Монгол Улсын боловсролын их сургуулийн нэрэмжит  “MNUE OPEN 2024” тэмцээн болж өндөрлөв. Тус тэмцээний өсвөр үеийн охидын 63 кг-ын жинд алтан медаль хүртсэн “Монголын жүдо академи”-ийн тамирчин Ганын Ундралтай ярилцлаа.

- “MNUE OPEN 2024” тэмцээний охидын 63 кг-ын жинд алтан медаль хүртсэнд баяр хүргэе.

       -Сайн байн уу. Танд баярлалаа.

-Миний дүү өөрийгөө манай уншигчдад танилцуулахгүй юу. Хэдэн настай, аль сургуулийн хэд дүгээр ангийн сурагч вэ?

      -Намайг Ган овогтой Ундрал гэдэг. Одоо 17 настай, Бүгд Найрамдах Солонгос Улсад төрж өсөөд, найман настайдаа Монгол Улсад ирсэн. Одоогоор “Мандах” лицэй ахлах сургуульд суралцдаг. Аравдугаар ангийн сурагч.

-Айлын хэд дэх хүүхэд вэ. Гэр бүлээ танилцуулахгүй юу?

     –Би айлын том хүүхэд. Доороо нэг эрэгтэй дүүтэй, Ам бүл дөрвүүлээ амьдардаг.

-Жүдо бөхөөр хэд дэх жилдээ хичээллэж байгаа вэ?

      -Жүдо бөхийн спортоор 2018 оноос хойш хичээллэж байгаа. Хөл хориог эс тооцвол зургаа дахь жилдээ хичээллэж байна.

-“Монголын жүдо академи”-ийн хэн багшийн шавь бэ?

      -Жүдо бөхөөр анх хичээллэж эхлэхдээ л “Монголын жүдо академи”-ийн дасгалжуулагч, Гэндэнгийн Бат-Эрдэнэ багшийн шавь болон орж байсан.

-Жүдо бөхийг бусад спортоос илүүтэйгээр яагаад сонирхон хичээллэх болов?

       -Би анх жүдо бөхөд өөрөө сонирхож ороогүй ээ. Аав маань жүдод сониролтой байсан болохоор дүү бид хоёрыг хамт оруулж байсан юм. Эхний хоёр сар л хүндрэлтэй юм шиг, хэцүү санагдсан. Цаг хугацаа  өнгөрөх тусам жүдод дуртай болоод, бэлтгэлдээ шамдаж, найзуудтай ч болсон. Тэгээд л жүдогоор хичээллэх дуртай болсон.

-Жүдо бөхийн чухам юу нь чамд илүүтэйгээр таалагдсан бэ?

      -Жүдо бөхийн дорно дахины уламжлалт ёс заншил, бусдыг болон бие, биенээ хүндлэх, хүндлэл нь таалагдсан.

-Жүдо бөхөөр хичээллэж байхад тань шантарч, мохох үе гарч байсан уу?

       -Өөрийн сонирхлын дагуу жүдогоор хичээлээгүй. Тийм  болохоор бэлтгэлд явах үедээ л ер нь больдог ч юм уу гэж боддог байсан. Гэхдээ чадахгүй юм байна лээ. Гурван сар гэртээ суугаад гам барьж ч чадахгүй, бэлтгэл хиймээр санагдаад байдаг болчихсон.

-Жүдогоор хичээллэсэн үеэс хойших томоохон амжилтууддаа дурдахгүй юу?

         -Жүдо бөхийн 2021оны өсвөр үеийн УАШТ-ий алт, 2023, 2024 оны залуучуудын УАШТ-ээс дараалан хүрэл медаль хүртэж байсан. 2023 оны “U23” насны ангиллын хүрэл медальтай.

-Сэтгэлд тань хоногшин үлдсэн хамгийн сайхан барилдааныг хэзээ хийж байв?

     -2023 онд залуучуудын УАШТ-ий барилдаанууд л сэтгэлд хоногшсон үлдсэн. Өмнө нь дандаа хожигдож байсан өрсөлдөгч нараа ялж хүрэл медаль хүртсэн болохоор дурсамжтай санагддаг.

-Монголын жүдогийн хөнгөн жингийн бөхчүүд дэлхийд алдартай. Одоо 63 кг-ын жинд ОХУМ Б.Ганхайч дэлхийд өрсөлдөж байгаа. Залуу тамирчдаас Х.Маралмаа, Д.Есүй нар шинээр гарч ирж байна. Өсвөр үе, залуучуудын тэмцээнд  энэ хоёртой өрсөлдөж байв уу?

      -Х.Маралмаатай ер нь тэмцээнд бүхэн дээр байнга таардаг. Өгөө, аваатай энэ тэнцүүхэн яваа л гэж бодож байна. Харин Д.Есүйтэй хоёр удаа таарсан санагдана. Одоогоор нэг ч ялж үзээгүй. Тэр маш хүчтэй өрсөлдөгч.

-Чөлөөт цагаараа жүдо бөхөөс гадна өөр юу хийх дуртай вэ?

       -Зураг зурж, хоол хийх хоббитой. Ер нь л боломж олдвол ганцаараа дуртай зүйлээ хийгээд суудаг.

-Ирээдүйн зорилго, мөрөөдлөөсөө хуваалцахгүй юу?

        -Мэдээж тив, дэлхийн аварга болохыг мөрөөддөг. Гэхдээ ойрын зорилго бол өсвөр үе, залуучуудынхаа ДАШТ-д оролцох л байна даа.

-Дунд сургуулиа төгсөөд ямар мэргэжил сонгох вэ. Жүдо бөхөөрөө үргэлжлүүлээд хичээллээд явах уу?

     -Мэргэжлээ одоохондоо сонгоогүй л байна. Ямартай ч эдийн засгийн чиглэлээр суралцана. Жүдогоор цаашаа хичээллэх сонирхол мэдээж байгаа. Гэхдээ хичээл, мэргэжлээ хаяхгүй байх зарчимтай гэх үү дээ.