Шүүхийн шийдвэр гүйцэтгэх ерөнхий газрын Тусгай ажиллагааны төв, “Сүлд” спорт хорооны тамирчин, Ази тивийн аваргын хүрэл медаль, ОУХМ Балсангийн Мөнгөнсарантай ярилцлаа.

-Энэ оны насанд хүрэгчдийн ДАШТ-ээс медаль хүртэж чадаагүй ч боломжийн амжилттай тулалдсанд баяр хүргэе. Уг нь хожих боломж бүрэн байсан. Нэгдүгээр үеийг 5:0-ээр илүүрхэн тулалдсан шүү дээ. Юунаас болж хожигдов гэдэгт дүгнэлт хийж үзэв үү?

-Юуны өмнө намайг энэ ярилцлагад урьж оролцуулсан танд баярлалаа. Энэ жилийн ДАШТ манай баг тамирчдын хувьд их өгөөжтэй сайхан тэмцээн болж өндөрлөсөн. Миний хувьд 50 кг-ын жиндээ ранкаараа гуравдугаарт эрэмблэгдсэн Испани тамирчинтай тулалдсан. Түүнийг хожих бүрэн боломжтой байсан. Тэр боломжийг алдсан нь харамсалтай л байна. Хожигдсоныхоо дараа маш их зүйлийг бодсон. Эхний үе дээр яг багш дасгалжуулагч нарын зөвлөснөөр тактикийн дагуу тоглож 5:0-ээр хожисон юм. Харин хоёрдугаар үеийн дундуур биеэ хянаж чадахгүй болж эхэлсэн. Ялах хүсэл эрмэлзэл дүүрэн байсан ч гар урагш явж өгөхгүй, хурд удааширсан.  Мэдээж надад маш олон зүйлийн алдаа дутагдал байснаас болж л хожигдсон.

-Дэлхийн 50 кг-ын жингийн чансааны гуравдугаарт эрэмбэлэгдэж байгаа, өнгөрсөн жилийн ДАШТ-ий хүрэл медальт Испанийн Лаура Фуэртес Фернандестэй учраа таарч 4:3-аар маш харамсалтай ялагдсан. Шүүгчид Испанийн Лаураг жаахан дэмжээд ялалтыг өгчихсөн юм шиг харагдсан. Дэлхийн аваргын шүүлт хэр шударга байв аа?

-Ер нь “Унасан бөхөд шалтаг мундахгүй” гэдэг биз дээ. Энэ 2023 оны ДАШТ бол урьд өмнөх тэмцээн уралдаануудыг бодоход харьцангуй цэвэрхэн шүүлттэй болсон юм шиг санагдаж байгаа шүү.

-Дэлхийн аваргын нэгдүгээр тойргийн тулаанд Туркийн Рабиа Топузыг 5-0-ээр оноогоор илүүрхэн ялсан. Тэмцээний эхний тулаан ер нь амаргүй хэцүү байдаг биз?

-Тэмцээний эхний тулаан угаасаа амаргүй байдаг. Спорт болгонд адилхан байдаг байх. Сэтгэл зүй биеийн байдал догдлолт, хүлээлт, сандрал гэх мэтчилэн. Харин эхний тулаанаа хийгээд гараад ирэхэд түгжээтэй хаалгыг нээгээд цаашаагаа чөлөөтэй явах зам нээгдэж байгаа юм шиг санагдсан.  Тэгээд л дараа дараагийн тулаан их аятайхан болсон шүү.

-Насанд хүрэгчдийн ДАШТ-д анх удаа оролцов уу. Үүнээс өмнө ДАШТ-д оролцож байсан уу?

-Насанд хүрэгчдийн ДАШТ-д гурав дахь удаагаа оролцож байна. Тэмцээнээс тэмцээний хооронд маш их зүйлийг сурч л явандаа. Хэзээ нэгэн өдөр миний цаг ирнэ гэдэгт итгэлтэй байгаа.

-Энэ удаагийн ДАШТ-д хэдэн тулаан хийж, хэд ялав?

- Хоёр тулаан хийж нэг хожил авсан. Цаашаа замаа үргэлжлүүлэх маш их боломж байсан ч тэрийгээ ашиглаж чадсангүй. Гэхдээ яах вэ. Надад том сургамж үлдээсэн.

 -Хамгийн хүнд ширүүн тулааныг ямар улсын боксчинтой хийсэн бэ?

-Мэдээж хоёр дахь тулаан Испани Улсын тамирчинтай хийсэн тулаан байсан.

-2019 онд Тайландад  болсон Азийн аварга шалгаруулах тэмцээнээс  хүрэл медаль хүртсэн. Азийн аваргад 48 кг-ийн жинд  Тайландын боксчин Р.Сикадоныг 3:2 харьцаагаар ялж, хүрэл медалийн болзол хангасан. Мөнгөн медалийн төлөө дэлхийн аваргын алт, мөнгөн медальт Филиппиний Josie Gabuco-той тулалдсан бил үү?

-Тийм ээ. Тэр үед анхны насанд хүрэгчдийн ААШТ байсан. Анх удаа орж байсан болохоор сэтгэл зүй чанга,  өөрөөсөө эгч, дэлхийн шилдэг боксчидтой алдах юмгүй үзэлцэнэ гэсэн бодолтой тулалдсан. Бэлтгэл сургуулилалтаа маш чармайлттай хийж базаасан. Тэр үед миний анхны багш олон улсын “Нэг одтой” дасгалжуулагч спортын мастер Б.Пүрэв-Очир багш маань эмэгтэй шигшээ багийг ахалж явсан. Тэр үед медалийн төлөө хожоод гараад ирэхэд багш маань баяр хүргэж, духан дээр минь үнсэж байсан нь саяхан мэт санагдаж байна. Цаг хугацаа ч хурдан юм аа. Хэзээ нэгэн цагт багшийгаа баярлуулж ”Сайн байна миний охин гэж хэлүүлээд” духан дээрээ дахиад үнсүүлнээ.

-Үүнээс өмнө өсвөр үе, залуучууд, насанд хүрэгчдийн олон улс, тив, дэлхийн тэмцээнд тулалдаж байсан уу?

-Өсвөр үе, залуучуудын тив далхий олон улсын тэмцээн уралдаад зөндөө орж байсан. Гэхтэй жаахан ичмээр ч юм шиг санагдчихлаа. Олон тэмцээн уралдаад орж байсан байж амжилт гаргасан нь ховор юм байна шүү.

 -Боксоор хичээллэсэн үеэс хойших томоохон амжилтууддаа дурдахгүй юу?

-Хамгийн анхны олон улсын тэмцээн гэвэл ОХУ-ын Челябинск хотод болж байсан тэмцээнээс алт медаль авч байсан.  Азийн хүүхдийн их наадмын хүрэл медальтай. Ази тивийн аваргын хүрэл медальтай. За тэгээд олон улсын тэмцээний нэлээн хэдэн медаль бий.

-Одоо спортын ямар, зэрэг цолтой вэ?

-Боксын спортын Олон улсын хэмжээний мастер цолтой.

-Эрдэнэтийн “Хангарьд”-ын тамирчин гэдэг. Эрдэнэтийн унаган хүүхэд үү. Өөрийгөө танилцуулахгүй юу. Хэдэн настай, аль сургуульд сурдаг вэ?

- Би  Сэлэнгэ аймгийн Орхонтуул сумын унаган хүүхэд. Орхонтуул суманд төрж өссөн. Манай гэр бүл Эрдэнэт хот руу нүүсэн. Би “Хангарьд” спорт хороонд харьяалагдахгүй байгаа.  Дотоод хэргийн их сургуулийг түрүү жилийн долдугаар сард төгсөөд Шүүхийн шийдвэр гүйцэтгэх ерөнхий газарын тусгай ажиллагааны төвд элсэн орж “Сүлд” спорт хорооны тамирчин болсон.

 –Боксын спортыг анх сонирхож  хичээллэх болсон түүхээ эргэн нэг дурсахгүй юу?

-Би хамгийн анх Эрдэнэтэд байдаг “Ирээдүй-Одод” спортын төрөлжсөн сургалттай сургуульд волейболын спортоор хичээллэж байсан юм. Тэгээд наймдугаар ангид орох жил боксын багш маань манай ангид орж ирээд “Боксын спортоор хичээллэх хүүхэд байвал бүртгүүлээрэй” гэсэн юм. Тэгээд л би бүртгүүлчихсэн. Манай волейболын багш маань чамайг бокс руу оруулахгүй гэв. Харин боксын багш намайг авна гэж зуурсаар байгаад  авсан. Тэгэж л боксоор албан ёсоор хичээллэж эхэлсэн түүхтэй.

-“Хангарьд” клубийн, хэн багшийн шавь бэ?

-Эрдэнэтэд боксын хоёр клуб байдаг. Нэг нь “Хангарьд”, нөгөөх нь “Эрдэнэт бокс” клуб байгаа юм. Би анх “Эрдэнэт бокс” клубийн  Олон улсын “Нэг одтой” шүүгч, дасгалжуулагч, спортын мастер Б.Пүрэв-Очир багшийн шавь болсон. Багшийн удирдлаган доор хичээллээд 10 жил болж байна даа. Мөн дээрээс нь хэсэг хугацаанд ч болтугай “Хангарьд клуб”-д харьяалагдаж байхад тусалсан Баттулга багшдаа баярлалаа гэж хэлмээр байна.

– Боксоор хичээллэхээс өмнө өөр спортоор хичээллэж байв уу. Танай гэр бүлд нь спортоор хичээллэдэг хүн бий юу?

-Манай аав залуу байх даа бөх, волейболоор хичээллэж байсан. Өвөө маань бөхийн багш хийдэг байсан. Бас ээж залуудаа волейболоор хичээллэж байсан. Би одоо ч санаж байна. Аав,ээж хоёрынхоо волейбол тоглож байгааг харахаар гоё байдаг байсан шүү. Бахархах сэтгэл төрөөд, огшоод үздэг байлаа.

 -Ер нь боксын спортыг яагаад сонирхон хичээллэх болов оо?

-Ямар нэгэн шалтгаан байхгүй ээ. Зүгээр л миний багын зан ариншинд тохирсон байх. Би багын л зодоон, цохион хийгээд л эрэгтэй хүүхдүүдтэй нийлдэг тийм охин байв. Тийм болохоор надад боксын спорт ойр байсан байх л даа.