Олон улсын жүдо бөхийн холбооны цуврал тэмцээнүүдийн нэг болох “Тбилисийн их дуулга” тэмцээн Гүрж Улсын нийслэлд өнөөдөр эхэлж байна. Манай жүдочид чанга сугалаа татжээ. Тус гранд сламаас жүдочид медаль хүртэх амаргүй шалгуурыг даван туулах болоод байна. Тбилисийн их дуулга тэмцээн энэ сарын 22-24-ний өдрүүдэд явагдах юм. Энэ удаагийн их дуулгад 83 орны эрэгтэй 296, эмэгтэй 235 нийт 531 жүдоч хүч үзнэ.

      Манай улсаас эрэгтэйчүүдийн 60 кг-ын жинд Б.Цогт-Очир, 81 кг-д Г.Болор-Очир, +100 кг-д О.Цэцэнцэнгэл, Ө.Пэрэлэйжамц, эмэгтэйчүүдийн 57 кг-ын жинд О.Оюунчимэг, 63 кг-д Б.Ганхайч, Л.Энхрийлэн, 70 кг-д Б.Ням-Эрдэнэ, -78 кг-д Б.Эрдэнэт-Од, О.Хүслэн, +78 кг-д Д.Номинзул, А.Адъяасүрэн нар барилдана.

ЭРЭГТЭЙ 60 КГ:

      Эрэгтэйчүүдийн 60 кг-ын жинд 36 тамирчин барилдана. Манай улсаас тус жинд ОУХМ Бямбажавын Цогт-Очир хүч үзнэ. Тэрбээр “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойргийн барилдаанд Тажикстаны Haqdod GULOV-той барилдана. Хэрэв түүнийг ялах юм бол гуравдугаар тойрогт Азербайжаны Balabay AGHAYEV-тай таарах магадлал өндөр байгаа.

ЭРЭГТЭЙ 81  КГ:

          Эрэгтэйчүүдийн 81 кг-ын жинд 53 тамирчин барилдана. Манай улсаас тус жинд ОУХМ Гэрэлтуяагийн Болор-Очир хүч үзнэ. Тэрбээр “А” хэсгийн нэгдүгээр тойрогт Гүржийн Zaur DVALASHVILI-тай барилдана.

ЭРЭГТЭЙ +100  КГ:

          Эрэгтэйчүүдийн +100 кг-ын жинд 31 тамирчин барилдана. Манай улсаас тус жинд ОУХМ Одхүүгийн Цэцэнцэнгэл, Өсөхбаярын Пэрэнлэйжамц нар хүч үзнэ. О.Цэцэнцэнгэл “В” хэсгийг толгойлон нэгдүгээр тойргийн барилдаанд Гүржийн  Saba INANEISHVILI-тай барилдана. Харин Ө.Пэрэнлэйжамц “С” хэсгийн нэгдүгээр тойрогт Индонезын  Gede Agastya Darma WARDANA I-тай таарсан. Хэрэв түүнийг ялах юм бол хоёрдугаар тойрогт Гүржийн дэлхийн аварга Guram TUSHISHVILI-тай таарах магадлал өндөр байгаа.

ЭМЭГТЭЙЧҮҮДИЙН 57  КГ:

         Эмэгтэйчүүдийн 57 кг-ын жинд 41 тамирчин барилдана. Манай улсаас тус жинд залуу тамирчин Оюунгэрэлийн Оюунчимэг хүч сорино. Тэрбээр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойргийн барилдаанд Словенийн амаргүй өрсөлдөгч Kaja KAJZER-тай барилдана. Арабын Нэгдсэн Эмиратын нэр дээр барилдаж буй ОУХМ Батсүхийн Алтанцэцэг “А” хэсгийн нэгдүгээр тойрогт Казахстаны Bakyt KUSSAKBAYEVA-тай таарсан байгаа.  

ЭМЭГТЭЙЧҮҮДИЙН 63  КГ:

           Эмэгтэйчүүдийн 63 кг-ын жинд 39 тамирчин барилдана. Манай улсаас тус жинд МУГТ Л.Энхрийлэн жин өгсөн барилдана. Мөн ОУХМ Болдын Ганхайч хүч сорих юм. Б.Ганхайч “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойргийн барилдаанд Чехийн Renata ZACHOVA-тай хүч үзнэ. Харин МУГТ Л.Энхрийлэн “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойргийн барилдаанд Косовогийн Laura FAZLIU-тай барилдах юм.

 ЭМЭГТЭЙЧҮҮДИЙН 70  КГ:

     Эмэгтэйчүүдийн 70 кг-ын жинд 37 тамирчин барилдана. Манай улсаас тус жинд ОУХМ Батсуурийн Ням-Эрдэнэ хүч үзнэ. Тэрбээр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойргийн барилдаанд Казахстаны Ekaterina TOKAREVA-тай таарсан.

ЭМЭГТЭЙЧҮҮДИЙН -78  КГ:

       Эмэгтэйчүүдийн -78 кг-ын жинд 25 тамирчин барилдана. Манай улсаас тус жинд Батбаярын Эрдэнэт-Од, Отгонбаярын Хүслэн нар барилдана. Б.Эрдэнэт-Од “В” хэсгийн нэгдүгээр тойрогт Литавын Migle Julija DUDENAITE-тай хүч сорино. Харин О.Хүслэн “С” хэсгийн нэгдүгээр тойрогт ОУХ-ын  Darya KANTSAVAYA-тай таарсан байгаа.

ЭМЭГТЭЙЧҮҮДИЙН +78  КГ:

        Эмэгтэйчүүдийн +78 кг-ын жинд 32 тамирчин барилдана. Манай улсаас тус жинд ОУХМ Амарсайханы Адъяасүрэн, Дамбадаржаагийн Номинзул нар хүч сорих юм. Д.Номинзул “А” хэсгийн нэгдүгээр тойрогт Хятадын хүчтэй өрсөлдөгч  Shiyan XU-тай таарсан. Харин ОУХМ А.Адъяасүрэн “С” хэсгийн нэгдүгээр тойрогт Бразилийн Beatriz SOUZA-тай барилдана.