Манай улсын жүдо бөхийн 60 кг-ын жингийн дотоодын өрсөлдөөн ширүүн, ижил тэнцүү ур чадвартай өрсөлдөгч олон байдаг билээ. Тэдний нэг нь  ОУХМ Э.Сумъяабазар юм. Жүдо бөхийн Үндэсний шигшээ баг, “Женко” клубийн тамирчин, ОУХМ Энхтайваны Сумъяабазартай ярилцлаа.

 -Жүдо бөхөөр хэдэн оноос эхлэн хичээллэв?

- Жүдо бөхөөр 2011 оноос эхлэн хичээллэсэн.

 -Яагаад жүдо бөхийн спортыг сонгон хичээллэх болов?

-Манай ах аймгийн харцага Э.Гүнсумьяа гэж хүн байдаг. Бага байхаасаа ахтайгаа ноцолдож өссөн. Дунд сургуулийн гуравдугаар ангид байхад, ах Өвөрхангай аймгийн Б.Очир багшийн бэлтгэлд оруулж өгсөн. Тэр цагаас хойш бэлтгэлээ хийгээд явж байна даа. Жүдо бөхийн анхны суурийг тавьж өгсөн Б.Очир багшдаа баярлаж явдаг.

 -Өөрийгөө манай уншигчдад танилцуулахгүй юу?

-Би Өвөрхангай аймгийн Баянгол сумын харьяат. Айлын том хүүхэд, нэг дүүтэй. Харин одоо эхнэр хоёр хүүхдийн хамт амьдардаг. Жүдо бөхийн ОУХМ цолтой. “Женко” клуб, “Хан хөгшин стэйт” компанийн тамирчин. Энэ боломжийг ашиглаад Монголын жүдо бөхийн холбооны ерөнхийлөгч Х.Баттулга болон Шигшээ багийн багш нар, “Хан Хөгшин стэйт” компанийн захирал Дэмчиг ахдаа баярлаж талархаж явдаг гэдгээ хэлмээр байна. Мөн “Корэа оптик” компанийн захирал Гантөмөр ахдаа баярлалаа гэж дамжуулан хэлье.

 -Сүүлийн үед нутаг руугаа хэзээ очив?

- Энэ зун нутаг руугаа яваад ирсэн. Байнгын бэлтгэл сургуулилалттай, тэмцээн, уралдаантай байдаг болохоор тэр болгон явж чадахгүй юм. Боломж олдвол аав, ээж, эмээ дээрээ, нутаг руугаа явдаг.

-Бага насныхаа талаар ярихгүй юу. Хэр хөдөлгөөнтэй хүүхэд байсан бэ?

-Хүүхэд байхдаа эмээгийндээ байж сургуульд суусан. Эмээтэйгээ ихэвчлэн өссөн дөө. Зуныхаа амралтаар хөдөө аав, ээж дээрээ гэртээ очиж ажилд нь тусалдаг байв. Хонинд явдаг, унага татдаг тийм л хүүхэд байсан даа. Арван жилийн сургуулийг Өвөрхангай аймгийн 1-р дунд сургуулийг төгссөн. Ер нь томоотой, даруухан талдаа хүүхэд байлаа. Харин спортод маш дуртай. Тийм л хүүхэд байсан шүү. Хичээлдээ явдаггүй, бэлтгэл тэмцээн гээд л явж байдаг байсан. Тэгэж л яваад дунд сургуулиа төгссөн. Ангийнхаа багш нарт баярлалаа гэж хэлмээр байна. Ер нь багш нар маань л намайг дэмжин, төгсгөж өгсөн дөө.

 -Сүүлийн хоёр жил насанд хүрэгчдийн УАШТ-ээс дараалан мөнгөн медаль хүртсэн. Гэхдээ Б.Сүхбатад л ялагдсан байх юм аа?

-Тэгсэн. Улсын аваргаар хоёр жил дараалан мөнгөн медаль хүртсэн. Гурван жил дараалан УАШТ-ээс медаль аваад байгаа. Дараа жилээс алтан медаль авахын төлөө хичээж зүтгэнэ.

 -Б.Сүхбат та хоёрын барилдаан таардаггүй юм уу?

-Бидний барилдаан таардаггүй гэхээс илүүтэйгээр, миний сул талыг Б.Сүхбат сайн ашигладаг байх. Багаасаа барилдаж, олон таарч, хэн, хэнийгээ ялж, ялагдаж яваа.  Бэлтгэл дээр байнга барилдана. Хэн, хэнийхээ ямар мэх хийдгийг маш сайн мэддэг. Б.Сүхбатын дархан мэх нь миний сул талтай таардаг учраас хожигдоод байдаг гэж хэлж болно.

-ОУХМ, дэлхийн аваргын мөнгөн медальт Э.Ариунболдыг дотоодын тэмцээнд ялчихаад байдаг. Харин Э.Ариунболд гадаадын бөхчүүдтэй арай л илүү барилдаах байх шиг харагдах юм аа?

-Тийм шүү, Ариунболд ах бид хоёр дөрвөн удаа таарч барилдсан. Хоорондын ялалт, ялагдал 3:1-ийн харьцаатай байгаа.  Бид нэг тэмцээн дээр бүр  25 минут барилдаж байсан ч удаа бий.

-Гран при, гранд слам тэмцээнд дараалан нэлээн хэдэн удаа хүрэл медалиас мултарсан. Харин “Улаанбаатар” гранд сламд Э.Ариунболдыг гурван торгуулиар хожиж, их дуулга ангиллын тэмцээний анхны медалиа хүртсэн. Түүнээс хойш гран при, гранд сламаас медаль хүртсэн үү?

-Тийм ээ, би өмнө нь гурван их дуулга, хоёр нээлттэй тэмцээн, нэг гран при тэмцээнд хүрэл медалийн төлөө барилдаад тавдугаар байрт ороод байсан. Уг нь их хичээж л барилддаг юм. Медалийн оосроос атгаад л алдаад байлаа. Харин нутаг дээрээ Э.Ариунболд ахыг гурван торгуулиар хожиж их дуулгын анхны медалиа хүртсэн. Миний хувьд сайхан мөч байсан.

-Манай улсын дотоодын хөнгөн жингийн өрсөлдөөн ширүүн, тэнцүү өрсөлдөгч олонтой. Өөрт чинь хамгийн эвгүй барилдаантай өрсөлдөгч гэвэл хэн байна вэ?

-Тэгэлгүй яах вэ. Манай 60 кг-ын жин өрсөлдөөн ихтэй. Миний хувьд барилдахад эвгүй хүн байхгүй ээ.  Бүгдийнх нь барилдааныг мэднэ. Би өөрөө жингийнхээ бөхчүүдэд эвгүй өрсөлдөгч нь баймаар байна. Өрсөлдөөн ихтэй жиндээ завсаргүй хамгийн олон медаль хүртсэн тамирчин боломоор байна. Одоо хэдхэн хоногийн дараа Хонконгийн нээлттэй тэмцээнд оролцоно. Оны дараагаар Шигшээ багийн багш нар тэмцээний нэрсээ зарлах байх. Тэгээд оноогдсон тэмцээндээ бүх хүчээ дайчлаад үзнэ дээ. Бэлтгэл сургууль, зардал мөнгө гээд бүх зүйлд тусалж дэмждэг бүх хүмүүст маш их баярлалаа гэж хэлмээр байна. Та бүхнийхээ итгэлийг алдахгүй хичээнэ. Хамтын хүч амжилт. Баярлалаа.