“ПАРИС-2024” боксын эмэгтэйчүүдийн 54 кг-ын жинд Үндэсний шигшээ баг, “Алдар” спорт хороо, зэвсэгт хүчний 065 дугаар анги, “Монгол-Од ХХК-ийн тамирчин ОУХМ М.Энхжаргал  өнөөдөр тулаан хийнэ. Тэрбээр олимпын наадмын шигшээ дөрөвт үлдэх, хүрэл медалийн төлөө 23:22 цагаас ДАШТ-ий алтан медальт Туркийн Хатич Акбаштай тулалдана.

Дэлхийн аварга шалгаруулах тэмцээний хүрэл медальт, дэлхийн цомын аварга, ОУХМ Мөнгөнчимэгийн Энхжаргал Улаанбаатар хотод 1999 онд төрсөн. 2011 онд “Алдар” спорт хороонд Монгол Улсын гавьяат дасгалжуулагч А.Гантулгын шавь болж, амжилтын гараагаа эхлүүлсэн. Одоо хүртэл А.Гантулга багштайгаа цуг, туслах дасгалжуулагч ОУХМ Отгонбаяр багштай ерөнхий бэлтгэлээ хангадаг. А.Гантулга багшийнхаа гарынх нь шавь гэж дуудуулах их дуртай гэсэн. 2011 онд боксын спорт руу орохоос өмнө “Алдар” спорт хорооны хөл бөмбөгийн секцэнд явдаг байжээ. Заалны буланд мишок байхаар нь цохиж үзсэн гэдэг. Тэгсэн гэнэт л боксоор хичээллэж үзмээр санагдсан. Тэгээд л бусдын ятгалгаар биш өөрийн хүсэл сонирхлын дагуу боксын секцэнд бүртгүүлэн орсон юм билээ.

        Түүний  амжилтын гараа 2011 онд “Шижир алт” тэмцээнээс хүртсэн мөнгөн медалиар эхэлсэн. Томоохон амжилтуудаасаа дурдвал өсвөр үеийн УАШТ-д хоёр удаа, мөн залуучуудын УАШТ-д хоёр удаа түрүүлж байлаа. Насанд хүрэгчдийн УАШТ-ий алт, мөнгө, хүрэл медальтай. “Шилдэг найман боксчин” тэмцээний мөнгөн медальтай. Монголын бүх ард түмний наадмын аварга, 2015 оны өсвөр үеийн ДАШТ-ий хүрэл, 2022 оны залуучуудын Азийн аварга, 2022 оны дэлхийн цомын аварга, 2023 оны насанд хүрэгчдийн ДАШТ-ээс хүрэл медаль хүртсэн амжилт гаргаад байгаа.

М.Энхжаргал нэгэнтээ “Боксын спорт надад хүмүүжил, хөдөлмөрч байдал, тэвчээр, тууштай байдлыг бий болгосон. Өөрийгөө хуурахгүйгээр бэлтгэлээ сайн хийхийг хичээж байна. Шархаднаас төрсөн дараагийн олимпын аварга болмоор байна” нэмээсэн билээ. Түүний хүсэл мөрөөдөл биелэх болтугай.