Жүдо бөхийн 2024 оны  Ази тивийн аварга шалгаруулах тэмцээн энэ сарын 20-23-ны өдрүүдэд Хонконгод болж өндөрлөнө. Энэ удаагийн Азийн аваргад 36 орны эрэгтэй 166, эмэгтэй 106, нийт 272 тамирчин өрсөлдөж байна.  Азийн аваргын эхний өдөр манай улсаас 48 кг-ын жинд ОУХМ Б.Баасанхүү, ОУХМ Г.Наранцэцэг, 52 кг-д ОУХМ Л.Сосорбарам, 57 кг-д МУГТ Л.Энхрийлэн, ОУХМ М.Ичинхорлоо нар дэвжээнд гарсан. Харин эрэгтэйчүүдийн 60 кг-ын жинд ОУХМ Э.Ариунболд, ОУХМ Б.Цогт-Очир, 66 кг-д ОУХМ Б.Эрхэмбаяр, АНЭУ-ын нэр дээр барилдаж буй ОУХМ Бишрэлтийн Хорлоодой 52 кг-д, ОУХМ Батсүхийн Алтанцэцэг 57 кг-д, Баянмөнхийн Нармандах 66 кг-ын жинд барилдлаа.

АЗИ ТИВИЙН АВАРГА Б.БААСАНХҮҮ 48 КГ:

     Ази тивийн аварга шалгаруулах тэмцээний эмэгтэйчүүдийн 48 кг-ын жинд барилдсан Үндэсний шигшээ баг, “Сүлд” спорт хороо, “Имперо” группын тамирчин, ОУХМ Бавуудоржийн Баасанхүү Азийн аваргын алтан медалийн төлөө Өмнөд Солонгосын тамирчин Ли Хикёнгтой барилдаж үндсэн цагт цэвэр ялснаар Ази тивийн аврга боллоо. Ийнхүү тэрбээр  Монголын багийн эхний алтан медалийг эх орондоо авчирлаа. ОУХМ Б.Баасанхүү “булган сүүл”-тэй байж араасаа гурван алт, хоёр хүрэл медаль дагуулсан юм. Азийн аварга болсон ОУХМ Б.Баасанхүү хэдхэн хоногийн өмнө жүдо бөхийн УАШТ-д гурав дахь удаагаа түрүүлсэн билээ.

АЗИ ТИВИЙН АВАРГА Б.ЭРХЭМБАЯР 66 КГ:

       Ази тивийн аварга шалгаруулах тэмцээний эрэгтэйчүүдийн 66 кг-ын жинд барилдсан Үндэсний шигшээ баг, “Алдар” спорт хорооны тамирчин, ОУХМ Баттогтохын Эрхэмбаяр Ази тивийн аваргын алтан медалийн төлөө Япон Улсын тамирчин Шинсэй Хатторитой барилдаж ялснаар Ази тивийн аварга болж Монголын багийн хоёр дахь алтан медалийг хүртсэн юм.

АЗИ ТИВИЙН АВАРГА ГАВЬЯАТ ТАМИРЧИН Л. ЭНХРИЙЛЭН 57 КГ:

        Ази тивийн аварга шалгаруулах тэмцээний эмэгтэйчүүдийн 57 кг-ын жинд барилдсан Үндэсний шигшээ баг, “Сүлд” спорт хороо, “Блю Драгон” компанийн бөх, Монгол Улсын гавьяат тамирчин, дэлхийн аварга шалгаруулах тэмцээний хошой хүрэл медальт Лхагватогоогийн Энхрийлэн Азийн аваргын алтан медалын төлөө Өмнөд Солонгосын тамирчин Хух Мимитэй барилдаж ялснаар Ази тивийн аварга болсон. Тэрбээр Монголын багийн гурав дахь алтан медалийг авчирлаа. МУГТ Л.Энхрийлэн  ДАШТ-ээс хошой хүрэл медаль хүртэхдээ мөн л Солонгосын шилдэг жүдочин Хух Мимиг ялж байсан билээ. Харин ОУХМ М.Ичинхорлоо Азийн аваргын хүрэл медалийн төлөөх барилдаанд хожигдож, шагналт тавдугаар байрт шалгарлаа.

АЗИ ТИВИЙН АВАРГА Б.ХОРЛООДОЙ 52 КГ:

         Ази тивийн аварга шалгаруулах тэмцээний эмэгтэйчүүдийн 52 кг-ын жинд АНЭУ-ын нэр дээр барилдсан ОУХМ Бишрэлтийн Хорлоодой Азийн аваргын алтан медалын төлөө Япон Улсын тамирчинтай барилдсан. Японы тамирчин мэх хийхдээ толгойгоороо татамид зоогдож унасан учир торгууль авч, ОУХМ Б.Хорлоодой Ази тивийн аварга болов. Тэрбээр энэ удаагийн Ази тивийн аварга шалгаруулах тэмцээнд үнэхээр дайчин барилдаж, хүчтэй өрсөлдөгчдийг буулган авч түрүүлж чадлаа.

      АЗИ ТИВИЙН АВАРГЫН ХҮРЭЛ МЕДАЛЬ Л.СОСОРБАРАМ 52 КГ:

             Үндэсний шигшээ багийн тамирчин, Залуучуудын дэлхийн аварга, ОУХМ Лхагвасүрэнгийн Сосорбарам Азийн аваргын хүрэл медалийн төлөө Өмнөд Солонгосын тамирчин Жун Еэринтэй барилдаж үндсэн цагт цэвэр ялснаар эмэгтэйчүүдийн 52 кг жинд  Азийн аваргын хүрэл медаль хүртлээ.

              АЗИ ТИВИЙН АВАРГЫН ХҮРЭЛ МЕДАЛЬ Б.ЦОГТ-ОЧИР

            Үндэсний шигшээ баг, Эрдэнэт үйлдвэр ТӨҮГ, “Хангарьд”спорт клубийн тамирчин ОУХМ Бямбажавын Цогт-Очир Азийн аваргын хүрэл медалийн төлөө Казахстан Улсын тамирчин Нурканат Серикбаевтэй барилдаж нэмэлт цагт цэвэр ялснаар Ази тивийн аваргаас хүрэл медаль хүртлээ.