Олон улсын таэквондогийн Монголын холбооны ерөнхий нарийн бичгийн дарга асан, Олон улсын хар бүс 4-р дантай мастер багш, дасгалжуулагч Д.Цэнгэлбаяртай ярилцлаа.

-Танай холбоо яг хэдэн онд байгуулагдсан юм бэ. Зарим нь 1991 онд гэх, нөгөө хэсэг нь 1992 онд гээд өөр өөрөөр яриад байх юм?

       -Манай оронд 1991 оны тавдугаар сард Монголын Энхтайван найрамдлын холбооны урилгаар БНАСАУ-ын мастер багш, цэргийн таэквондогийн мастер Пак Хак Кил  ирж  ЦНДС-ийн сонсогчдод таэквондогийн спорт, урлагийг зааж, энэ спортыг Монголд хөгжих  үндэс суурийг тавьсан.  Түүний дараа БНАСАУ-аас Цөн Си Хуа  багш ирсэн. 1991 оны 9-р сард ирж Олон улсын таэквондогийн Монголын холбоог байгуулсан. Манай холбооны анхны  ерөнхийлөгчөөр  Монголын Үндэсний олимпийн хорооны дарга асан  “Олимпын өвөө”  Ш.Магван гуай ажиллаж байсан. Ш.Магван гуай 2-3 сар ажилласны дараа Дэлхийн таэквондогийн Монголын холбоо руу шилжсэн учир, манай таэквондо Батлан хамгаалах туслах нийгэмлэгийн техник спортын нэгэн төрөл болон ажиллаж эхэлсэн юм. 1994 оноос  БХТН-ээс өрх тусгаарлан клубийн системд шилжиж биеэ даасан үйл ажиллагаа явуулж эхэлсэн түүхтэй.

-БТСУХ болон МҮОХ-ны зүгээс танай холбоонд хэр дэмжлэг үзүүлдэг вэ?

         -БТСУХ, МҮОХ чинь олимпод амжилт үзүүлэх магадлалтай олимпын цөөн хэдэн спортын төрлүүдэд  илүү анхаарал хандуулдаг. Тэрнээс биш олимпын бус төрөл гээд ITF-ийн таэквондог огт тоохгүй. Уг нь ITF-ийн таэквондогийн спорт дэлхийн 130 гаруй оронд хөгжиж байгаа 80 гаруй сая хүн хичээллэдэг том спортын төрөл байгаа юм. Бид таэквондогийн спортыг монголд хөгжүүлэх гэж “бор зүрхээрээ” зүтгэж яваа. Манай багш дасгалжуулагч нар албан ёсны цалин гэж авдаггүй. Нийгмийн болон эрүүл мэндийн даатгал ч байхгүй. Сургалтын төлбөрөөр цалинждаг боловч тийм найдвартай баталгаатай биш. Багш нар маань энэ спортдоо дур сонирхолтой болохоороо амьдрал, ахуйгаа золиослон 20 гаруй жил зүтгэж яваа.

-Багш нараа хэрхэн бэлтгэж авдаг вэ?

       -Багш, дасгалжуулагч хийх чадвартай шавь нараа сонгон авч дадлагжуулан бэлтгэдэг. БНАСАУ-ын мастер багш нар байнга ирж сургалт, семинар өгдөг болохоор энэ асуудалд нэг их санаа зовдоггүй.

-Танай холбооны УАШТ-д ОХУ-ын Буриадын баг тамирчид ирж оролцох юм аа?

          -Манай холбооны нээлттэй зохион байгуулагдаж буй УАШТ-д ОХУ-ын таэквондочид болон бусад тулааны урлагийн тамирчид оролцох боломжтой байдаг. УАШТ өсвөр үе, залуучууд, насанд хүрэгчид гэсэн гурван насны ангиллаар хувийн  тулаан, түль, хатуу биет, багийн тулаан, багийн түль, багийн хатуу биет  гэсэн төрлүүдээр явагддаг.  ОХУ-ын Буриадын өсвөр үе, залуучууд, насанд хүрэгчдийн гурван багийн тамирчид ирж оролцож байсан. Бид ч гэсэн Буриадын АШТ-нд болон “Байгаль опен” тэмцээнд жил бүхэн очиж оролцдог.