“Женко” клубийн чөлөөт бөхийн тамирчин, өсвөр үеийн ДАШТ-ий хүрэл медальт, Бат-Эрдэнийн Эрдэнэсувдтай ярилцлаа. Тэрбээр “Белград-2022”  насанд хүрэгчдийн ДАШТ-ий хүрэл медалийн төлөө барилдаж, тавдугаар байрт шалгарч байсан билээ.

 -Миний дүү өөрийгөө танилцуулахгүй юу?

         -Намайг Бат-Эрдэний Эрдэнэсувд гэдэг. Ховд аймгийн Булган суманд 2001 оны арванхоёрдугаар сарын 30-ны өдөр төрсөн.

- Өсвөр үе, залуучуудын УАШТ, олон улс, тив, ДАШТ-д гаргасан амжилтуудаа сонирхуулахгүй юу?

        -Өсвөр үеийн улсын аваргын алт, хүрэл медальтай. Мөн "Загреб 2018" өсвөр үеийн дэлхийн аварга шалгаруулах тэмцээнээс хүрэл медаль хүртэж байсан. 2016 оны "Азийн хүүхдүүд" олон улсын наадмын аварга, залуучуудын улсын аваргын хүрэл медальтай.

-Өсвөр үеийн ДАШТ-д хэдэн кг-ын жинд барилдаж хүрэл медаль хүртсэн юм бэ?

    -"Загреб-2018" өсвөр үеийн ДАШТ-д 53 кг-ын жинд барилдсан. ДАШТ-ий тэгшитгэлд Хорватын Лаура Цицковичийг оноогоор цэвэр ялсан. Шигшээ барилдаанд Египет Хала Имбаби Ахмедийг 6:1-ээр хожоод, Унгарын Николетт Нагиг 10:0-ээр оноогоор цэвэр ялсан. Улмаар АНУ-ын Лейла Кастрог 6:0-ээр ялж, ДАШТ-ээс хүрэл медаль хүртсэн.

-Чөлөөт бөхөөр хэд дэх жилдээ хичээллэж байгаа вэ?

         -Ер нь бол чөлөөт бөхөөр арван дахь жилдээ хичээллэж байгаа. Гэхдээ дунд нь 2020-2021 онд завсарлага авсан тал бий.

 -Чөлөөт бөхийн спортын чухам юу нь сонирхлыг тань татах болов. Багадаа ямар спортоор хичээллэж байсан бэ?

           -Жаахан байхдаа спортын талаар ямар ч мэдэгдэхүйнгүй байсан. Багадаа чөлөөт бөхийн аймгийн аваргын тэмцээнд орж, барилдаад түрүүлсэн юм. Тэр үед аав, ээж маань маш их баярласан. Тэгээд намайг дэмжиж бөх болгохоор Улаанбаатар хот руу явуулсан.  

-Бага нас нь хаана өнгөрөв. Хэдэн настай байх даа чөлөөт бөхийн спортоор хичээллэв ээ?

        -Ховд аймгийн Булган суманд төрж, өссөн.  2014 оны намар хотод ирсэн. Тэгээд олимп, дэлхийн хүрэл медальт, МУГТ Б.Болортуяа эгчийг дагаж “Женко” клубт очиж,  Монгол Улсын гавьяат тамирчин, Б.Оюунсүрэн багшийн шавь болж, чөлөөт бөх гэдэг их спортын зам хөл тавьж байлаа.

 –Өөрийн чинь цаашдын спортын зорилт, зорилго гэвэл юу байна вэ?

         -Эхлээд Монгол Улсынхаа аварга шалгаруулах тэмцээнд түрүүлэх зорилго байна. Тэгэж байж л гадаадын тэмцээн, уралдаанд барилдах эрхээ авах хэрэгтэй байгаа. Дараа нь тэгээд барилддаг хүн болгоны зорилго олимп, дэлхийн аваргад амжилттай барилдахыг хүсэж байна.

-–С.Мөнхсүх багш чинь чамайг ДАШТ-ээс медаль хүртэх бүрэн боломжтой тамирчин гэж байсан. Дэлхийн аваргын медалийн төлөө барилдах үед туршлага, сэтгэл зүй жаахан дутагдав уу?

          -Дэлхийд аваргын хүрэл медалийн төлөөх барилдаанд Европын аваргын мөнгөн медальт Польшийн бөх Жовита Вржесиенг 2:1-ээр хожиж яваад эцсийн мөчид хоёр оноо алдаж хожигдсон. Сэтгэл зүй гэхээсээ илүүтэйгээр туршлага дутаад л хожигдсон. ДАШТ-ий хүрэл медалийн төлөөх барилдаанаа дуусгаад, дэвжээнээс бууж ирээд их харамссан.

-2023 оны УАШТ-д Э.Сумъяаг ялж, улсын аварга болсон байх аа?

          -Тийм ээ, 2023 оны УАШТ-ий ОУХМ Э.Сумъяа эгчтэй барилдсан. Дэлхийн аваргын сорилт тэмцээнд Т. Алтжинтай барилдаж ялаад ДАШТ-д явсан.

-2023 оны ДАШТ-д очоод бэртлийн улмаас барилдаагүй. Дэлхийн аваргын бэлтгэл дээр бэртэл авчихсан уу?

      -Харин тийм ээ,“ Белград-2023” чөлөөт бөхийн дэлхийн аварга шалгаруулах тэмцээнд барилдахаар Сербийн Белград хотод очиж бэлтгэл хийж байгаад бэртэл авсан.

-Одоо бэртэл нь бүрэн эдгэсэн үү?

     -Үгүй ээ, бэртэл бүрэн эдгээгүй байгаа. Одоо хүртэл эмчилгээ хийлгээд л явж байгаа.

 -Энэ жил 2024 оны улсын аварга шалгаруулах тэмцээнд барилдав уу?

         -Тийм ээ, энэ жилийн УАШТ-д барилдсан.

–Чөлөөт бөхийн УАШТ-д хэдэн удаа түрүүлээд байгаа вэ?

        -Анх 2022 оны УАШТ-д түрүүлж байсан. Түүний дараа жил 2023 онд мөн түрүүлсэн. Энэ жил санасандаа хүртэл барилдаж чадаагүй.

-Энэ онд олон улс, тив, дэлхийн ямар тэмцээнүүдэд оролцох төлөвлөгөөтэй байгаа вэ?

         -Энэ жил УАШТ-ээс өөр ямар ч тэмцээнд оролцохгүй гэсэн бодолтой байгаа. Тийм болохоор одоогоор оролцохоор төлөвлөсөн тэмцээн байхгүй.