Чөлөөт бөхийн “U23” хүртэлх насны УАШТ 2024 оны хоёрдугаар сарын 24-25-ны өдрүүдэд "Алдар" спорт хорооны зааланд явагдаж өндөрлөлөө. Тус УАШТ-ий эмэгтэйчүүдийн 57 кг-ын жинд алтан медаль хүртсэн Спортын төв сургуулийн тамирчин, “Сити” их сургуулийн оюутан  Мягмарсүрэнгийн Номин-Эрдэнэтэй ярилцлаа.

 –Чөлөөт бөхийн “U23” насны ангиллын улсын аварга шалгаруулах тэмцээний 57 кг-ын жинд түрүүлсэнд баяр хүргэе.

        -Танд их баярлалаа.

 -Миний дүү өөрийгөө танилцуулахгүй юу. Хэдэн настай, аль сургуулийн хэд дүгээр ангийн сурагч вэ?

           -Намайг Мягмарсүрэнгийн Номин-Эрдэнэ гэдэг. Би одоо энэ жил 20 нас хүрч байна. 2022 онд ерөнхий боловсролын 45 дугаар сургуулийг төгссөн. Одоо “Citi”  их сургуулийн Англи хэлний хоёрдугаар курсийн оюутан.

-Чөлөөт бөхөөр хичээллээд удаж байгаа юу.  Хэд дэх жилдээ хичээллэж

байна вэ?

           -2017 оны аравдугаар сард чөлөөт бөхөөр анх хичээллэж эхэлсэн. Одоо долоон жил болох гэж байна.

-Бөхийн эрдмийг хэн багшаар анх заалгав. Одоо хэн багшийн шавь бэ?

          -Анх чөлөөт бөхийн секцэнд ороод Доржваанчигийн Гомбодорж багшийн шавь болсон. Одоо ч гэсэн бэлтгэл, сургуулилалтаа Д.Гомбодорж багшийнхаа удирдлага доор хийж байгаа.

-Чөлөөт бөхөөр өөрийнхөө гаргасан томоохон амжилтуудыг сонирхуулахгүй юу?

          -Өсвөр үеийн улсын аварга шалгаруулах тэмцээнд хоёр удаа түрүүлж байсан. “U20” ангиллын УАШТ-ээс алтан медаль хүртэж байлаа. Чөлөөт бөхийн 2023, 2024 оны насанд хүрэгчдийн УАШТ-д хүрэл медалийн болзол хангасан. Өмнөх жил “U23” ангилалд хүрэл медаль хүртсэн. Харин энэ жил “U23” ангиллын УАШТ-ээс алтан медаль хүртсэндээ баяртай байна.

–Улсын аваргын алтан медалийн төлөөх барилдааныг  “Алдар” спорт хорооны О.Ариунзаяатай хийв үү. Тойргоор барилдсан уу?

         -Манай жингийнхэн тойргоор хоорондоо барилдсан. О.Ариунзаяатай эхний тойргийн барилдаанд учраа таарч 2:2-оор ялалт авсан байгаа.

-Энэ удаагийн УАШТ хэр ширүүн өрсөлдөөнтэй болов?

         -Энэ жилийн “U23” ангиллын УАШТ  их ширүүн өрсөлдөөнтэй болсон.

- “U23” насны улсын аваргын алтан медалийн төлөө ямар тактикаар барилдав. Алтан медаль хүртэж чадна гэдэгтээ хэр итгэлтэй байв аа?

           -Алтан медаль авч чадна гэж, өөрийгөө хурцлаад л дэвжээнд гарсан. Тийм болохоор тэр зорилгодоо хүрэхийн төлөө их хичээж барилдлаа. Өөрийн чадах, хийх зүйлээ хийгээд үзнэ гээд өөрийгөө зоригжуулсан. Хичээж, зүтгэн зорилгодоо хүрсэндээ баяртай байна.

-Чиний барилдааны онцлог гэвэл. Босоо болон хэвтээ барилдаанд ямар мэхийг голчлон хийдэг вэ. Дархан хийдэг, гарсан мэх байгаа юу?

           -Би босоо барилдаанаас ихэвчлэн хөл авдаг. Харин хэвтээ барилдаанд гол төлөв накат шахах, крест хийхийг хичээдэг. Дархан хийдэг, гаршиж байгаа мэх гэвэл хөлийг тойрч сууж авах мэхийг хэлж болох байх.

-Бөхөөс өмнө өөр спортын ямар нэгэн өөр төрлөөр хичээллэж байсан уу?

        -Чөлөөт бөхөөс өөр спортоор хичээллэж байгаагүй. Шууд л чөлөөт бөхийн спортыг анх сонгож хичээллэж эхэлсэн.

-Энэ жил насанд хүрэгчдийн УАШТ-д барилдсан уу?

          -Энэ 2024 оны насанд хүрэгчдийн УАШТ-ий 55 кг-ын жинд барилдаж хүрэл медаль авсан байгаа.

-Цаашдын зорилго, мөрөөдлөөсөө хуваалцахгүй юу?

          -Өөрийн сонгосон чөлөөт бөхийн спортоороо амжилт гаргаж, олимп, дэлхийн аварга болох мөрөөдлийг тээж яваа.