• Өнөөдөр 2024-02-21

Д.ЦОГЗОЛМАА: Хүсэл, мөрөөдөлдөө хөтлөгдөөд чөлөөт бөхийн дугуйланд орсон

2023-12-08,   504

Азербайжан Улсын нийслэл Баку хотод чөлөөт бөхийн 36 дахь удаагийн цэргийн ДАШТ арваннэгдүгээр сарын 27-оос, арванхоёрдугаар сарын 3-ны өдрүүдэд боллоо. Тус ДАШТ-ий эмэгтэйчүүдийн 72 кг-ын жинд Д.Цогзолмаа тэргүүлж, дэлхийн аварга болсон. Зэвсэгт хүчний 326 дугаар ангийн тамирчин ОУХМ Доржсүрэнгийн Цогзолмаатай ярилцлаа.

-Цэргийн дэлхийн аварга болсонд баяр хүргэе.

-Баярлалаа.

 -Миний дүү өөрийгөө танилцуулахгүй юу?

-Намайг Доржсүрэнгийн Цогзолмаа гэдэг.

- Аль нутгийн хүүхэд вэ?

-Би Хөвсгөл аймгийн Галт суманд төрсөн. Намайг таван  настай байх үед манайх Дорноговь аймгийн Замын-Үүд рүү нүүсэн юм билээ. Харин би одоо Улаанбаатар хотод эгчтэй цуг амьдарч байгаа. Манай гэрийн бүлийнхэн Замын-Үүддээ бий.

-Чөлөөт бөхийн спортоор хичээллээд удаж байгаа юу. Хэдэн настайгаасаа чөлөөт бөхөөр хичээллэв?

-Би чөлөөт бөхөөр анх хичээллэхдээ их хожуу, 16 настайгаасаа хичээллэж эхэлсэн.

-Яагаад чөлөөт бөхийн спортыг сонгож хичээллэх болов?

-Манайх ер нь их спортлог гэр бүл байдаг юм. Ах нарыгаа хараад л “Би ямар нэгэн спортоор хичээллээд, тэдэн шиг мундаг тамирчин болно” хэмээн бодогдоод болдоггүй. Тэгээд л тэр хүсэл, мөрөөдөлдөө хөтлөгдөөд  чөлөөт бөхийн дугуйланд орсон.  Тэгэж маш их дурлаж, хүсэн мөрөөдөж чөлөөт бөхөөр хичээллэсэн болохоор өдий хүртэл явж байна. Спорт хүнд  төвлөрч сурах, тэсвэр хатуужил, эр зориг, зорилготой амьдрах, эрүүл саруул байх, тууштай хичээнгүй байх гээд олон  зүйлийг өгдөг юм байна. Чөлөөт бөхийн спортыг сонгож хичээллэсэндээ үргэлж баярлаж явдаг

-Цэргийн ДАШТ-ээс өмнө ямар тэмцээнүүдэд оролцож байв. Өөрийн гаргасан амжилтуудаа сонирхуулахгүй юу?

-Цэргийн ДАШТ-д оролцохоос  өмнө гаргасан том амжилт гэвэл өнгөрсөн  наймдугаар сард Киргизстан Улсын Бишкек хотод болсон “U23” насны ангиллын  Азийн аварга шалгаруулах тэмцээнээс хүрэл медаль хүртсэн байгаа.

-Цэргийн ДАШТ-д анх удаа оролцсон уу?

Тийм ээ, миний анхны оролцсон армийн дэлхийн аварга шалгаруулах тэмцээн байсан.

 -Цэргийн дэлхийн аваргын алтан медалийн төлөө ямар улсын тамирчинтай таарч барилдав. Хэр хүчтэй, ширүүн өрсөлдөгч байсан бэ?

-Би армийн ДАШТ-ий эхний тойрогт Казахстан Улсын тамирчинг, хоёрдугаар тойрогт Турк Улсын бөхийг ялсан. Улмаар хагас шигшээ барилдаанд Азербайжан Улсын тамирчинг буулган авч,  шигшээ барилдаанд барилдах эрхтэй болсон. Финалд Нигери Улсын тамирчинтай цэргийн ДАШТ-ий алтан медалийн төлөө барилдсан. Нигерийн бөх надаас өндөр, бие, бялдрын хувьд илүү, маш бяртай өрсөлдөгч байлаа. Түүнийг хожсондоо маш их баяртай байгаа.

-Энэ удаагийн цэргийн ДАШТ-д манай улсаас хэдэн тамирчин оролцов. Ямар, ямар амжилтууд гаргав?

-Манай улсаас армийн ДАШТ-д бүтэн багаараа оролцсон. Эмэгтэй баг маань сайн барилдсан. Энэ удаагийн ДАШТ-ээс “Алдар” спорт хорооны баг, тамирчид дөрвөн алт, гурван мөнгө, гурван хүрэл, нийт 10 медаль хүртсэн. Эмэгтэйчүүд багийн нийлбэр дүнгээр тэргүүлж, аваргын цомыг гардаж авсан байгаа. Эмэгтэйчүүдийн 50 кг-д ОУХМ Б.Мөнхнар алт, 62 кг-д МУГТ С.Цэрэнчимэд алт, 65 кг-д Н.Нархажид алт, харин би 72 кг-д алтан медаль хүртсэн. Мөн 53 кг-д Г.Оюундарь  мөнгө, 55 кг-д Б.Отгонтуяа мөнгөн медаль авсан. Эрэгтэйчүүдийн  65 кг-д ОУХМ Ц.Цогбадрах мөнгө, 61 кг-д Э.Энхболд  хүрэл, 70 кг-д Ц.Чинзориг хүрэл, 79 кг-д  ОУХМ О.Сүлдхүү  хүрэл медаль хүртсэн байгаа. Бид амжилттай сайхан яваад ирсэн. Энэ дашрамд  “Батлан хамгаалах яамны “Алдар” спорт хороо, Зэвсэгт хүчний 326 дугаар ангийн ажлын хамт олондоо маш их баярлалаа” гэдгээ дамжуулан уламжилъя.

-Бэлтгэл, сургуулилалтаа “Алдар” спорт хороон дээр хийдэг үү. Хэн багшийн шавь бэ?

-Би бэлтгэлээ “Алдар” спорт хороон дээр хийдэггүй.  Спортын төв ордон дээр хийдэг. Манай багшийг ОУХМ Өлзийбаярын Ууганбаяр гэдэг. Багш маань надад, өөрийн мэддэг, чаддаг бүхнээ хичээнгүйлэн заадагт нь талархаж байна. Үнэхээр их баярлалаа гэж хэлье.

 


 

 


Д.ЦОГЗОЛМАА: Хүсэл, мөрөөдөлдөө хөтлөгдөөд чөлөөт бөхийн дугуйланд орсон
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188