Чөлөөт бөхийн өсвөр үеийн ДАШТ-ий хүрэл медальт, өсвөр үеийн Азийн аваргын мөнгө, “U23” насны Ази тивийн аварга, “Mongolia open” олон улсын тэмцээний мөнгө, УАШТ-ий алт, хүрэл медалийн эзэн бол ОУХМ Б.Хонгорзул билээ. Тэрбээр “Парис 2024” олимпын эрх олгох сүүлийн тэмцээний дараа өөрийн барилдаанд дүгнэлт хийж, дэмжиж, тусалсан хүмүүст хандан талархал илэрхийлж байсан юм.

        Б.Хонгорзул “Хүсэн хүлээж, зорьсон бүхэн минь өнөөдөр миний гаргасан алдаанаас болж ялагдлаар өндөрлөлөө. Гэхдээ дахиад л хичээнэ. Өөрийнхөө алдаа бүрийг засаж, залруулан дэлхийн тамирчин болохын тулд хичээнэ. Дэвжээн дээр хожигдоод буусан боловч надтай цуг, миний төлөө залбирсан та бүхэнд баярлалаа. Бүх зүйл дээр тусалж дэмжиж байгаа та бүхнийхээ тус дэмийг марталгүй хичээх болно. Амжилт  дүүрэн ирэх тэр нэг өдөр  хүртэл явна. Дэвжээний ард надад тусалдаг  бүх хүнд баярлалаа. Монголын чөлөөт бөхийн холбоондоо, удирдлагууд болон гишүүддээ, бүх ах, эгч нартаа, Шигшээ багийн багш нартаа талархаж байна. Мөн С.Мөнхдуулдах, Б.Наранбаатар багш,  Ш.Болормаа, Ө.Цэнгэлжаргал эгчдээ, Т.Энхжин, Б.Анударь хоёр дүүдээ, Б.Мөнх-Эрдэнэ болон бэлтгэлд тусалдаг бүх хүнд, А.Амартүвшин, Б.Буянзаяа нарт талархаж байна. Ээж, аав, ах эгч, гэр бүл, найз нөхөд, дүү нартаа баярлалаа” гэж бичиж байлаа.

         Түүний тэр талархлын хариу өнөөдөр иржээ. Олон улсын олимпын хорооноос Орос, Беларусь Улсын дайныг дэмжигч зарим тамирчдын талаар гаргасан шийдвэртэй холбоотойгоор Дэлхийн бөхийн нэгдсэн холбооноос олимпын квотод дахин хуваарилалт хийжээ. Ингэхдээ журмын дагуу жендерийн тэгш байдлыг харгалзан үзсэн байгаа юм. Үүний дагуу эрх аваагүй үлдсэн хамгийн өндөр чансаатай олимпын хороонд квот өгөх шийдвэрийн дагуу чөлөөт бөхийн эмэгтэйчүүдийн 57 кг-ын жинд манай тамирчин ОУХМ Болдсайханы Хонгорзулд “Парис-2024” зуны XXXIII олимпын наадамд оролцох эрхийг нөхөн олгосон байна. Ингэснээр манай эмэгтэйчүүд бүтэн багаараа Парисыг зорих боллоо. Түүнийг аз, од хийморь түшиж хоёр дахь олимпын наадамдаа хүч сорих боломж нээгдэж байна. Одоо Б.Хонгорзулд дутуугаа гүйцээж, дундуураа дүүргэх, алдаагаа засаж, залруулан, хичээж, зүтгэн олимпод амжилт гаргах л үлдлээ.

          Б.Хонгорзул 20 настай байх даа "Токио-2020" олимпын наадмын эмэгтэйчүүдийн 57 кг-ын жинд Монгол Улсаа төлөөлөн барилдсан. Токиогийн олимпын наадмын эхний тойрогт Францын бөх, Европын аваргын хүрэл медальт Матилде Ривиераг 7:5-аар ялсан. Улмаар Япон Улсын тамирчин, олимпын хошой аварга, дэлхийн гурван удаагийн аварга Рисако Кавайтай барилдаж 7:0-ээр хожигдсон.  Рисако Кавай финалд шалгарсан учраас түүний дагаж барилдах боломжтой болсон юм. Дагах тойргийн барилдаанд Африкийн наадмын хүрэл медальт тамирчин Гвинейн Фатүмата Яари Камартай барилдаж, 10:0-ийн харьцаагаар ялж байлаа. Б.Хонгорзул “Токио 2020” олимпын наадмын хүрэл медалийн төлөө олимпын аварга, Америкийн тамирчин Хелен Мароулисад хожигдож, олимпын медалийн оосроос атгаад алдан, тавдугаар байрт шалгарч байсан юм. Одоо Б.Хонгорзулынхаа “Дээлийн захыг мушгиж” Парисын олимпоос амжилт хүсэн хүлээе дээ.

.