Турк Улсын Анталия хотноо гуравдугаар сарын 7-10-ны өдрүүдэд Туркийн алдарт бөх Яшар Догу, Вэхби Эмре, Хамит Капланы нэрэмжит олон улсын тэмцээн зохион байгуулагдаж билээ. Тус тэмцээний эмэгтэйчүүдийн 76 кг-ын жинд барилдаж хүрэл медаль хүртсэн, “Хилчин” спорт хорооны тамирчин, ОУХМ Найгалсүрэнгийн Загардуламтай ярилцлаа.

–Туркийн алдарт бөх Яшар Догугийн нэрэмжит  тэмцээний 76 кг-ын жинд хүрэл медаль хүртсэнд баяр хүргэе.

        -За баярлалаа.

-Миний дүү өөрийгөө танилцуулахгүй юу. Хэдэн настай, аль аймгийн уугуул хүүхэд вэ?

        -Би Өвөрхангай аймгийн Нарийнтээл суманд төрж өссөн. Чөлөөт бөхөөр жаахан оройтож, ерөнхий боловсролын дунд сургуулийн арванхоёрдугаар ангийг төгссөний дараагаас хичээллэж эхэлсэн.

-Олимп, дэлхийн медальт  Киргизийн Айпери Медет Кызы, Казахстаны  Эльмира Сыздыкова, Японы Нодока Ямамото нарын шилдгүүдийн хамт медаль хүртжээ?

           -Олимп, дэлхийн медальтай мундагуудтай нэг тавцанд зэрэгцэж зогсоод медаль авах сайхан л байлаа. Үнэхээр гоё мэдрэмж төрсөн шүү.

-Японы бөх Нодока Ямамотог огт танихгүй юм. Шинээр гарч ирж буй залуу бөх үү?

          - Нодока Ямамото Японы гурван номерын шилдэг тамирчин юм билээ. Ер нь Японы дотоодын өрсөлдөөн сайн болохоор нэг, хоёр, гурван номерын тамирчдын хэн нь ч олимп, дэлхий аваргад ширүүн өрсөлдөөн өрнүүлж, медаль хүртдэг.

-Туркийн тэмцээнд хэдэн барилдаан хийж хүрэл медаль хүртэв?

          -Туркийн Яшар Догугийн тэмцээнд дөрвөн барилдаан хийсэн. Зооны аваргын төлөөх барилдаанд л хожигдол хүлээсэн.

 -Олимп, дэлхийн медальтнуудтай хэр ширүүн өрсөлдөөн өрнүүлсэн бэ?

           -Ер нь өөрийнхөө хэмжээнд боломжийн л барилдсан гэж бодож байгаа. Дараа, дараагийн тэмцээнд таарвал илүү сайн барилдаж болохоор юм шиг санагдсан. Надад  тэднээс дутах зүйл байхгүй юм байна гэдэг ойлголтыг аваад ирсэн.

-2024 оны УАШТ-ээс мөнгөн медаль хүртсэн. Доод жингээс өгсөж орж ирсэн ОУХМ Э.Даваанасантай барилдахад хурд жаахан дутсан уу?

            -Энэ жилийн улсын аварга шалгаруулах тэмцээнээс мөнгөн медаль хүртсэндээ баяртай байгаа. Хурд дутсан гэхээсээ илүүтэйгээр буруу тактик сонгож барилдсан нь миний алдаа болсон.

-Ер нь танай 76 кг-ын жингийн бөхчүүд О.Бурмаа, Г.Ариунжаргал, Уртнасан, Э.Даваанасан гээд  хоорондоо тэнцүүхэн өрсөлдөөн өрнүүлэх юм. Гадны тэмцээнд явахад хэн нь ч медаль хүртэж чадах юм аа?

        -Тийм ээ, энэ сайхан өрсөлдөөн дундаас бид, хэн, хэнийгээ хурцалж, илүү сайжирна гэж боддог.

-Чөлөөт бөхөөс өмнө сагсан бөмбөгийн тамирчин байсан юм уу?

         -Үгүй ээ, сагсан бөмбөгийн спортоор хичээллэж байгаагүй. Гэрийнхээ ар талын сагсны шороон талбай дээр л тоглож өссөн.  Сагсан бөмбөгийн спортоор хичээллэх сонирхол байдаг л байлаа. Гэхдээ одоо нэгэнт л чөлөөт бөхийн спортод сэтгэлээ өгсөн болохоор сагсан бөмбөгийг сонирхол хобби болгоод л явж байна даа.

-Чөлөөт бөхөөр хичээллээд удаж байгаа юу.  Хэд дэх жилдээ хичээллэж

байна вэ?

          -Чөлөөт бөхөөр 2017 оноос хойш хичээллэж байгаа.

- З.Дүвчин багшийн шавь нар гол төлөв гар талласан барьцнаас барилддаг. Хөл мэх сайн хийдэг. Харин чиний барилдааны онцлог гэвэл?

      -Тийм ээ, гар таллахыг маш сайн сурахыг хичээж байгаа. Сайн сураад өөрийн болгож, цааш нь улам баяжуулна гэж бодож байна. Тэгэж чадвал энэ мэхээр олон тамирчдыг хожиж байх аа.

–Энэ сард олимпын эрхийн тэмцээн болно. Э.Даваанасан, та хоёр олимпын эрхийн тэмцээнүүдэд ээлжилж оролцох уу?

        -Тэрийг сайн мэдэхгүй байна. Монголын чөлөөт бөхийн холбооны шийдвэр ямар байхыг одоогоор таашгүй. Олимпын эрхийн эхний тэмцээнд явах хүндээ амжилт хүсээд л явуулна даа. Цаашид юу болохыг мэдэхгүй байна.

-2021 онд дэлхийн чансааны 13-т эрэмбэтэй байсан. Одоо дэлхийн чансааны хэддүгээрт эрэмбэтэй яваа вэ?

        -Дэлхий чансаанд урагшлаад найм руу орсон байсан. Харин одоо чансаагаа хараагүй л явна. Дараа жил сайн барилдахад чансаа дээшилчих байх аа.