Чөлөөт бөхийн Үндэсний шигшээ баг, Зэвсэгт хүчний “Алдар” спорт хорооны тамирчин, ОУХМ Энх-Амарын Даваанасан жин өгсөн 76 кг-ын жинд барилдаж “Парис 2024” олимпын эрх хүртсэн. Тэрбээр1998 оны дөрөвдүгээр сарын 6-ны өдөр Говь-Алтай аймгийн Цогт суманд мэндэлжээ. Э.Даваанасан багадаа хөдөлгөөнтэй эршүүд талдаа охин байсан гэдэг. Хүмүүс түүнийг их бяр, тэнхээтэй охин гэж хөөргөөд, хөвгүүдтэй их барилдуулдаг байсэн гэнэ лээ.

             Э.Даваанасан хөдөөнөөс хотод шилжиж ирээд 44 дүгээр дунд сургуулийн наймдугаар ангид орж суралцсан байдаг. Тэр үедээ сургуулийнхаа хөнгөн атлетикийн секцэнд явж эхэлжээ. Тэр үед Спортын төв сургуулийн нэрэмжит тэмцээнд орж түрүүлээд спортын сургууль байдаг гэдгийг мэдэж авчээ. Түүний дараахан тус сургуулийн элсэлт авч байхыг сонссон байна. Тэгээд л Спортын төв сургуульд элсэж орох гээд захирал дээр нь ортол түүнийг “Чи хөнгөн атлетикаар хичээлэх хүүхэд биш байна” гээд чөлөөт бөхийн ангид оруулж өгсөн юм билээ. Ингэж л тэр Ц.Энхбаяр багшийн шавь болж чөлөөт бөхийн спорттой амьдралаа холбосон түүх   эхэлжээ.

         ОУХМ Э.Даваанасан чөлөөт бөхийн Ази тивийн аварга шалгаруулах тэмцээний хошой хүрэл, Иван Ярыгиний “Алтан гран при” тэмцээний алт, мөнгө, хүрэл, дэлхийн цэргийн их наадмын хүрэл, цэргийн ДАШТ-ий мөнгө, “Иван Поддубный” нэрэмжит мэргэжлийн лигийн тэмцээний хүрэл медальтай тамирчин юм. Тэрбээр  "Белград 2023" ДАШТ-ий 72 кг-ын жинд барилдаж мөнгөн медаль хүртсэн. 2023 оны ДАШТ-д Польш, Болгар, Казахстаны тамирчдыг буулган авч дэлхийн аваргын алтан медалийн төлөө барилдах эрхтэй болсон билээ. Улмаар дэлхийн аваргын төлөөх барилдаанд АНУ-ын залуу бөх дэлхийн аварга Амит Элортод 8:2-оор ялагдаж мөнгөн медалийн эзэн болж байлаа. Харин 2024 оны олимпод оролцох зорилго тээн, 2023 оны насанд хүрэгчдийн УАШТ-д олимпын жин болох 76 кг-д  жин өгсөж барилдаад түрүүлсэн. Тэрбээр улсын аваргын төлөөх барилдаанд “Хилчин” спорт хорооны тамирчин, ОУХМ Н.Загардуламыг 9:4-өөр хожсон юм.

       Киргизстан Улсын Бишкек хотод болсон олимпын эрх олгох Азийн бүсийн тэмцээний 76 кг-ын жинд Э.Даваанасан барилдсан  ч хараахан эрх авч чадаагүй юм. Харин Турк Улсын Истанбул хотноо болсон чөлөөт бөхийн “Парис 2024” олимпын эрх олгох сүүлийн тэмцээнд Францын бөх Паулин Дениз Лекарпентиерыг 7:4-ийн харьцаатай ялж олимпын эрхээ авсан. Тус тэмцээний наймны нэгийн шигшээ барилдаанд Египетийн бөх Самар Амир Ибрахим Хамзаг ялсан. Түүний дара дөрөвний нэгийн шигшээд Европын аварга шалгаруулах тэмцээний хос хүрэл медальт Италийн бөх Энрика Риналдиг ялж, шигшээ шилдэг дөрөвт үлдсэн. Улмаар  Европын аварга шалгаруулах тэмцээний алт, мөнгө, хүрэл медальт Болгарын тамирчин Юлиана Яневад хожигдсон юм. Олимпын эрх олгох шийдвэрлэх барилдаанд  Францын бөх Паулин Дениз Лекарпентиерыг 7:4-ийн харьцаатай ялж олимпын эрхээ авсан.