Чөлөөт бөхийн 2024 оны УАШТ тэмцээн энэ сарын 12-14-ний өдрүүдэд амжилттай болж өндөрлөсөн билээ. Энэ удаагийн улсын аваргын эмэгтэйчүүдийн 68 кг-ын жинд алтан медаль хүртсэн, “Алдар” спорт хорооны тамирчин ОУХМ Пүрвээгийн Номин-Эрдэнэтэй ярилцлаа.

-Чөлөөт бөхийн 2024 оны улсын аварга шалгаруулах тэмцээний 68 кг-ын жинд алтан медаль хүртсэнд баяр хүргэе.

-Баярлалаа. “Алдар” спорт хорооны багш, дасгалжуулагч нартаа, баг хамт олондоо баярлалаа. Үргэлж тусалж дэмждэг гэр бүл, ханьдаа хайртай шүү.

-Миний дүү өөрийгөө танилцуулахгүй юу?

-Намайг Пүрвээгийн Номин-Эрдэнэ гэдэг. 1995 онд Увс аймгийн Улаангомд мэндэлсэн.  Айлын бага охин болон төрсөн. Дээрээ нэг ахтай.

–Чөлөөт бөхийн УАШТ-ий анх удаа түрүүлэв үү?

-Тийм ээ, анх удаа чөлөөт бөхийн насанд хүрэгчдийн улсын аварга шалгаруулах тэмцээнд тзрүүлж, алт медаль хүртлээ. Маш их баяртай байна.

-УАШТ-ий аваргын төлөө “Женко” клубийн Э.Одзаяатай ямар тактикаар барилдаж ялалт авав?

-Залуу тамирчин Э.Одзаяагийн барилдааныг харсан. Хөлд их ордог. Хөл авч барилддаг онцлогтой хүүхэд байсан. Тийм болохоор хөлөө алдахгүй, хамгаалж, зай өгөхгүй, өөрөө түрүүлж барьцаа авч барилдах тактикаар барилдаад ялалтыг авлаа.

 -Танай жингийн  нэг номер ОУХМ Э.Дэлгэрмаа энэ жил барилдаагүй нь  Э.Одзаяа, А.Даваажаргал гээд залуу бөхчүүдэд медаль хүртэх боломжийг нээж өгөв үү?

-Тамирчин бүхэн ялахын төлөө хичээдэг. Хэн ч ялагдана гэж барилдаггүй. Дүү нар бас, чамгүй сайн л бэлдсэн байна. Спорт гэдэг өөрөө тэмцэл, тулаан шүү дээ.

 -Өнгөрсөн жилийн УАШТ-д ямар амжилт гаргасан бэ?

-Насанд хүрэгчдийн 2023 оны чөлөөт бөхийн улсын аварга шалгаруулах тэмцээнд энэ 68 кг-ын жиндээ гуравдугаар байрт орж, хүрэл медаль хүртсэн. Дэлхийн аваргын мөнгөн медальт, Азийн наадмын хүрэл медальт, ОУХМ Э.Дэлгэрмаатай таарч 11:8-аар бидний барилдаан өндөрлөсөн. Түрүү жилийн УАШТ-д жин их хассан болохоор төдийлөн сэргэлт авч чадалгүй, барилдаад хожигдсон.

 - УАШТ, олон улс, тив, ДАШТ-д оролцож байсан уу. Өөрийн гаргасан амжилтуудаа сонирхуулахгүй юу?

- Өсвөр үе, залуучууд, насанд хүрэгчдийн гурван насны Ази тивийн аварга шалгаруулах тэмцээнээс хүрэл медаль хүртэж байсан. Мөн цэргийн дэлхий аварга шалгаруулах тэмцээний хүрэл медальтай. Залуучуудын улсын аваргад таван удаа түрүүлсэн. Харин насанд хүрэгчдийн улсын аваргын дөрвөн мөнгө, гурван хүрэл медальтай. Олон улсын тэмцээнүүдийн амжилтууд гэвэл их бии.

-Чөлөөт бөхөөр хэд дэх жилдээ хичээллэж байгаа вэ?

- Чөлөөт бөхийн спортыг сонгож хичээллээд 14 жил рүүгээ орж байна. 2010 оноос хойш хичээллэж явна даа.

 -Чөлөөт бөхийн спортын чухам юу нь сонирхлыг тань татах болов. Багадаа ямар спортоор хичээллэж байсан бэ?

-Чөлөөт бөхийн спорт уран, гоё сайхан мэхтэй, сонирхолтой үзүүштэй спорт. Багаасаа л чөлөөт бөхөөр л эхлэн хичээллэж, бэлтгэл хийж эхэлсэн,

-Бага нас нь хаана өнгөрөв. Хэдэн настай байх даа чөлөөт бөхийн спортоор хичээллэв ээ?

-Би Увс аймагт төрсөн. Харин миний бага нас Улаанбаатар хотын  Сонгинохайрхан дүүргийн Баянхошууны гэр хороололд л өнгөрсөн. Тэнд л өсөж, торнисон. 1995 он төрсөн, 2010 он гэхээр 15 насандаа чөлөөт бөхөөр эхлэн хичээллэж байжээ.

 -Анх чөлөөт бөхөөр хичээллэх үед, гэр бүлийнхэн чинь эсэргүүцэж байв уу. Дэмжиж байсан уу?

-Манай гэрийнхэн намайг анх чөлөөт бөхийн спортыг сонгож  хичээллэх үед огт эсэргүүцээгүй. Би багын л эршүүд талдаа охин байсан. Эмээ минь намайг дандаа бөх болно гэж бэлгэшээж ярьдаг байлаа. Эмээгийнхээ амны билгээр бөх болоод хичээж л явна даа.

 -Э.Дэлгэрмаа олимпын эрхээ авчихсан байгаа. Тэгэхээр дөрөвдүгээр сард болох олимпын эрхийн тэмцээнд барилдах уу?

-Манай жинд ОУХМ Э.Дэлгэрмаа олимпын эрх авчихсан байгаа. Тийм болохоор Азийн олимпын эрх олгох тэмцээнд оролцохгүй байх аа. Гэхдээ би яг сайн мэдэхгүй байна. Монголын чөлөөт бөхийн холбоо л шийдэх болов уу.

-Э.Дэлгэрмаатай хэдэн удаа таарч барилдаж байв. Та хоёрын ялалт, ялагдлын харьцаа  хэд байдаг вэ?

-ОУХМ Э.Дэлгэрмаатай  нэг л удаа таарч барилдсан. Түрүү жил, 2023 оны насанд хүрэгчдийн улсын аварга шалгаруулах тэмцээн дээр л таарч барилдсан.

-Өөрийн цаашдын спортын зорилт, зорилго гэвэл?

-Тамирчин хүн бүхний зорилго тодорхой шүү дээ. Олимп, дэлхийн аварга шалгаруулах тэмцээний дэвжээнд гарч барилдаж, амжилт гаргах. Бэлтгэлээ сайн хийж, илүү их мэрийж, амжилт гаргахын төлөө хичээж зүтгэж, зорьж, тэмүүлж яваа.