Олимпын жилийн энэ оны анхны гран при тэмцээн Португаль Улсад амжилттай зохиогдож өчигдөр өндөрлөсөн билээ. Харин одоо “Парис 2024” олимпын наадам болох Франц Улсад жүдо бөхийн “Бага дэлхийн аварга” хэмээн нэрлэгддэг “Парис 2024” гранд слам тэмцээн ирэх хоёрдугаар сарын 2-4-ний өдрүүдэд болох гэж байна. Өнөөдрийн байдлаар Парисын их дуулга тэмцээнд 111 орны эрэгтэй 388, эмэгтэй 279, нийт 667 жүдочин барилдах мэдүүлэг өгөөд байна. Манай улсаас эрэгтэй найм, эмэгтэй 10 тамирчин барилдах мэдүүлэг өгчээ.

ЭРЭГТЭЙ 60 КГ:

          Эрэгтэйчүүдийн 60 кг-ын жинд одоогоор 50 тамирчин барилдах мэдүүлэг өгсөн байна. Манай улсаас ДАШТ-ий мөнгөн медальт, ОУХМ Энхтайваны Ариунболд, ОУХМ Энхтайваны Сумъяабазар нар барилдана.  Харин Казахстаны Yeldos SMETOV аварга ,  Испанийн Francisco GARRIGOS, Өмнөд Солонгосын LEE Harim, Тайванийн YANG Yung Wei, Гүржийн Giorgi SARDALASHVILI, Lukhumi CHKHVIMIANI , Францын Luka MKHEIDZE, Украины Dilshot KHALMATOV, Artem LESIUK нарын шилгүүд барилдах бололтой.

ЭРЭГТЭЙ 66 КГ:

     Эрэгтэйчүүдийн 66 кг-ын жинд 66 бөх барилдах мэдүүлэг өгөөд байгаа. Манай улсаас ДАШТ-ий хошой хүрэл медальт, МУГТ Ёндонпэрэнлэйн Басхүү, ОУХМ Баттогтохын Эрхэмбаяр, АНЭУ-ын нэр дээр Баянмөнхийн Нармандах нар хүч сорино. Энэ жинд Японы Joshiro MARUYAMA аварга,  Өмнөд Солонгосын AN Baul аварга,  Румыны Denis  VIERU, Францын Walide KHYAR, Украины Bogdan  IADOV, Испанийн TORNE GARCIA , MARTIN GAITERO, Бразилын Willian LIMA, Казахстаны Gusman KYRGYZBAYEV, Узбекистаны Sardor NURILLAEV нарын шилдгүүд одоогоор мэдүүлэг өгсөн байна.

ЭРЭГТЭЙ 73 КГ:

         Эрэгтэйчүүдийн 73 кг-ын жинд 72 жүдочин барилдах мэдүүлэг өгсөн байна. Манай улсаас ОУХМ Батзаяагийн Эрдэнэбаяр барилдана. Энэ жинд Италийн Manuel LOMBARDO, Канадын Arthur MARGELIDON, Японы Ken OYOSHI, Узбекистаны Murodjon YULDOSHEV, Shakhram AKHADOV, Молдавын Adil OSMANOV, Petru PELIVAN, Испанийн Salvador CASES ROCA, Казахстаны Daniyar SHAMSHAYEV, Германы Igor WANDTKE нарын амаргүй өрсөлдөгчид Б.Эрдэнэбаярыг хүлээж байна.

ЭРЭГТЭЙ 81 КГ:

            Эрэгтэйчүүдийн 81 кг-ын жинд 62 тамирчин барилдах мэдүүлэг өгөөд байна. Манай улсаас ОУХМ Гэрэлтуяагийн Болор-Очир барилдах юм. Түүнийг Бельгийн Matthias CASSE аварга, Азербайжаны Saeid MOLLAEI аварга,  Zelim TCKAEV, Израилын Sagi MUKI аварга  , Өмнөд Солонгосын LEE Joon Нwan, Узбекистаны Sharofiddin BOLTABOEV,  Туркийн Vedat ALBAYRAK, Австрийн Wachid BORCHASHVILI, Японы Kenya KOHARA, Италийн Antonio ESPOSITO нарын шилдгүүд хүлээж байгаа.

ЭРЭГТЭЙ 90 КГ:

           Эрэгтэйчүүдийн 90 кг-ын жинд 52 жүдочин барилдах мэдүүлэг өгсөн байна. Манай улсаас ОУХМ Гантулгын Алтанбагана барилдана. Түүнийг Гүржийн Lasha BEKAURI, Японы Sanshiro MURAO, Узбекистаны Davlat BOBONOV, Унгарын Krisztian TOTH, Кубын SILVA MORALES, Италийн Christian PARLATI, Нидерландын Noel VAN T END, Туркийн Mihael ZGANK, Бельгийн  Sami CHOUCHI  нарын шилдгүүд хүлээж байгаа.

ЭРЭГТЭЙ -100 КГ:

        Эрэгтэйчүүдийн -100 кг-ын жинд одоогоор 46 тамирчин барилдах мэдүүлэг өгөөд байгаа. Манай улсаас ОУХМ Батхуягийн Гончигсүрэн барилдана. Түүнийг Гүржийн Varlam LIPARTELIANI, Японы Aaron WOLF аварга, Нидерландын Michael KORREL, Бельгийн Toma NIKIFOROV,  Израилын Peter PALTCHIK, Узбекистаны Muzaffarbek TUROBOYEV, Канадын Shady ELNAHAS, Сербийн Aleksandar KUKOLJ,  Бразилийн Rafael BUZACARINI нарын шилдгүүд хүлээж байгаа юм.

ЭМЭГТЭЙ 48 КГ:

         Эмэгтэйчүүдийн 48 кг-ын жинд 42 тамирчин барилдах  мэдүүлэг өгсөн байна. Манай улсаас ОУХМ Ганбаатарын Наранцэцэг, ОУХМ Бавуудоржийн Баасанхүү нар барилдах юм.

ЭМЭГТЭЙ 52 КГ:

            Эмэгтэйчүүдийн 52 кг-ын жинд 41 тамирчин барилдах мэдүүлэг өгсөн байна. Манай улсаас залуучуудын дэлхийн аварга, ОУХМ Лхагвасүрэнгийн Сосорбарам, залуу тамирчин Баянмөнхийн Уранзаяа, АНЭУ-ын нэр дээр барилдаж буй ОУХМ Бишрэлтийн Хорлоодой нар барилдах мэдүүлгийг өгчээ.

ЭМЭГТЭЙ 57 КГ:

        Эмэгтэйчүүдийн 57 кг-ын жинд 44 тамирчин барилдах мэдүүлэг өгсөн байна. Манай улсаас ДАШТ-ий хошой хүрэл медальт, МУГТ Лхагватогоогийн Энхрийлэн, АНЭУ-ын нэр дээр барилдаж буй ОУХМ Батсүхийн Алтанцэцэг нар барилдах мэдүүлэг өгөөд байгаа юм.

ЭМЭГТЭЙ 63 КГ:

            Эмэгтэйчүүдийн 63 кг-ын жинд 42 тамирчин барилдах мэдүүлэг өгсөн байна. Манай улсаас Ази тивийн аварга, ОУХМ Болдын Ганхайч, залуу тамирчин Цэгмидийн Энх-Оргил нар барилдах мэдүүлэг өгөөд байна. Португалийн гран прид Б.Ганхайчийн бэртэл сэдэрсэн байгаа. Тэрбээр Парисын их дуулгад барилдахгүй байж магадгүй.

ЭМЭГТЭЙ 70 КГ:

         Эмэгтэйчүүдийн 70 кг-ын жинд 44 тамирчин барилдах мэдүүлэг өгсөн байна. Манай улсаас ОУХМ Батсуурийн Ням-Эрдэнэ, ОУХМ Саранцэцэгийн Лхагвадулам нар барилдах мэдүүлэг өгөөд байгаа юм.

ЭМЭГТЭЙ: -78 КГ:

           Эмэгтэйчүүдийн -78 кг-ын жинд 35 тамирчин барилдах мэдүүлэг өгсөн байна. Манай улсаас ОУХМ Отгонбаярын Хүслэн барилдах мэдүүлэг өгөөд байгаа юм. Парисын их дуулгаас манай жүдочдод 3-4 медаль хүртэх бүрэн боломжтой байгаа. Тэр боломжийг жүдочид ашиглаж чадах, чадахгүйд ирэх сарын Парисын гранд слам тэмцээн дээр харах үлдлээ. Манай улсаас эмэгтэйчүүдийн +78, эрэгтэйчүүдийн +100 кг-ын жинд бөх барилдахгүй бололтой.