Узбекистан Улсын нийслэл Ташкент хотод жүдо бөхийн өсвөр үе, залуучуудын Ази тивийн аварга шалгаруулах тэмцээн энэ сарын 16-19-ний өдрүүдэд болсон билээ. Тус тэмцээнд 15 орны 181 тамирчин хүч үзсэн. Залуучуудын Азийн аваргын эмэгтэйчүүдийн 70 кг-ын жинд мөнгөн медаль хүртсэн Амгалангангаагийн Лхагважавтай ярилцлаа.

-Жүдо бөхийн залуучуудын Ази тивийн аварга шалгаруулах тэмцээнээс мөнгөн медаль хүртсэнд баяр хүргэе.

-Баярлалаа.

-Миний дүү өөрийгөө танилцуулаач, одоо хэдэн настай вэ. Аль клубийн тамирчин бэ?

-Намайг Амгалангангаагийн Лхагважав гэдэг. 2007 онд төрсөн. Одоо 16 настай. Чинсанаа дасгалжуулгчтай “One team” клубийн тамирчин.

-Жүдо бөхөөр хичээллээд удаж байгаа юу?

-2019  оноос хойш жүдо бөхөөр хичээллэж байгаа.

-Жүдо бөхийг сонгон хичээллэх болсон түүхээ сонирхуулахгүй юу?

-Анх үеэлээ дагаад жүдо бөхийг сонирхож, бэлтгэл хийж эхэлсэн. Тэр үеэс хойш тасралтгүй жүдо бөхөөр хичээллэж байгаа.

-Азийн аварга шалгаруулах тэмцээнд өмнө нь оролцож байсан уу?

-Жүдо бөхийн Азийн аварга шалгаруулах тэмцээнд өмнө нь орж үзээгүй. Анх удаа л Азийн аваргын дэвжээнд гарч, барилдаж үзлээ.

-Өмнө нь гаргасан амжилтуудаа сонирхуулаач?

-Том тэмцээнүүдээ дурдвал жүдо бөхийн өсвөр үеийн УАШТ-ий хоёр мөнгө, нэг хүрэл медальтай. Улаанбаатар хотын аварга шалгаруулах тэмцээнээс нэг хүрэл медаль авч байсан. Харин залуучуудын УАШТ-ий тавдугаар байр, самбо бөхийн хүүхдийн их наадмын алтан медаль, самбо бөхийн өсвөр үеийн УАШТ-ээс хоёр алтан медаль хүртэж байсан.

-Азийн аваргад Киргизстан, Тайванийн бөхчүүдийг ялжээ. Алтан медалийн төлөөх барилдаанд ямар алдаа гаргаад Узбекистаны Барчиной Кодировад ялагдав аа?

-Узбекистаны Барчиной Кодировагаас өөрийн сонгосон барьцыг бүрэн авч чадаагүй. Барьцны барилдаанаас болж хожигдсон гэж бодож байна.

-Гэхдээ Азийн аваргын мөнгөн медаль гэдэг том амжилт шүү. Энэ жилийн залуучуудын ДАШТ-д барилдсан уу?

-Жүдо бөхийн  дэлхийн аварга шалгаруулах тэмцээнд ороогүй.

-Ер нь босоо болон хэвтээ барилдаан гол төлөв ямар мэх хийж барилддаг вэ?

-Босоо барилдаанаас давхар ачих, тонгорох мэхийг ихэвчлэн хийдэг.

-Монголын болон гадаадын ямар шилдэг бөхчүүдээс үлгэр дуурайл авдаг вэ?

-Гадаадын бөхчүүдээс гэвэл Францын олимп, дэлхийн аварга Clarisse Agbegnenou болон  Өмнөд Солонгосын жүдочин ДАШТ-ий хүрэл медальт Lee Harim-ын барилдааныг сонгож хардаг. Харин монгол бөхчүүдийн барилдааны онцлог, давуу талуудаас нь суралцахыг хичээдэг. Байнга тусалж, дэмждэг Чинсанаа багш, хүчний бэлтгэлийг хангаж өгсөн Гантогтох багш болон бусад багш нартаа баярлалаа. Мөн гэр бүл, найз нөхөд, хамаатан садангийн бүх хүнд баярлалаа.