Хятадын Хонконгод  Зүүн Азийн аварга шалгаруулах муатайгийн тэмцээн энэ сарын 23-26-ны өдрүүдэд болж өндөрлөсөн билээ. Тус тэмцээний эмэгтэйчүүдийн 45 кг жинд хүрэл медаль хүртсэн “Garuda BJJ MMA” клубийн тамирчин Эрдэнэбаярын Намуунаатай ярилцлаа.

-Зүүн Азийн аварга шалгаруулах муайтайгийн тэмцээнээс хүрэл медаль хүртсэнд баяр хүргэе.

-Баярлалаа

-Миний дүү өөрийгөө танилцуулахгүй юу. Аль  сургуулийн хэддүгээр дамжааны оюутан бэ?

- Намайг Эрдэнэбаярын Намуунаа гэдэг. Олон улсын “Улаанбаатар” их сургуулийн Хувцас дизайны хоёрдугаар дамжааны оюутан

-Тулааны спортыг сонгож хичээллээд удаж байгаа юу. Тулааны спортод анх орсон түүхээ сонирхуулахгүй юу?

- Тулааны спортоор хичээллээд гурван жил болох гэж байна.  Би дунд сургуулийн арваннэгдүгээр ангидаа “Томүжин Алтернатив” сургуульд орсон. Тухайн сургуулийн маань биеийн тамирийн хичээлийн хөтөлбөр нь муайтай, жиү жицү хоёр ээлжилж ордог байсан. Тэр үеэс хойш хичээлдээ идэвхтэй оролцдог байж байгаад найзтайгаа хамт багшийн хичээл заадаг клуб дээр очиж үзье гэж ярилцаад очиж байсан. Анх ингэж “Гаруда” клубт очиж байлаа. Тэнд анхны бэлтгэлээ хийж үзээд л найз, бид хоёр бие бие рүүгээ хараад л “Гоё юм аа, яг бидний байх ёстой газар байна аа.” гэж ярилцаж байсан. Түүнээс хойш бэлтгэлээ хийсээр байна даа.

 -Муайтай бокс охин хүүхдэд эрсдэл ихтэй, хүнд тулааны төрөл биш үү?

-Эрсдэл байлгүй л яах вэ. Хүнд тулааны төрөл ч гэсэн энэ спортоор хичээллэдэг миний хүрээлэлд их гоё хүмүүс байдаг юм.

-Эмэгтэй найз нар чинь чиний тулааны спортыг дэмждэг үү, эсэргүүцдэг үү?

- Дээр хэлсэнчлэн найзтайгаа хамт энэ спортод хөл тависан шүү дээ. Бусад найзууд маань бол эсэргүүцдэггүй, харин ч эсрэгээрээ, миний хамгийн сайн дэмжигч нар минь.

-Муайтайд өвдөг, тохойгоор цохихыг зөвшөөрдөг. Тархи, толгой, нүүрэндээ гэмтэл авах эрсдэл ихтэй. Нүүрний гоо сайхандаа санаа зовдог уу?

-Мэдээж санаа зоволгүй яах вэ. Бэлтгэл дээр эрсдэл ихтэй учраас өвдөг, тохойны цохилтыг шаардлагатай үед л хийдэг. Тэмцээн дээр бол хамгаалалттай дээрээс манай жин чинь хамгийн хөнгөн нь шүү дээ, тийм болохоор бусад жингээ бодвол арай бага эрсдэлтэй байх гэж боддог.

-Аав, ээж нь тулааны спортоор хичээллэх болсон сонголтыг чинь хэрхэн хүлээн авч байсан бэ?

-Анх бол миний охин спортоор хичээллээд мундаг байна гэдэг байсан. Би чинь өөрийгөө спортод муу гээд бөмбөгтэй ер нь ойртдоггүй байсан юм. Харин одоо бол аав, ээж хоёр минь жаахан айдастай л байдаг. Сая тэмцээнд ороход “Миний охин эрүүл байх нь л чухал шүү” гэж зөндөө захисан.

-Зүүн Азийн аварга шалгаруулах тэмцээнд хэдэн тулаан хийв. Хамгийн хүнд  тулааныг аль улсын тамирчинтэй хийсэн бэ?

-Би сая хоёр тулаан хийсэн. Эхний тулаан Энэтхэг Улсын тамирчинтай тулалдсан. Түүнийг хоёрдугаар үеийн тулаан дээрээ техникийн илт давуу байдлаар ялсан. Хоёр дахь тулаан маань Хонконгийн тамирчин хийсэн. Би энэ тулаан дээр хожигдсондоо биш, тэр хүнтэй гурван үе бүтэн тулалдсанаараа өөрөөрөө их бахархаж байгаа. Учир нь Хонконгийн тамирчин маань 2019 оны аварга, дээрээс нь бүр мэргжлийн тулааны тавдугаар бүстэй хүн байсан. Ийм мундаг тулааны мастертай бүтэн тулаан хийсэндээ баярлаж байгаа.

-Зүүн Азийн наадамд 45 кг-ын жинд тулалдсан гэхээр охидын хамгийн хөнгөн жин үү?

-Тиймээ охидын хамгийн хөнгөн жин.

–Хөлийн болон гарын ямар цохилтуудыг ихэвчлэн хийдэг вэ. Өрсөлдөгчөө хүнд цохилтоор унагаж байсан уу?

-Би ихэвчлэн зүүн хөлөөр гэдсэнд өшиглөх болон хажуугийн  цохилтуудыг гол төлөв хийдэг. Өрсөлдөгчөө бол хүнд цохилтоор унагаж байгаагүй ээ. 

-Тулааны урлагийн ямар төрлүүдийн тэмцээнд оролцож байв. Тулааны спортоор гаргасан амжилтуудаа танилцуулахгүй юу?

-Анх муайтайгаараа л хичээллэж эхэлсэн. Муайтайдаа л тууштай байна даа. Монголд тэмцээнүүдэд миний 45 кг-ын  жинг оруулах нь ховор байдаг. Өнгөрсөн наймдугаар сард  Дарханд болсон улсын аварга шалгаруулах тэмцээнд 48 кг-ын жинд тулалдаад  улсын аварга болсон. Мөн Зүүн Азийн аварга шалгаруулах тэмцээнд оролцож хүрэл медаль авлаа.

-Тулааны спортоос өмнө өөр спортын төрлөөр хичээллэж байсан уу?

- Үгүй ээ. Сургуульд байхад сагс, волейбол, хөл бөибөг гээд дандаа бөмбөгтэй спортуудыг мэддэг байсан. Тэгээд бөмбөгнөөс л хол байх минь гээд спортоор хичээллэдэггүй байв. Тэр л миний  спортоор хичээллэдэггүй шалтгаан байсан байх.