Хэнтий Аймгийн Хэрлэн сумын харьяат, “Чикара дожо”-ны тамирчин муайтай боксын хагас мэргэжлийн дэлхийн аварга Цэрэнхандын Амарсанаатай ярилцлаа . Тэрбээр 2024 оны гуравдугаар сарын 10-17-ны өдрүүдэд зохион байгуулагдсан тулааны урлагийн VI их наадмын, муайтай боксын дэлхийн аварга шалгаруулах тэмцээнд 57 кг-ын жинд тулалдан өрсөлдөгчдөө ялж, алтан медаль, аваргын бүсийг хүртсэн юм.

-Муайтайгийн хагас мэргэжлийн тэмцээнд түрүүлж, дэлхийн аварга болсон баяр хүргэе.

    -Маш их баярлалаа

-Миний дүү өөрийгөө танилцуулахгүй юу. Аль нутгийн хүүхэд вэ?

       -Намайг Цэрэнханд овогтой Амарсанаа гэдэг. Одоо 22 настай Хэнтий аймгийн төв Хэрлэн сум, Өндөрхаан хотод төрж, өссөн.

-Муайтайгаас өмнө боксын спортоор хичээллэж байсан юм уу?

       -Тийм ээ, муайтай боксын спортод орохоос өмнө сонирхогчдын боксын спортоор нэг жил гаруй хугацаанд хичээллэж үзсэн.

-Тулааны спортыг сонгож хичээллээд удаж байгаа юу?

     -Тулааны спортоор 2019 оноос эхлэн хичээллэсэн. Яг тасралтгүй гэвэл сүүлийн гурван жил тулааны спортоор хичээллэж байна.

-Тулааны спортод анх орсон түүхээ сонирхуулахгүй юу?

       -Би дунд сургуулийн сурагч байх үедээ хөнгөн атлетикаар хичээллэдэг байв. Тэгсэн нэг өдөр манай ангийн хөвгүүд хоорондоо боксоор хичээллэж байгаа талаараа ярив. Түүнээс хойш байнга л боксын талаар ярьдаг болов. Тэр боксын спортын талаарх яриа нь миний сонирхлыг их татах боллоо. Тэгээд л ангийнхаа хөвгүүдийг дагаж анх боксын спортоор сонирхон хичээллэж үзсэн.

-Дэлхийн аваргад өөртөө чинь тулалдсан тамирчид, муайтай боксоор дэлхийд хэр өндөр чансаатай боксчин байв аа?

     - Сая муайтай боксын дэлхийн аварга дээр дөрвөн орны тамирчинтай тулалдсан. Тэд бүгд улс улсынхаа муайтайгийн аварга, шилдэг тамирчид байсан. Тэр дундаас Америкын аварга Kyle Metzel хамгийн хүчтэй, шилдэг сайн тамирчин байлаа.

-Муайтайгийн сонрхогчдын дэлхийн аваргад хэдэнд түрүүлж, алтан медаль хүртсэн юм бэ?

    -Муайтай боксын дэлхийн аваргад дөрвөн ялалт байгуулан алтан медаль аваргын бүсийг авсан байгаа.

-Муайтайгаас гадна өөр ямар тулааны урлагийн ямар төрлүүдийн тэмцээнд оролцдог вэ?

      -Би хэвтээ барилдааны өчиг, боолт хийдэггүй, муайтай, кикбокс гэсэн босоо тулаантай спортын тэмцээнд л ордог.  

-Тулааны спортоор гаргасан амжилтуудаа танилцуулахгүй юу?

     -Муайтай боксын насанд хүрэгчдийн улсын аварга шалгаруулах тэмцээнээс хоёр алтан медаль, нэг мөнгөн медаль, төвийн бүсийн кикбоксын аварга шалгаруулах тэмцээнээс нэг алтан медаль авч байсан. Мөн мэргэлжлийн кикбоксын тулаанд анх удаа оролцож, нэг ялалт авч байлаа. Муайтай боксын сонирхогчын дэлхийн аваргын алтан медалийг 2023 онд, муайтай боксын хагас мэргэжлийн дэлхийн аварга шалгаруулах тэмцээний аваргын алтан медаль болон бүсний эзэн болсон.

-Ер нь муайтайгийн тулааныг харахад их хатуу, хүнд хэцүү тулаан хийдэг. Хөл, гарын цохилтоос гадна өвдөг, тохойны цохилтоос бэртэл, гэмтэл авах эрсдэл ихтэй байдаг биз?

      -Муайтай бокс, бусад тулааны урлагууд дундаас хамгийн их эрсдэл ихтэй, экстрим спорт. Муайтай боксын тэмцээнд маш их бэртэл, гэмтэл авдаг. Тийм болохоор тамирчнаас өндөр бэлтгэлжилт, тэсвэр хатуужил, золиос, эр зориг, чанд хатуу зүрх шаардсан хатуу спорт байгаа юм. Бэртэл, гэмтэл, эрсдэлээс айх юм бол муайтайгийн спортыг сонгож хичээллэх хэрэггүй.

-Сая хагас мэргэжлийн дэлхийн аварга боллоо. Мэргэжлийн муайтайгийн ДАШТ-д оролцох бодол бий юу?

     -Тийм ээ, одоо бэлтгэлээ сайн хийж байгаад мэргэжлийн тулаанд бүх хүч чадлаа дайчлан хичээж тулалдахыг бодож байгаа.

-Холимог тулааны мэргэжлийн холбоонд тулалдах уу?

     -Холимог тулааны спортын тэмцээнд оролцож үзэх сонирхол бол бий. Тийм бодол бол байгаа. Гэхдээ одоо арай цаг нь болоогүй байна.