Катар Улсын Доха хотод жүдо бөхийн 2023 оны ДАШТ долоон хоногийн турш үргэлжилж өндөрлөв. Энэ удаагийн ДАШТ-д дэлхийн 99 орны 667 тамирчин хүч сорин өрсөлдсөн. Энэ жилийн ДАШТ өмнөх 2022 оны дэлхийн аварга өнгөрөөд долоон сарын дараа богино хугацаанд зохион байгуулагдан явагдсан юм. Мөн дэлхийн чансааны 100-аас рэмбэтэй тамирчид оролцох боломжгүй болсон учраас оролцох улс, тамирчдын тоо буурч 99 орны 667 бөх барилдсан онцлогтой дэлхийн аварга боллоо.

Монголын баг, тамирчдыг жүдо бөхийн Үндэсний шигшээ багийн ахлах дасгалжуулагч, Монгол Улсын гавьяат дасгалжуулагч, МУГТ Халиуны Болдбаатар, Үндэсний шигшээ багийн дасгалжуулагч МУГТ Ганбатын Болдбаатар, ОУХМ Чимэд-Ёндонгийн Болдбаатар, МУГТ Мөнхбаатарын Бундмаа, МУГТ Доржпаламын Цэрэнханд, террапист эмч Масатоши Нишикидо нар дэвжээнд авч гарлаа.

Дэлхийн аваргын эхний өдөр манай улсаас эмэгтэйчүүдийн 48 кг-ын жинд ОУХМ Ганбаатарын Наранцэцэг, ОУХМ Бавуудоржийн Баасанхүү, эрэгтэйчүүдийн 60 кг-ын жинд дэлхийн аваргын мөнгөн медальт, ОУХМ Энхтайваны Ариунболд нар барилдлаа.

Эрэгтэйчүүдийн 60 кг-ын жинд 37 жүдочин барилдсан. ОУХМ Энхтайваны Ариунболд “С” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Узбекистаны Dilshodbek  Baratov-той барилдаж ялагдсан. Эмэгтэйчүүдийн 48 кг-ын жинд 45 тамирчин барилдав. ОУХМ Ганбаатарын Наранцэцэг “D” хэсгийн нэгдүгээр тойрогт Тунисын Oumaima Bebioui-г ялсан. Хоёрдугаар тойрогт Австрийн Catarina Tanzer-г хожсон. Гуравдугаар тойрогт Бразилийн Аманда Лимад ялагдлаа.

Энэ жингийн “В” хэсгийн нэгдүгээр тойрогт ОУХМ Бавуудоржийн Баасанхүү Чилийн Mary Dee Vargas Ley-г ялсан. Хоёрдугаар тойрогт Брундийн Shignoline Kanyamuneza-г мөн ялсан. Гуравдугаар тойрогт Казахстаны Abiba Abuzhakynova-г ялагдаж тэмцээнээ өндөрлүүлэв.

Л.Сосорбарам 52 кг-ын нэгдүгээр тойрогт Бельгийн Amber Ryheul-д, 57 кг-д М.Ичинхорлоо, Тайваний Lien Chen Ling-д ялагдлаа. Эмэгтэйчүүдийн -70 кг-ын жингийн нэгдүгээр тойрогт Б.Ням-Эрдэнэ, АНУ-ын Chantal Wright-ийг ялаад, хоёрдугаар тойрогт ОХУ-ын Madina Taimazova-д хожигдов. -78 кг-д О.Хүслэн нэгдүгээр тойрогт хийлээд хоёрдугаар тойргийн барилдаанд Нидерландын Guusje Steenhuist-д ялагдсан.  +78 кг-д А.Адъяасүрэн нэгдүгээр тойрогт хийлээд, хоёрдугаар тойрогт Молдавын Oxana Diacenco-г ялаад, гуравдугаар тойрогт Хятадын Shiyan Xu-тай маш сайн барилдсан хэдий ч вазари үнэлгээ алдаж хожигдсон.

Эрэгтэйчүүдийн 66 кг-д Б.Эрхэмбаяр нэгдүгээр тойрогт Морокогийн бөхийг, хоёрдугаар тойрогт Лативын бөхийг ялаад, гуравдугаар тойргийн барилдаанд Гүржийн Vazha Margavelashvili-д хожигдлоо. 73 кг-д Б.Эрдэнэбаяр, Израилийн Tohar Butvul-д, Ц.Цогтбаатар Тунисийн бөхөд ялагдлаа. 81 кг-д Г.Болор-Очир нэгдүгээр тойрогт Катарын Khalil Rebahi-г, хоёрдугаар тойрогт Молдавын Victor Sterpu-г ялаад, гуравдугаар тойрогт дэлхийн аварга Израилийн Sagi Muki-д ялагдсан.

Эрэгтэйчүүдийн -100 кг-ын жинд Б.Гончигсүрэн нэгдүгээр тойрогт Эмиратын Dzhafar Kostoev-ыг ялаад, хоёрдугаар тойрогт Гүржийн ilia Sulamanidze-д  хожигдсон. +100 кг-ын жинд О.Цэцэнцэнгэл нэгдүгээр тойрогт хийлсэн. Хоёрдугаар тойрогт Бахрейн руу гарсан ОХУ-ын Azamat Chotchaev-ыг цэвэр ялсан. Гуравдугаар тойрогт Францын алдарт бөх, олимп, дэлхийн аварга Teddi Riner аваргатай үндсэн цагт үнэлгээ байхгүйгээр тэнцсэн. Нэмэлт цагийн барилдаанд хоёр бөх хоёулаа хоёр, хоёр торгууль авсан. Манай бөх жаахан тэсвэр алдаж, идэвхгүй барилдаан гаргаж гурван торгуулиар ялагдаж тэмцээнээ өндөрлүүлэв. О.Цэцэнцэнгэлд маш их боломж нөөц  байгаа нь харагдлаа. Боломж байсан. Сайн үзлээ.Тедди Ринетей хамгийн сайн барилдсан бөх гэвэл О.Цэцэнцэнгэл байлаа.

Ё.БАСХҮҮ ДЭЛХИЙН АВАРГЫН ХОЁР ДАХЬ МЕДАЛИА АВЛАА

ОУХМ Ё.Басхүү “С” хэсгийг чансаагаараа тэргүүлж, эхний тойрогтоо гоц мөргөсөн. Хоёрдугаар тойрогт Оросын Абрек Нагучевыг, гуравдугаар тойрогт Румыны Лусиан Борс Думитрескуг, хэсгийн аваргын төлөө Италийн Элиос Манзиг тус тус ялж, хагас шигшээд шалгарсан. Хагас шигшээд дэлхийн аварга Японы Жоширо Марүяаматай тэнцүүхэн барилдсан боловч, ялагдаж, хүрэл медалийн төлөө барилдахаар болов. Хүрэл медалийн төлөө Гүржийн Важа Маргвелашвилиг ялснаар дэлхийн аваргаас хоёр дахь хүрэл медалиа хүртлээ.

Л.ЭНХРИЙЛЭН ДЭЛХИЙН ХОС МЕДАЛЬТАН БОЛЛОО

Эмэгтэйчүүдийн 57 кг-д зодоглосон Л.Энхрийлэн урамтай сайхан барилдсаар дэлхийн дэвжээнээс хоёр дахь хүрэл медалиа зүүв. Манай бөх  Шинэ Зеландын К.Кристи, Европын аварга Израилийн Т.Нельсон Леви, дэлхийн аварга, олимпын хүрэл медальт Канадын Ж.Климкаит нарыг дараалан ялсан. Хагас шигшээ барилдаанд Канад бөх, дэлхийн аварга К.Дегучид хожигдсон юм.

Харин хүрэл медалийн төлөөх барилдаанд Өмнөд Солонгосын Хух Ми Миг буулгаж авснаар хоёр жил дараалан ДАШТ-ий медалийн тавцанд зогсов.Тэрбээр өнгөрсөн жил  мөн л Хух Ми Миг ялж, дэлхийн дэвжээнээс анхны хүрэл медалиа хүртэж, энэ амжилтаараа оны “Шилдэг тамирчин”-аар шалгаран “Бөртэ чоно”-ын эзэн болсон билээ.