Киргизстан Улсын нийслэл Бишкек хотноо энэ сарын 19-21-ний өдрүүдэд “Парис-2024” зуны XXXIII наадмын эрх олгох тэмцээн үргэлжилнэ. Тус олимпын эрх олгох тэмцээн өнөөдөр эхэлж байна. Энэ удаагийн тэмцээнд манай эрэгтэй зургаа, эмэгтэй дөрвөн тамирчин барилдана. Эмэгтэй тамирчдаас МУГТ Д.Отгонжаргал 50 кг-ын жинд, ОУХМ Э.Дэлгэрмаа 68 кг-ын жинд ДАШТ-ээс мөнгөн медаль хүртэж, “Парис 2024” олимпын эрхийг авсан байгаа билээ. Харин үлдсэн олимпын дөрвөн жинд ОУХМ Б.Хулан 53 кг-д, ОУХМ Х.Болортуяа 57 кг-д, МУГТ П.Орхон 62 кг-д, ОУХМ Э.Даваанасан 76 кг-ын жинд тус тус өрсөлдөнө. Харин эрэгтэйчүүдийн олимпын зургаан жинд манай бөхчүүд ДАШТ-ээс эрх авч чадаагүй учраас, олимпын эрхийн төлөө зургаан бөх барилдах юм. Эрэгтэйчүүдийн 57 кг-ын жинд залуу тамирчин Б.Мөнх-Эрдэнэ, 65 кг-д ОУХМ Ц.Цогбадрах, 74 кг-д ОУХМ О.Сүлдхүү, 86 кг-д ОУХМ Б.Бат-Эрдэнэ, 97 кг-д ОУХМ Г.Ганхуяг, МУГТ  М.Лхагвагэрэл 125 кг-ын жинд хүч сорино.

            Зуны олимпын XXXIII наадмын чөлөөт бөхийн төрөлд жин тус бүрд дэлхийн шилдгийн шилдэг 16 тамирчин өрсөлдөх юм. Өнөөдрийн байдлаар жин тус бүрд 11 тамирчин олимпын эрхээ аваад байгаа. Үлдсэн таван квотын хоёр нь Бишкек хотноо эхлэх Азийн бүсийн тэмцээнээс тодрох бол хамгийн сүүлчийн дэлхийн эрхийн тэмцээн ирэх тавдугаар сард Туркийн нийслэл Станбул хотноо зохион байгуулагдаж, энэ тэмцээнээс Парисыг зорих хамгийн сүүлчийн тамирчдын нэрс тодрох юм.

                             ЭРЭГТЭЙЧҮҮДИЙН 57 КГ-ЫН ЖИНД Б.МӨНХ-ЭРДЭНЭ

         Олимпын эрх олгох Азийн тэмцээний 57 кг-д “Төгс” дэвжээний залуу тамирчин Батхуягийн Мөнх-Эрдэнэ Бишкекийн дэвжээнд хүч сорино. Тэрбээр чөлөөт бөхийн насанд хүрэгчдийн 2024 оны УАШТ-ий  эрэгтэйчүүдийн 57 кг-ын жинд алтан медаль хүртэж, олимпын эрхийн тэмцээнд өрсөлдөх болсон. Б.Мөнх-Эрдэнэ өнгөрсөн жил “U23” ангиллын залуучуудын дэлхийн аварга шалгаруулах тэмцээнээс хүрэл медальт хүртсэн билээ. Б.Мөнх-Эрдэнэ манай улсын ур чадвар нь өсч яваа шилдэг залуу бөхчүүдийн нэг юм.

                                 ЭРЭГТЭЙЧҮҮДИЙН 65 КГ-ЫН ЖИНД Ц.ЦОГБАДРАХ

        Зэвсэгт хүчний “Алдар” спорт хороо, “Аваргууд академи”-ийн тамирчин ОУХМ Цэвээнсүрэнгийн Цогбадрах олимпын эрхийн тэмцээний 65 кг-ын жинд хүч сорих юм. Сүүлийн жилийн УАШТ-ий 65 кг-ын жинд МУГТ Т.Тулга, ОУХМ Ц.Цогбадрах нарын өрсөлдөөн олны анхаарлыг татаж байгаа билээ. 2022 оны УАШТ-д Ц.Цогбадрах, өрсөлдөгчөө ялж, аваргалсан бол өнгөрсөн жил Т.Тулга хариугаа аван түрүүлж байв.  Харин энэ жилийн 2024 оны УАШТ-д ч тэд учраа бүрээ шороодуулсаар финалд дахин таарсан. Ялсан нь олимпын эрхийн тэмцээнд явах тун хариуцлагатай энэ барилдаан ширүүхэн өрнөж, Ц.Цогбадрах 4:2-оор ялалт байгуулсан юм. Ингэснээр тэрбээр насанд хүрэгчдийн УАШТ-ий гурав дахь алтан медалиа хүртсэн билээ.

                                 ЭРЭГТЭЙЧҮҮДИЙН 74 КГ-ЫН ЖИНД О.СҮЛДХҮҮ

      Олимпын эрх олгох Ази тивийн тэмцээний 74 кг-ын жинд  “Алдар” спорт хорооны тамирчин, өсвөр, залуучууд, насанд хүрэгчдийн УАШТ-ий хошой алтан медальт, Ази тивийн болон цэргийн ДАШТ-ий хүрэл медальт, ОУХМ Олонбаярын Сүлдхүү хүч үзнэ. Тэрбээр74 кг-ын жинд сүүлийн гурван жил дараалан насанд хүрэгчдийн улсын аварга болоод байгаа.  

                               ЭРЭГТЭЙЧҮҮДИЙН 86 КГ-ЫН ЖИНД Б.БАТ-ЭРДЭНЭ

      Олимпын эрхийн тэмцээний 86 кг-ын жинд “Хилчин” спорт хорооны тамирчин ОУХМ Бямбасүрэнгийн Бат-Эрдэнэ өрсөлдөнө. Тэрбээр 2024 оны насанд хүрэгчдийн УАШТ-д “Төв Арж” клубийн Н.Батбилгүүнийг ялж, УАШТ-ий гурав дахь алтан медалиа хүртэж, олимпын эрхийн тэмцээний эрхийг хүртсэн билээ..

                                   ЭРЭГТЭЙЧҮҮДИЙН 97 КГ-ЫН ЖИНД Г.ГАНХУЯГ

            Олимпын эрхийн тэмцээний 97 кг-ын жинд “Алдар” спорт хорооны тамирчин, Азийн аваргын хүрэл, "Ханжоу 2022" Азийн наадмын хүрэл, “U23” хүртэлх насны ДАШТ-ий хүрэл медальт, улсын харцага, ОУХМ Ганбаатарын Ганхуяг барилдана. Тэрбээр 2024 оны УАШТ-д Азийн аваргын хошой мөнгөн медальт, ОУХМ, улсын начин Ө.Батзултай шалгарсан үлдсэн. Ө.Батзул начин барилдалгүйгээр ялалтыг өгсөн тул Г.Ганхуяг Монгол Улсын аваргад түрүүлж, олимпын эрхийн тэмцээнд оролцохоор болсон.

                            ЭРЭГТЭЙЧҮҮДИЙН 125 КГ-ЫН ЖИНД М.ЛХАГВАГЭРЭЛ

       Олимпын эрх олгох Ази тивийн тэмцээний 125 кг-ын жинд МУГТ, ДАШТ-ий мөнгө, хүрэл медальт, Мөнхтөрийн Лхагвагэрэл барилдана. Тэрбээр 2024 оны УАШТ-ий алтан медалийн төлөөх барилдаанд “Ганьт” клубийн тамирчин, аймгийн начин Б.Одгэрэлийг 7:0-ээр хожиж олимпын эрхийн тэмцээнд оролцох эрхийг хүртсэн.

                                   ЭМЭГТЭЙЧҮҮДИЙН 53 КГ-ЫН ЖИНД Б.ХУЛАН

           Олимпын эрх олгох Ази тивийн тэмцээний эмэгтэйчүүдийн 53 кг-ын жинд, ДАШТ-ий мөнгөн медальт, “Аврагч” спорт хорооны тамирчин Батхуягийн Хулан барилдана. Тэрбээр 2024 оны насанд хүрэгчдийн УАШТ-ий алтан медалийн төлөөх барилдаанд МУГТ, олимп, дэлхийн аваргын хүрэл медальт, Бат-Очирын Болортуяаг ялж, олимпын эрхийн тэмцээнд оролцох эрхийг хүртсэн.

                               ЭМЭГТЭЙЧҮҮДИЙН 57  КГ-ЫН ЖИНД Х.БОЛОРТУЯА

         Олимпын эрх олгох Ази тивийн тэмцээний эмэгтэйчүүдийн 57 кг-ын жинд “Аврагч” спорт хорооны тамирчин, ОУХМ Хүрэлхүүгийн Болортуяа хүч сорино. Тэрбээр 2024 оны насанд хүрэгчдийн УАШТ-ий алтан медалийн төлөөх барилдаанд “Хилчин” спорт хорооны тамирчин, ОУХМ Болдсайханы Хонгорзулыг ялж, олимпын эрхийн тэмцээнд оролцох эрхийг хүртсэн.

                                     ЭМЭГТЭЙЧҮҮДИЙН 62  КГ-ЫН ЖИНД П.ОРХОН

         Олимпын эрх олгох Ази тивийн тэмцээний эмэгтэйчүүдийн 62 кг-ын жинд “Алдар” спорт хорооны тамирчин, дэлхийн аварга, МУГТ Пүрэвдоржийн Орхон барилдана. Тэрбээр 2024 оны насанд хүрэгчдийн УАШТ-ий алтан медалийн төлөөх барилдаанд “Алдар” спорт хорооны тамирчин, дэлхийн аваргын  алт, мөнгөн медальт, МУГТ Сүхээгийн Цэрэнчимэдийг ялж, олимпын эрхийн тэмцээнд оролцох эрхийг хүртсэн.

                                   ЭМЭГТЭЙЧҮҮДИЙН 76  КГ-ЫН ЖИНД Э.ДАВААНАСАН

          Олимпын эрх олгох Ази тивийн тэмцээнд “Алдар” спорт хорооны тамирчин, Азийн аварга шалгаруулах тэмцээний хошой хүрэл, Иван Ярыгиний “Алтан гран при” тэмцээний алт, мөнгө, хүрэл, цэргийн их наадмын хүрэл, цэргийн ДАШТ-ий мөнгө, “Иван Поддубный” нэрэмжит мэргэжлийн лигийн тэмцээний хүрэл меадльт, ОУХМ Энх-Амарын Даваанасан хүч үзнэ. Тэрбээр 2024 оны насанд хүрэгчдийн УАШТ-д жин өгсөн 76 кг-ын жингийн  алтан медалийн төлөөх барилдаанд “Хилчин” спорт хорооны тамирчин Н.Загардуламыг ялж, олимпын эрхийн тэмцээнд оролцох эрхийг хүртсэн.