“Парис 2024” зуны олимпын наадмын жүдо бөхийн тэмцээн 2024 оны долдугаар сарын 27-оос наймдугаар сарын 2-ны өдрүүдэд явагдаж өндөрлөнө. Олимпын эхний өдрийн эмэгтэйчүүдийн 48 кг-ын жинд дэлхийн аварга, ОУХМ Б.Баасанхүү мөнгөн медаль хүртсэн. Өнөөдөр хоёр дахь өдрийн барилдааны эмэгтэйчүүдийн 52 кг-ын жинд залуучуудын олимпын аваргын мөнгөн медаль, залуучуудын дэлхийн аварга ОУХМ Л.Сосорбарам, АНЭУ-ын нэр дээр барилдаж буй Ази тивийн аварга ОУХМ Б.Хорлоодой нар хүч үзнэ. Харин эрэгтэйчүүдийн 66 кг-ын жинд ДАШТ-ий хошой хүрэл медальт, МУГТ Ё.Басхүү, АНЭУ-ын нэр дээр барилдаж буй “Ханжоу 2022” Азийн наадмын хүрэл медальт, ОУХМ Б.Нармандах нар барилдана.

ОЛИМПЫН 66  КГ-Д  Ё.БАСХҮҮ, Б.НАРМАНДАХ НАР БАРИЛДАНА

Энэ жинд 27 тамирчин байгаа. Манай улсаас ДАШТ-ий хошой хүрэл медальт, Жүдо бөхийн Үндэсний шигшээ баг, Хил хамгаалах ерөнхий газар, “Хилчин” спорт хорооны тамирчин, МУГТ Ёндонпэрэнлэйн Басхүү хүч сорино. Тэрбээр “D” хэсгийг толгойлон нэгдүгээр тойрогт гоц мөргөн ялалт авсан байгаа. Хоёрдугаар тойрогт Киргизстаны AIBEK UULU, Украины Bogdan IADOV нарын хэн ялсантай хүч үзнэ.  

       Харин АНЭУ-ын нэр дээр барилдаж буй ОУХМ Баянмөнхийн.Нармандах “С” хэсгийн нэгдүгээр тойрогт дэлхийн аварга Өмнөд Солонгосын AN Baul-тай таарсан. Хэрэв түүнийг ялах юм бол хоёрдугаар тойрогт Испанийн David GARCIA TORNE, Казахстаны Gusman KYRGYZBAYEV нарын хэн ялсантай барилдах юм. “С” хэсгийг Гүржийн Vazha MARGVELASHVILI тэргүүлэн барилдана.

ОЛИМПЫН 52  КГ-ЫН ЖИНД  Л.СОСОРБАРАМ, Б.ХОРЛООДОЙ НАР ХҮЧ ҮЗНЭ

      Энэ жинд 26 тамирчин байгаа. Манай улсаас Жүдо бөхийн Үндэсний шигшээ баг, зэвсэгт хүчний “Алдар” спорт хорооны тамирчин залуучуудын дэлхийн аварга, залуучуудын олимпын наадмын мөнгөн медальт, “Токио” их дуулгын хошой хүрэл медальт, ОУХМ Лхагвасүрэнгийн Сосорбарам барилдана. Тэрбээр “D” хэсгийн нэгдүгээр тойрогт  Испанийн Ariane TORO SOLER-той барилдана. Хэрэв түүнийг ялах юм бол хоёрдугаар тойрогт Унгарын PUPP Reka-тай таарна.

        Харин АНЭУ-ын нэр дээр барилдаж буй ОУХМ Бишрэлтийн Хорлоодой “А” хэсгийн нэгдүгээр тойрогт Хятадын ZHU Yeqing-тэй таарсан. Хэрэв түүнийг ялах юм бол хоёрдугаар тойрогт Германы Mascha BALLHAUS, Мексикийн Paulina MARTINEZ нарын хэн ялсантай барилдана. “А” хэсгийн дээд хэсэгт олимп, дэлхийн аварга Японы ABE Uta, олимп, дэлхийн медальтан Узбекистаны шилдэг жүдочин Diyora KELDIYOROVA нар хоорондоо таарна. Өнөөдрийн барилдаан үдээш хойш Улаанбаатарын цагаар 16.00 цагаас эхэлнэ.