Монголын муайтайгийн тамирчин, дэлхийн аварга Намжилмаагийн Бат-эрдэнэ гуравдугаар сарын 12-ны өдөр дэлхийн аваргын бүсээ хамгаалах тулаан хийсэн билээ. Муайтайгийн дэлхийн аварга шалгаруулах тэмцээний 62 кг-ын жинд аваргын бүсээ амжилттай хамгаалсан Н.Бат-Эрдэнэтэй ярилцлаа.

 -Муайтайгийн “World super muaythai championships”-ийн 62 кг-ын жинд тулалдаж дэлхийн аваргын бүсийг эх орондоо авчирсанд баяр хүргэе.

        - Баярлалаа

 -Дэлхийн аваргад өөртөө чинь тулалдсан Өмнөд Африкийн Нкедо Гомба муайтай боксоор дэлхийд хэр өндөр чансаатай боксчин байв аа?

     - Өмнөд Африкийн Нкедо Гомба маш өндөр чансаатай тамирчин. Тайланд Улсын бүстэй шилдэг тамирчидтай тулалдаж байсан тамирчин.

-Муайтай бокс, олимпын бус спортын төрөл, муайтай боксын сонрхогчдын болон мэргэжлийн тэмцээнүүд тус тусдаа зохиогддог уу?

        -Тийм ээ, муайтайгийн сонирхогчийн болон мэргэжлийн тэмцээнүүд тус тусдаа болдог.

 -Өмнө нь хэзээ муайтай боксын дэлхийн аварга болсон юм бэ?

       - 2023 оны гуравдугаар сард “WMO” муайтай холбооны хагас мэргэжлийн тулааны дэлхийн аварга болсон.

-Сая дэлхийн аваргын бүсээ хамгаалах тулаан байсан юм уу?

       -Тийм ээ, дэлхийн аварга хамгаалаад бас дэлхийн “Supreme аварга”-ын төлөө тулалдсан.

 -Муайтай Тайландын үндэсний спорт, тайландууд муайтайгаар дэлхийд ноёрхдог. Танай жинд Тайландын дэлхийн аварга тамирчид бий юу?

       -Манай жинд Тайландын шилдэг хоёр тамирчин байгаа .

-Тайландын “Төмөр шиг биетэй” шилдэг тамирчидтай тулалдаж байсан уу?

       -Тийм ээ,  Тайландын олон тамирчинтай, мундаг аварга тамирчидтай тулалдаж байсан. Бас мэргэжлийн муайтайгийн аваргын бүсний тулаан хийж, нэг өдөр гурван ялалт байгуулж байлаа. Гэтэл тэр тамирчин аваргын бүсээ өгөхгүй гэж байсан ч үе бий.

-Яагаад ийм хүнд, эрсдэл ихтэй тулааны спортын төрлийг сонгон хичээллэх болов?

      -Хичээллэж эхэлсэн цагаасаа л бага багаар татагдаад байсан. Цаг хугацаа  өнгөрөх тусам  муайтайд улам их дурлаж, илүү дуртай болсон.

 -Тулааны спортоор хичээллээд удаж байгаа юу?

            -Одоо 13 дахь жилдээ хичээллэж байна

-Анх ямар тулааны төрлөөр хичээллэж байв аа?

        - Муайтай болон кикбоксын спортоор анхлан хичээллэсэн.

-Өөрийн чинь тулааныг харахад суурь сайтай, цохилт даах тэсвэрийн чадвартай, хөл, гарын хүнд, хүчтэй цохилттой юм шиг санагдсан. Саяын тулалдсан тамирчныг хүч, техникээр  илүүрхэн ялсан уу?

   -Маш туршлагатай, мундаг тамирчинтай тулалдсан болохоор ойролцоо тулалдсан .

-Энэ онд ямар тулааны тэмцээнүүдэд оролцохоор төлөвлөж байна вэ?

         -Камбож Улсаас урилга ирсэн байгаа. Камбожийн үндэсний тулааны спорт  “kun khmer”-ийн  дэлхийн аваргын төлөөх тулаанд урьсан.

–Сонирхогчдын болон мэргэжлийн бокс, кик боксын тэмцээнүүдэд орж байсан уу?

      -Тиймээ мэргэжлийн муайтай болон кикбоксоор олон тулаан хийсэн.

-Одоо дараагийн зорилго, хүсэл мөрөөдөл юу байгаа вэ?

      -Дахин 2-3 дэлхийн аваргаар  тулаан зогсохгүй байх аа. Үргэлжлээд явна байх.