Казахстан Улсын Алмата хотод "Сидней-2000"   олимпын наадмын аварга Ермахан Ибраимовын нэрэмжит боксын олон улсын тэмцээн болсон билээ. Тус тэмцээний 50 кг-ын жинд хүрэл медаль хүртсэн Энх-Амгалангийн Номундарьтай ярилцлаа.

  –Казахстаны олимпын  аварга  Ермаханы нэрэмжит олон улсын тэмцээнээс хүрэл медаль хүртсэнд баяр хүргэе.

       -Танд баярлалаа.

 -Миний дүү өөрийгөө танилцуулахгүй юу. Хэдэн настай, аль сургуулийн сурагч вэ?

           -Намайг Энх-Амгалангийн Номундарь гэдэг. Би одоо 18 настай. Нийслэлийн ерөнхий боловсролын 7-р дунд сургуулийн 12-ын “В” ангид сурдаг.

 –Яагаад  тулааны спорт, боксыг сонгон хичээллэх болов?

          -Боксын тамирчид бэлтгэл хийж байхыг анх удаа хараад л сэтгэл өөрийн эрхгүй татагдсан. Тэдний бэлтгэл сонирхолтой санагдсан. Тэгээд л маргаашнаас нь секцэд бүртгүүлж, бэлтгэл хийж эхэлсэн дээ.

–Боксын спортоор хичээллээд удаж байгаа юу.  Хэд дэх жилдээ хичээллэж байгаа вэ?

           -Боксын спортоор хичээллээд нэг их удаагүй. Одоо гурав дахь жилийнхээ нүүрийг үзэж байна.

–Боксын тулааны эрдмийг хэн багшаар анх заалгав. Одоо хэн багшийн шавь бэ?

         -Анх боксын “Radiance” клубийн Санаа багшийн шавь болж орж байлаа. Харин одоо Гаваа, Санаа хоёр багшийнхаа удирдлага доор боксын спортоор үргэлжлүүлэн хичээллэж байгаа.

-Казахстаны олон улсын тэмцээний 50 кг-ын жинд хэдэн тулаан хийж хүрэл медаль хүртсэн бэ?

        -Казахстаны олон улсын тэмцээнээс 2023 оны залуучуудын Ази тивийн аварга охиныг ялж, хүрэл медаль хүртсэн.

 –Түрүү жил энэ тэмцээнээс медаль хүртэж байсан юм уу?

        -Түрүү жил 2023 онд тус олон улсын тэмцээнд хоёр ялж, гуравдугаар тойргийн тулаанд Казахстаны Азийн аварга охинд хожигдож хүрэл медаль хүртсэн юм. Тэр Азийн аварга охиныг энэ жил ялж, хариугаа авч хүрэл медаль хүртсэн.

–Хамгийн хүнд ширүүн өрсөлдөөнийг аль улсын боксчинтой хийв?

        -Хамггийн хүчтэй ширүүн өрсөлдөгч Узбекистан Улсын тамирчин байлаа.

 -Голчлон ямар тактикаар, гарын ямар цохилтуудыг хийж тулалддаг вэ?

          -Би ерөнхийдөө угтуулсан шулуун цохилтуудаар олон угсраа цохилт хийхийг хичээж тулалддаг.

–Зүүн Азийн залуучуудын наадмаас өмнө өсвөр үе, залуучуудын олон улсын тэмцээн, Ази тивийн аварга, ДАШТ-д тулалдаж байсан уу?

           -Зүүн Азийн залуучуудын наадмын хүрэл медалтай. 2022-2023 онуудын Азийн аварга шалгаруулах тэмцээнд оролцож байсан.

 -Боксоор өөрийнхөө гаргасан томоохон амжилтуудыг сонирхуулахгүй юу?

          -Миний үзүүлсэн амжилт гэвэл 2022 оны өсвөрийн УАШТ-ээс алтан медаль хүртэж, “Шилдэг тамирчин”-ы шагналыг авч байлаа. 2023 оны залуучуудын УАШТ-ээс алтан медаль хүртэж, мөн “Шилдэг тамирчин” шагналыг хүртсэн.  2023 оны Зүүн Азийн наадмын хүрэл медальтай.  2023, 2024 онд  Казахстан Улсад зохион байгуулагдсан олон улсын тэмцээнээс дараалан хүрэл медаль хүртээд байгаа.