Итали Улсад болсон жүдо бөхийн өсвөр үеийн “Follonica,Italy Cadet European Cup 2024”, Испани Улсад болсон “Fuengirola cadet European cup 2024”  цуврал олон улсын тэмцээний хөвгүүдийн 55 кг-ын жинд хос алтан медаль хүртсэн Батбилэгийн Бат-Энэрэлтэй ярилцлаа. Тэрбээр  “Мон-Алтиус Цагаанбаатар Академи”-ийн тамирчин, “Мон-Алтиус” ахлах сургуулийн 11-ийн “А” ангийн сурагч юм.

–Итали Улсад болсон “IJF”- ын ­Европын өсвөр үеийн  цомын тэмцээнээс алтан медаль хүртсэнд баяр хүргэе.

            -Баярлалаа. Италийн “Follonica, Italy Cadet European Cup 2024” тэмцээнээс надаас гадна Ж.Анударь 48 кг-д алтан медаль, Т.Ариунзаяа 57 кг-д мөнгөн медаль, Б.Шинэтулга 73 кг-д хүрэл медаль хүртсэн. Харин 63 кг-ын жингийн хүрэл медалийн төлөөх барилдаанд Х.Маралмаа, 57 кг-д М.Цэндбазар нар сайн барилдсан хэдий ч хожигдол хүлээж шагналт тавдугаар байрт орсон байгаа. Харин Испанийн тэмцээний 52 кг-д Ж.Анударь алтан медаль, 60 кг-д Ч.Бодьрагчаа хүрэл, 57 кг-д Т.Ариунзаяа алтан медаль, +90 кг-д Б.Тэмүүлэн шагналт V байрт шалгарсан амжилттай оролцсон.

-Миний дүү өөрийгөө танилцуулахгүй юу. Хэдэн настай,  хэд дүгээр ангийн сурагч вэ?

         -Намайг Батбилэгийн Бат-Энэрэл гэдэг. Би “Мон-Алтиус Цагаанбаатар Академи”-ийн тамирчин, “Мон-Алтиус” ахлах сургуулийн 11-ийн “А” ангийн сурагч.

-Жүдо бөхөөр хичээллээд удаж байгаа юу.  Хэд дэх жилдээ хичээллэж байгаа вэ?

         -Жүдо бөхөөр сонирхож хичээллээд дөрвөн жил болж байгаа.

–Европын цомын тэмцээний аваргын төлөөх барилдаан хэр ширүүн өрсөлдөөнтэй болов?

           -Итали Улсад болсон тэмцээний аваргын алтан медалийн төлөө их сайн барилддаг хүүхэдтэй таарсан. Барилдааны эхэнд шүүгч намайг идэвхгүй барилдлаа гэж хоёр удаа торгосон. Торгуулиар ялагдахгүйн тулд урагшаа явж барилдахаас өөр аргагүй болсон. Хичээж зүтгэсний үр дүнд түүнийг ялсан. Итали Улсын тэмцээнээс алтан медаль хүртсэн болохоор Испани Улсад болсон тэмцээнд өөртөө итгэлтэй, илүү тайван барилдаж Португаль Улсын тамирчинг ялж, түрүүлэн алтан медаль хүртсэн.

–Европын өсвөр үеийн цомын тэмцээний алтан медалийн төлөөх барилдаанд ямар тактикаар барилдав. Алтан медаль хүртэж чадна гэдэгтээ хэр итгэлтэй байв аа?

            -Ер нь Европын цуврал тэмцээнд түрүүлж алтан медаль авна гэсэн зорилго тавьж явсан. Тийм болохоор өөртөө итгэлтэй барилдсан. Италийн тэмцээний алтан медалийн төлөөх барилдаанд босоогоос барилдаанаа сайн гаргаж чадахгүй байсан. Хоёр торгуулиад, торгуулиар хожигдож мэдэх байдалтай болсон юм. Тийм болохоор өрсөлдөгчийн алдаан дээр ажиллаж хэвтээ барилдаанд шилжүүлэн түүнийг даралтаар ялсан байгаа.

-Тус тэмцээнд хэдэн барилдаан хийв. Аваргын алтан медалийн төлөө ямар улсын жүдочин хүүхэдтэй барилдсан бэ?

            -Итали Улсад болсон тэмцээнд нийт таван барилдаан хийж алтан медаль хүртсэн. Финалд Польш Улсын хүүхэдтэй барилдаж хожсон.

-Ер нь Европ тивийн хүүхдүүд барилдааны ур чадвар ямар санагдав. Хэр ширүүн өрсөлдөгчид байна. Тэдний барилдааны давуу болон сул тал нь юу байв аа?

         -Европ тивийн улс орнуудын хүүхдүүд босоо, хэвтээ барилдааны залгаас сайтай байна. Шилжилт хөдөлгөөн, мэхний гүйцэтгэл нь давгүй юм шиг санагдсан. Тэд тактикийн барилдааныг маш сайн хийдэг онцлогтой юм билээ.

-Чиний барилдааны онцлог гэвэл. Босоо болон хэвтээ барилдаанд ямар мэхийг голчлон хийдэг вэ. Дархан хийдэг, гаршсан мэх байгаа юу?

          -Би босоо барилдаанаас үүрэх мэхийг гол төлөв хийдэг. Харин хэвтээ барилдаанд өчих, боох мэхийг хийнэ, даралт авна.

 –Түрүү жилийн Европын өсвөр үеийн цомын тэмцээнд барилдсан уу?

       -Өмнөх жилийн Европын цуврал тэмцээнд оролцоогүй.

- Энэ тэмцээнээс өмнө өсвөр үеийн олон улсын тэмцээн, Ази тивийн аваргад барилдаж байв уу?

          -Жүдо бөхийн өсвөр үеийн Азийн аварга шалгаруулах тэмцээнд хүрэл медалийн төлөөх барилдаанд хожигдож, шагналт тавдугаар байрт шалгарч байсан.

-Чөлөөт цагаараа жүдо бөхөөс гадна өөр юу хийх дуртай вэ?

       - Бэлтгэлгүй үед, чөлөөт цаг гарвал аль болохоор сайн амарч, сэргэлт авахыг хичээдэг.  Чөлөөт цагаараа  дуу сонсох, кино үзэх дуртай.