“Mas wrestling” буюу модон барилдаан манай улсад шинээр хөгжиж буй спортын төрлүүдийн нэг билээ. Өнгөрсөн жилээс Сэлэнгэ аймагт энэхүү спортын төрлөөр хичээллэх хүүхэд, залуучуудын тоо өсөн нэмэгдэж, тамирчин хүүхдүүд амжилт гаргасаар байна. Европ тивийн аварга шалгаруулах нээлттэй тэмцээнд амжилттай оролцож мөнгөн медаль хүртсэн Ж.Хүслэнтэй ярилцлаа.

-Европ тивийн аварга шалгаруулах нээлттэй тэмцээнээс мөнгөн медаль хүртсэнд баяр хүргэе.

         -Баярлалаа . Танд болон танай Эргэлт.мн сайтийн хамт олонд баярлалаа. Ажлын өндөр амжилт хүсье.

-Миний дүү өөрийгөө танилцуулахгүй юу?

         -Намайг Жигжсүрэн овогтой Хүслэн гэдэг. Одоо 15 настай Дархан-Уул аймгийн Дархан суманд төрсөн. Харин одоогоор Сэлэнгэ аймгийн Мандал суманд амьдарч байгаа ЕБС 4-р дунд сургуулийн 9-ийн “Г” ангид сурдаг.

-“Mas wrestling” буюу модон барилдааны спортоор хэд жилдээ хичээллэж байгаа вэ?

     - Модон барилдааны спортоор хоёр дахь жилдээ хичээллэж байгаа.

-Яагаад энэ спортыг сонирхож хичээллэх болов?

      -Сэлэнгэ аймгийн Мандал суманд модон барилдааныг сурталчилан, дасгалжуулагчаар ажиллаж байгаа Бямбацог ах анх надад санал болгосон. Тэгээд л модон барилдааны спортоор өнөөдрийг хүртэл хийчэллэж байна.

-Үүнээс өмнө өөр спортын төрлөөр хичээллэж байсан уу?

      - Модон барилдааны спортоос өмнө жүдо чөлөөт бөхөөр хийчэллэж байсан. Харин одоо энэ хоёр спортын төрлийг хослуулан хичээллэж байгаа.

-Европын аварга шалгаруулах тэмцээнд хэдэн кг-ын жинд оролцож медаль хүртэв?

         -Европын аварга шалгаруулах нээлттэй тэмцээнд +70 кг-ын жинд оролцсон.

-Ямар улсын тамирчидтай өрсөлдөв?

      -Манай жинд Словак Улсын тамирчид оролцсон. Тэдэнтэй л хүч үзэж, өрсөлдсөн.

-Европын аваргаас өмнө ямар тэмцээнүүдэд оролцож, ямар амжилтууд гаргаж байсан бэ?

         -Европын аваргаас өмнө “Хараа бүс”-ийн аварга шалгаруулах тэмцээнээс алтан медаль авч байсан. Мөн Төв аймгийн аварга шалгаруулах тэмцээнээс хүрэл медаль авсан.  Улсын аварга шалгаруулах тэмцээнээс мөнгөн медаль, Ази тивийн аварга шалгаруулах тэмцээнээс хүрэл медаль тус тус хүртэж байсан.

-Модон барилдааны спорт гарын хүч, нурууны тамир их шаарддаг уу?

         -Тийм ээ, Модон барилдаанд гарын хүч, атгалт, хөлийн тавилт чухал байдаг.

-Энэ спортыг анх мод таталт гэж нэрлэж байсан. Харин одоо “Mas-wrestling” буюу модон барилдаан гэж яагаад нэрлэх болсон юм бол?

         -Mas-мод, wrestling-барилдаан гэсэн утгатай юм билээ. Mas-wrestling-ийн спорт нь ОХУ-ын Саха-Якутаас гаралтай.