Үндэсний шигшээ баг, Цагдаагийн ерөнхий газрын “Хүч” спорт хорооны тамирчин их дуулга тэмцээний аварга, ОУХМ Одхүүгийн Цэцэнцэнгэл хүч үзнэ. Тэрбээр “С” хэсгийн нэгдүгээр тойрогт Германы Erik ABRAMOV-той таарсан. Хэрэв түүнийг ялж чадвал хоёрдугаар тойрогт Тажикстаны шилдэг тамирчин Temur RAKHIMOV-той барилдана. Энэ хэсгийн доод талд Узбекистаны Alisher YUSUPOV байна.

ЭМЭГТЭЙЧҮҮДИЙН  +78  КГ-ЫН ЖИНД  А.АДЪЯАСҮРЭН

        Энэ жинд 26 тамирчин байгаа. Манай улсаас Жүдо бөхийн Үндэсний шигшээ баг, зэвсэгт хүчний “Алдар” спорт хорооны тамирчин, Ази тивийн аварга шалгаруулах тэмцээний мөнгөн медальт, “Ханжоу-2022” Азийн наадмын хүрэл медальт, ОУХМ Амарсайханы Адъяасүрэн хүч сорино. Тэрбээр “D” хэсгийн нэгдүгээр тойрогт Казахстаны Kamila BERLIKASH-тай таарсан. Хэрэв түүнийг ялж чадах юм бол хоёрдугаар тойрогт Туркийн хашир туршлагатай хүчтэй өрсөлдөгч 36 настай Kayra OZDEMIR-тай барилдана. “D” хэсгийн доод хэсэгт  Японы Akira SONE,  Хятадын XU Shiyan нар байна.