Самбо бөхийн сурагчдын дэлхийн аварга, өсвөр үеийн ДАШТ-ий мөнгөн медальт, "БӨРТЭ ЧОНО 2022" наадмын  “Шилдэг залуу тамирчин”-д нэр дэвшигч, Наранбаярын Ундрахбаяртай ярилцлаа.   Дархан-Уул аймгаас бөхийн спортын гараагаа эхэлсэн тэрбээр Спортын төв сургуулийн сурагч юм.

 -Өнгөрсөн жил, 2022 онд Армен Улсын нийслэл Ереван хотод болсон самбо бөхийн өсвөр үеийн ДАШТ-ий охидын 44 кг-ын жинд түрүүлж алтан медаль хүртжээ. Харин жин өгсөн залуучуудын ангилалд  47 кг-д  мөнгөн медаль авсан юм уу?

Тийм ээ. 2022 онд Армен Улсад болсон самбо бөхийн сурагчдын дэлхийн аварга шалгаруулах тэмцээнд түрүүлж, алтан медаль хүртсэн. Залуучуудын ДАШТ биш, өсвөр үеийн ДАШТ-ээс мөнгөн медаль авсан байгаа.

-Энэ жилийн 2023 оны самбо бөхийн залуучуудын  ДАШТ-д барилдсан уу?

-Энэ жил самбо бөхөөр улсын аварга шалгаруулах тэмцээнд түрүүлж, 2023 оны самбо бөхийн дэлхийн аваргад оролцох эрх авсан юм. Гэтэл бэртлийн улмаас ДАШТ-д явж чадаагүй.

-Миний дүү өөрийгөө танилцуулахгүй юу. Спортын төв сургуулиа төгссөн үү?

-Намайг Наранбаярын Ундрахбаяр гэдэг. Би одоо Спортын төв сургуулийн 12-ын “А” ангид суралцаж байгаа.

 -Самбо, жүдо бөхөөр хичээллээд удаж байгаа юу?

-Би самбо, жүдо бөхөөр хичээллээд найм дахь жилдээ явж байна.

-Чухам яагаад бөхийн спортыг сонгох болсон юм бол?

-Анх дүүгээ бэлтгэл хийж байхыг хараад суудаг байлаа. Тэгэж харж суусаар байгаад нэг л мэдсэн бөхийн спортод дур сонирхолтой болоод татагдаад орчихсон.

- Дарханы П.Ууганбаатар, Ц. Төгсөө, Г.Батбилэг, Д.Балжинням багш нарын хэн нь анхны чинь багш вэ?

-Би анх Дарханы жүдо бөхийн Д.Балжинням багшийн удирдлага дор бэлтгэл, сургуулилалт хийдэг байсан. Балжаа багш маань одоо хүртэл намайг үнэхээр сайн дэмждэг. Миний хамгийн сайн зөвлөгч хэвээр байдаг даа.

 -Дарханы аль сургуульд сурч байв. Дарханы яг хаана өссөн хүүхэд вэ. Аав, ээж гэр бүлийнхэн нь Дархандаа амьдарч байна уу?

-Дархан-Уул амйгийн Нэгдүгээр дунд сурч байсан. Намайг есдүгээр ангид ордог жил манайх гэр бүлээрэй Улаанбаатар хотод шилжиж ирсэн.

-Жүдо бөхөөр  барилддаг уу. Жүдогийн тэмцээнд орлоо гэж дуулдахгүй юм аа?

-Би самбо бөхийн тэмцээнд ордог болохоос биш, жүдо бөхөөр найм дахь жилдээ хичээллэж байгаа. Энэ жилийн наймдугаар сард болсон жүдо бөхийн дэлхийн аварга шалгаруулах тэмцээнд явсан. Хараахан амжилт гаргаж чадаагүй.

-Самбо, жүдо бөхөөр өөрийн гаргасан амжилтыг сонирхуулахгүй юу?

-Жүдо бөхөөр 2023 оны өсвөр үеийн улсын аварга шалгаруулах тэмцээний 48 кг-ын жинд алтан медаль хүртсэн. Харин залуучуудын улсын аваргаас хүрэл медаль авсан. Өмнөх жил Ази тивийн аваргаас хүрэл медаль хүртсэн байгаа. Самбо бөхөөр энэ жилийн УАШТ-ээс алтан медаль хүртсэн. Самбын залуучуудын УАШТ-ээс хүрэл медаль авсан. Хүүхдийн их наадмаас алтан медаль хүртсэн. 2022 оны сурагчдын дэлхийн аваргаас алтан медаль, өсвөр үеийн ДАШТ-ээс мөнгөн медаль хүртсэн амжилт гаргасан.

-Одоо хэдэн кг-ын жинд барилдаж байна. Аль клуб, нийгэмлэгт харьяалагдаж байгаа вэ?

-Би одоо 48 кг-ын жинд барилдаж байгаа. Спортын төв сургуульдаа бэлтгэл, сургуулилалтаа хийж байна.

-Жүдо бөхийн насанд хүрэгчдийн УАШТ-д хэдэн удаа барилдаж байв. Ямар амжилтууд үзүүлж байсан бэ?

-2023 оны нэгдүгээр сард болсон жүдо бөхийн насанд хүрэгчдийн улсын аварга шалгаруулах тэмцээний эхний тойргийн барилдаанд өөрийнхөө буруугаас болоод хожигдол хүлээсэн.

-Цаашид самбо, жүдо бөхийн аль төрлөөр нь дагнан хичээллэх сонирхолтой байгаа вэ?

-Цаашид самбо, жүдо бөхийг хослуулан барилдана. Гэхдээ олимпын хөтөлбөрт орсон жүдо бөхийн төрлөөр арай илүү, түлхүү чиглэсэн бэлтгэл хийнэ.