Хүндийн өргөлтийн 2023 оны улсын аварга шалгаруулах тэмцээний эмэгтэйчүүдийн 49 кг-ын жинд түрүүлж, улсын дээд амжилтыг шинэчлэн тогтоосон Батнасангийн Тунгалагтай ярилцлаа. Тэрбээр сүүлийн дөрвөн жил гаран хугацаанд спортоос  хөндийрөн завсарлага авсан байв. Б.Тунгалаг спортдоо эргэн ирж 52 дахь удаагаа Монгол Улсын дээд амжилтыг шинэчлэн тогтоогоод байна.

      Спорт өөрийгөө өөр өнцгөөс харах боломжийг хүн олгодог, өөрөөс нь гармааргүй их хүч чадал гарч болдогийг харуулдаг, маш гайхамшигтай эрч хүчийг мэдрэх боломжтийг нээж өгдөг ажээ. Түүний гаргасан амжилтуудаас харахад, нээрээ л энэ жижиг биеэс нь гармааргүй  биеийн болон сэтгэл зүйн  их хүчийг хүндийн өргөлт гэх спортоос Б.Тунгалаг олж авч чадсан нь гайхалтай юм.                                                                            

-Хүндийн өргөлтийн 2023 оны улсын аварга болж, улс дээд амжилтыг шинэчлэн тогтоосонд баяр хүргэе. Хэд дэх удаагаа УАШТ-нд түрүүлж байгаа вэ?

      -Маш их баярлалаа. Насад хүрэгчдийн улсын аварга шалгаруулах тэмцээнд гурав дахь удаагаа түрүүлж байна.

-Өөрийгөө танилцуулахгүй. Одоо хэдэн настай вэ?

     -Намайг Батнасангийн Тунгалаг гэдэг. Одоо 23 настай.

- Увс аймгийн тамирчин юм уу. Улаанбаатарт сурч, амьдардаг уу?

   -Үгүй ээ. Би Увс аймгийн тамирчин биш. Хүндийн өргөлтийн 2023 оны улсын аварга шалгаруулах тэмцээнд  энэ жил шинээр байгуулагдаж буй хүндийн өргөлтийн  “Увс нуур” клубийн нэр дээр оролцсон юм.

-Хүндийн өргөлтийн спортоор хэд жилдээ хичээллэж байна. Бэлтгэл, сургуулилалтаа хаана, ямар клуб дээр хийдэг вэ?

      -Хүндийн өргөлтийн спортоор долоо дахь жилээ хичээллэж байгаа.

    Би бэлтгэл сургуулилалтаа “Самбуу сан” клуб дээр Монгол Улсын гавьяат дасгалжуулагч Ц.Цогтбаяр багшийн удирдлага дор хийдэг.

-Монгол Улсын 49 кг-ын дээд амжилтыг 52 удаа шинэчлэн тогтоосон байна. Өсвөр үе, залуучууд, насанд хүрэгчдийн тэмцээнүүдийн амжилтууд нийлээд 52 удаагийн дээд амжилт болж байна уу?

       -Тийм ээ, тийм. Өсвөр үе, залуучууд, насанд хүрэгчдийн ангиллын тэмцээний дээд амжилтуудыг 50 гаруй удаа шинэчлэн тогтоогоод байгаа.

-Ер нь яагаад хүндийн өргөлтийн спортоор хичээллэх болов оо.  Энэ спортоороо хичээллээд хэдэн жил болж байгаа вэ?

      -Анх хамаатныхаа эгч нарыг дагаж яваад л хүндийн өргөлтийн тэмцээн үзсэн. Тэр тэмцээн надад үнэхээр сонирхолтой санагдсан. Тэмцээн үзэж дууссаны дараа сэтгэл хөдлөөд хүндийн өргөлтийн спортоор хичээллэж үзмээр хүсэл төрсөн. Тэр хүсэл мөрөөдөлдөө хөтлөгдөн 2013 онд хүндийн өргөлтийн спортоор хичээллэж эхэлсэн. Түүнэээс хойш таван жил тасралтгүй хичээллэж байгаад 2018 онд бэлтгэлээ түр зогсоож, гэр бүлийн амьдралаа зохиож, хөөрхөн охины ээж болсон.

-Хүндийн өргөлтөөс өмнө өөр урлаг, спортын төрлөөр хичээллэж байсан уу?

      -Хүндийн өргөлтөөс өмнө өөр спортоор хичээллэж байгаагүй. Гэрийнхээ ойр байдаг спортын талбайг хааяа нэг тойрч гүйх дуртай охин байлаа. Урлагийн төрөл гэвэл төгөлдөр хуур хөгжим тоглодог байсан. Биеийн тамирын хичээлд бараг л дургүй хүүхэд байсан даа. Ер нь өөрийгөө спортоор хичээллэнэ гэж огт төсөөлж  байгаагүй.

-Танай гэр бүлд спортоор хичээллэдэг хүн бий юу. Гэр бүлээ таниулцуулж болох уу?

      -Гэр бүлээ танилцуулбал нөхөр, охины хамт амьдардаг. Миний төрсөн аав, ээж Багануур дүүрэгт амьдарч байгаа. Нөхрийн маань аав, ээж охиныг минь харж өгдөг. Бэлтгэл хийх бүх боломжийг олгодог юм. Намайг маш их дэмждэг хүмүүс байгаа. Тийм болохоор охиндоо ямар ч санаа зовох зүйлгүйгээр бэлтгэлээ хийж чаддаг.

-Цаашдын зорилго, хүсэл мөрөөдлөөсөө хуваалцахгүй юу?

     -Намайг хамгийн сайн дэмжигчид бол миний гэр бүл. Том зорилго тавин спортдоо эргэн ирсэн. Дэлхийн аварга болж  Парисын 2024 оны олимпод биш юм аа гэхэд дараагийн олимпод оролцож медалийн тавцанд гарах өөдрөг хүсэл, мөрөөдөлтэй яваа.

      Хүндийн өргөлтийн спортыг монголчуудад таниулж, дэлхийд нэр алдраа дуудуулж яваа шилдэг тамирчиддаа болон Монголын хүндийн өргөлтийн холбооны ерөнхийлөгч, бүх гишүүд, багш, дасгалжуулагч нартаа, “Увс нуур” клубийнхэндээ маш их баярлалаа. Багийнхандаа болон хүндийн өргөлтийн нийт тамирчдадаа амжилтын дээдийг хүсье. Манай спортыг сонирхож байгаа хөдөө, орон нутгийн хүүхдүүд улам их болж байна. Бэлтгэл сургуулилалт хийх заал, танхим, техник хэрэгсэл боломжийн хэмжээнд аймаг бүрт нэмэгдсээр байгаад их баярлаж явдаг.

-“Увс нуур” клубт өөр аймгийн тамирчид хичээллэж болох уу?

      -Бололгүй яах вэ. Манай клубийн нэр л “Увс нуур” гэж байгаа юм. Тэрнээс биш зөвхөн Увс аймгийнханд зориулагдсан клуб биш . Шинээр байгуулагдаж буй “Увс нуур” клуб маань олон шилдэг тамирчныг өлгийдөн авна гэдэг итгэлтэй байгаа. Манай клуб зөвхөн Увс аймгийнханд зориулагдаагүй. Хүндийн өргөлтийн спортыг сонирхож байгаа хүн бүхэнд манай “Увс нуур” клубийн үүд хаалга үргэлж нээлттэй байх болно.