“Парис 2024” зуны олимпын наадам эхлэхэд 29 хоног дутуу байна. Тус олимпын наадамд манай чөлөөт бөхийн эрэгтэй гурав, эмэгтэй таван тамирчин олимпод оролцох эрхээ аваад байна. Туркийн Истанбул хотноо чөлөөт бөхийн “Парис 2024” олимпын эрх олгох сүүлийн тэмцээний эрэгтэйчүүдийн 65 кг-ын жинд МУГТ, ДАШТ-ий хүрэл медальт, Азийн наадмын аварга, Азийн аваргын хошой мөнгөн медальт, ЦЕГ-ын “Хүч” спорт хорооны тамирчин, Төмөр-Очирын Тулга олимпын эрхийг хүртсэн билээ. Ийнхүү “Парис 2024” олимпын наадмын эмэгтэйчүүдийн 50 кг-ын жинд МУГТ Д.Отгонжаргал, 53 кг-д ОУХМ Б.Хулан, 62 кг-д МУГТ П.Орхон, 68 кг-д ОУХМ Э.Дэлгэрмаа, 76 кг-д ОУХМ Э.Даваанасан, эрэгтэйчүүдийн 65 кг-ын жинд МУГТ Т.Тулга, 86 кг-д ОУХМ Б.Бат-Эрдэнэ, 125 кг-д МУГТ М.Лхагвагэрэл нар барилдах эрхтэй болсон. 

        Гавьяат тамирчин Т.Тулга дэлхийд хүлээн зөвшөөрөгдсөн өндөр зэрэглэлийн бөх гэдгээ олимпын эрх олгох сүүлийн тэмцээнд харуулж, баталж, нотолсон.  Тэрбээр тус тэмцээнд Бахрейны Алибеговыг 10:0-ээр,  “Белград -2022”  ДАШТ-ий мөнгө, “Белград-2023” ДАШТ-ий алтан медальт АНУ-ын Зэйн Ретерфордыг 7:2-оор , Тажикстаны Кудиевыг 9:0-ээр илт илүүрхсэн. Улмаар олимпын эрх хүртэх шийдвэрлэх барилдаанд Энэтхэгийн Сүжээт Сүжээтийг 6:1-ээр ялж, Монголын багийн 16, чөлөөт бөхчүүдийн долоо дахь эрхийг авсан юм. Т.Тулга дэлхийн өндөр зэрэглэлийн бөх ямар байдаг вэ гэдгийг харуулсан.

         Т.Тулга нийт дөрвөн тойрог хүнд  барилдааныг хийж олимпын эрхийг авсан.  Олимпын эрхээ авахдаа 70 кг-ын жингийн  ДАШТ-ны алт, мөнгөн медальт Америкийн тамирчин, ОХУ-ын Дагестаны хоёр легиониер, Энэтхэгийн хүчтэй өрсөлдөгчөөс сэтгэл зүй илт илүү байж, барилдааны тактикаа маш зөв сонгон, тэсвэр тэвчээр, ур ухаан, бяр хүч гарган ялалт байгуулсан билээ. Тэрбээр 2024 оны УАШТ, Ази тивийн аваргын барилдаандаа дүгнэлт хийж чадсан нь илт харагдсан. Илүү хянуур, нягт барилдааны тактикаар барилдаж амаргүй өрсөлдөгчдийг буулган авсан билээ.   

        Манай 65 кг-ын жингийн дотоодын өрсөлдөөн сайн байгаа учраас Т.Тулга дэлхийд сайн барилдаж байгаа. “Алдар” спорт хорооны тамирчин, ОУХМ Ц.Цогбадрах, Т.Тулгыг маш сайн хурцлан, ирлэж өгдөг гайхалтай сайн өрсөлдөгч билээ. Т.Тулга  2022, 2024 оны УАШТ-ий финалд ОУХМ Цогбадрахад ялагдаж  ДАШТ-д оролцох боломжгүй болж байсан. Харин 2023 оны УАШТ-д Ц.Цогбадрахыг буулган авч түрүүлэн “Белград-2023” дэлхийн аварга шалгаруулах тэмцээнийг зорьсон. Т.Тулга “Белград-2023”  ДАШТ-ий 65 кг-ын жингийн эхний тойрогт Германи Улсын тамирчин Александр Семисоровыг 9:2-оор ялсан. Улмаар наймны нэгд үлдэх шигшээ барилдаанд Азербайжан Улсын тамирчин олимпын мөнгө, хүрэл медальт, дэлхийн гурван удаагийн аварга алдарт Хажи Алиевтай тун эргэлзээтэй барилдааныг хийж шүүгчдийн 3:3 гэсэн шийдвэрээр ялагдал хүлээсэн юм.

         Манай тамирчин эхний үед 2:2 гэсэн оноогоор хожсон. Харин шийдвэрлэх үеийн сүүлийн минутад Хажи Алиевийг сугадаж дайрч дэвжээнээс гарган нэг оноо авч илүүрхлээ баталж оноог 3:2 болгосон. Улмаар сүүлийн секундэд өрсөлдөгчийнхөө хийсэн дутуу мэхний эсрэг маш сайн ажиллаж дээр нь үлдэн 5:2 болгосон ч шүүгчдийн шийдвэр Хажи Алиевийн талд гарч ялагдал хүлээсэн юм. МЧБХ-оос албан мэдэгдэл гаргаж, Т.Тулгын барилдаантай холбогдох өргөдлийг Дэлхийн бөхийн нэгдсэн холбооны техникийн зөвлөлд гаргаж шалгуулсан. Нэгэнт шүүгчийн гаргасан шийдвэрийг ДБХ-ны техникийн зөвлөл  өөрчлөхгүй гээд шүүгчээ өмөөрөөд л өнгөрсөн. Харин ДАШТ-ий дараа ДБНХ Т.Тулгын барилдааныг шүүгч буруу шүүж, алдаа гаргасан байна гэдгийг хүлээн зөвшөөрсөн билээ.

           “Ханжоу 2022” Азийн наадамд Т.Тулга үнэхээр гайхалтай барилдааныг үзүүлсэн. Т.Тулга жиндээ Казахстаны Мухтар Санжарыг 10:0-ээр, Камбожийн Ён Бу Наг 10:0-ээр, Өмнөд Солонгосын Ким Ча Суныг 10:0-ээр, зооны аваргын төлөө Хойд Солонгос буюу БНАСАУ-ын тамирчин Ким Кван Жиныг 11:0-ийн харьцаагаар буулган авсан юм. Улмаар Азийн XIX наадмын аваргын алтан медалийн төлөө дэлхийн аварга, Ази тивийн хошой аварга Ираны Рахман Амузид Халилитай барилдаж 11:1-ээр илт илүүрхэн ялж Азийн наадмын аварга болсон.

       Харин 2024 оны УАШТ-д Т.Тулга мөн л ОУХМ Ц.Цогбадрахад оноогоор ялагдсан. Ингээд олимпын эрх олгох эхний тэмцээнд ОУХМ Ц.Цогбадрах барилдах эрхийг хүртсэн. Гэвч тус тэмцээнээс Ц.Цогбадрах олимпын эрхийг хүртэж чадаагүй. Ингээд олимпын сүүлийн эрх олгох тэмцээнд МЧБХ Т.Тулгад итгэл, найдвар хүлээлгэн явуулсан. Тэр МЧБХ-ын удирдлага, багш, дасгалжуулагчдын найдварыг алдалгүй “Парис 2024” олимпын эрхийг хүртэж чадсан билээ. Т.Тулга үнэхээр дэлхийн шилдэг бөхчүүдтэй өрсөлдөөн өрнүүлж, сэтгэл сэргээсэн сайхан барилдаан хийж чадсан билээ.